პარტია "გაერთიანებული დემოკრატიული მოძრაობის“ ლიდერის ნინო ბურჯანაძის განცხადებით, რამდენად იყო აუცილებელი 2006 წელს კოდორის ხეობაში ცნობილი სპეცოპერაციის განხორციელება, ამაზე პასუხის გაცემა მხოლოდ ობიექტურ გამოძებას შეუძლია და ამას 2008 წლის მოვლენები უნდა მიებას, როდესაც, მისი თქმითვე, კოდორის ხეობა მართლაც ჩააბარეს, მართლაც დატოვეს იარაღით სავსე ხეობა, რომლის დაცვა, მისი მდებარეობიდან გამომდინარე 20 და 100 ადამიანს შეუძლია და ის პრაქტიკულად აუღებელი ციხესიმაგრეა.
ამის შესახებ ნინო ბურჯანაძემ ტელეკომპანია „იმედის“ ეთერში განაცხადა.
"ერთ–ერთი სერიოზული არგუმენტი, რომელიც ბრალდების მხარის მიერ უნდა იყოს წამოყენებული მიხეილ სააკაშვილისა და "ნაციონალური მოძრაობის“ მიმართ, ეს 2008 წელს კოდორის ხეობის ჩაბარება უნდა იყოს.
როდესაც ეს ცნობილი მოვლენები დაიწყო, მე სააკაშვილს და მაშინდელ ხელისუფლებას შევთავაზე, რომ მზად ვიყავი წავსულიყავი კოდორის ხეობაში, დაცვის გარეშეც კი, იმიტომ რომ აბსოლუტურად დარწმუნებული ვიყავი, რომ არც ერთი სვანი და მათ შორის არც ემზარ კვიციანი არაფერს დამიშავებდნენ და არავინ ხელს არ აღმართავდა იქ მოსალაპარაკებლად ჩასულ ადამიანზე და მით უფრო ჩემზე, იმიტომ რომ იმ რეგიონთან მე ნამდვილად განსაკუთრებული ურთიერთობა მქონდა, მაგრამ ეს მაშინდელმა ხელისუფლებამ არ ისურვა.
იქ ჩასვლა სააკაშვილს ჩემმა მეუღლემაც შესთავაზა.
მაგრამ განვითარებული მოვლენებით დადასტურდა, რომ მაშინდელ ხელისუფლებას ამ პრობლემის მშვიდობიანად მოგვარება არ სურდა.
მათ უნდოდათ რომ ჭკუა ესწავლებინათ, მონადირის მონაწილეებისათვის და ემზარ კვიციანისთვის და სამაგალითო სპეცოპერაცია მოეწყოთ“ – განაცხადა ნინო ბურჯანაძემ.
მისივე თქმით, ის არ ფიქრობს, რომ სააკაშვილის ამოცანა კოდორის ხეობის ჩაბარება იყო.
"ისევე როგორც არ ვფიქრობ, რომ 2008 წელს იმიტომ დაიწყო სააკაშვილმა ომი, რომ ე.წ. სამხრეთ ოსეთის დაკარგვა უნდოდა, ასე ნამდვილად არ ვფიქრობ, მაგრამ ფაქტია, რომ შედეგი ასეთი მივიღეთ“ – აღნიშნა პარტიის ლიდერმა.
