ფინანსთა სამინისტროს საგამოძიებო სამსახურმა, ქრთამის აღების ფაქტზე, ლანჩხუთის მუნიციპალიტეტის გამგეობის, "სკოლამდელი საგანმანათლებლო სააღმზრდელო ცენტრის" დირექტორი დათო დობორჯგინიძე და ამავე ცენტრის მთავარი სპეციალისტი შესყიდვების საკითხებში ზურაბ ჩხაიძე გასული კვირის პარასკევს დააკავა.
საგამოძიებო სამსახურის ინფორმაციით, ბრალდებულებმა ერთ-ერთ კომპანიასთან, ერთ პირთან მოლაპარაკების გზით სახელმწიფო შესყიდვის შესახებ ხელშეკრულების გაფორმების და შესასყიდი საქონლის ფასის ხელოვნურად გაზრდით, ქრთამის სახით, აიღეს გარკვეული თანხა: "გარდა ამისა, ბრალდებულები აღნიშნული კომპანიის წარმომადგენლებს სამომავლოდ დაპირდნენ, გარკვეული თანხის სანაცვლოდ, ერთ პირთან მოლაპარაკების გზით არა ერთი ხელშეკრულების გაფორმებას," _ გვითხრეს ფინანსთა სამინისტროს საგამოძიებო სამსახურში.
ფაქტზე გამოძიება სისხლის სამართლის კოდექსის 338-ე მუხლის პირველი ნაწილით მიმდინარეობს რაც ითვალისწინებს თავისუფლების აღკვეთას 9 წლამდე ვადით.
"გურია ნიუსის" ინფორმაციით, ჩხაიძე და დობორჯგინიძე უშულოდ ქრთამის აღების მომენტში დააკავეს. როგორც გვითხრეს, ფული, რომელიც კომპანიის წარმომადგენელმა ბრალდებულებს ბათუმიდან 30 იანვარს ჩამოუტანა, დანომრილი იყო.
_ ამ საქმეზე დიდი ხანია გამოძიებაა დაწყებული. საგამოძიებო სამსახურს შესაძლო დანაშაულის შესახებ ინფორმაცია დაახლოებით 4 თვის წინ მიაწოდეს. ამის შემდეგ დაიგეგმა ოპერაცია, _ გვითხრა წყარომ.
მისივე თქმით, კომპანიისგან ბრალდებულებმა საბავშვო ბაღებისთვის გაზქურები შეიძინეს:
_ კომპანიას გადაურიცხეს 2 800 ლარი გაზქურების და ე. წ. "შტირების" საყიდლად. თითო გაზქურის საბაზრო ღირებულება 100 ლარი იყო. სულ 20 ცალი გაზქურა იქნა შეძენილი. რაც შეეხება "შტირებს", მისი ღირებულება საერთო ჯამში 300 ლარს არ აღემატებოდა. წინასწარი მოლაპარაკების შედეგად კომპანიის წარმომადგენელმა დობორჯგინიძეს და ჩხაიძეს დარჩენილი 500 ლარი, ქრთამის სახით ლანჩხუთში ჩამოუტანა. როგორც გითხარით, აღნიშნულ ორგანიზაციაში შესაძლო კორუფციული ფაქტების გამო გამოძიება კარგა ხანია მიმდინარებს და შესაბამისად, ამ საქმის გახსნაც ადვილად მოხდა, _ გვიყვება წყარო და დასძენს, რომ იმ კომპანიის წარმომადგენელი, რომელთანაც დობორჯგინიძეს და ჩხაიძეს მოლაპარაკებები ჰქონდათ, ანტიკორუფციული სააგენტოს თანამშრომელი იყო.
აღსანიშნავია, რომ ფინანსური პოლიცია ლანჩხუთში პროკურორთან და ექსპერტებთან ერთად იყო ჩამოსული.
ლანჩხუთის მუნიციპალიტეტის გამგებლის ზაზა ურუშაძის თქმით, ბაღების გაერთიანებაში არსებული დარღვევების შესახებ კითხვები მას უფრო ადრეც ჰქონდა:
_ როდესაც ამ თანამდებობაზე მოვედი, ბაღებთან დაკავშირებით ბევრი ეჭვი მქონდა და ამიტომ, ხელმძღვანელი შევცვალე. როდესაც დობორჯგინიძეს ვნიშნავდი და მის შესახებ აზრი ვიკითხე, მითხრეს, რომ უპატიოსნესი ადამიანი იყო. "რესპუბლიკური" პარტიის წევრი გახლდათ და მართლაც კარგი რეკომენდაცია ჰქონდა. მივეცი სრული თავისუფლება ყველა საკითხში და მხოლოდ ერთი რამ ვთხოვე _ ემუშავა სუფთად და პატიოსნად.
რამდენიმე თვის წინ რაღაცეებში ეჭვი შემეპარა _ ხორცის შესყიდვაზე ტენდერი გამოაცხადეს და ვიღაცამ 10 ლარად მოიგო. თუმცა, შემდეგ, ერთ კილოგრამ ხორცში 10 ლარის ნაცვლად 15 ლარი გადაიხადეს. როგორც განმარტეს, გამყიდველს წერილით მიუმართავს, ბაზარზე ფასების ცვლილება მოხდა და 15 ლარი გადამიხადეთო. ამის გამო დავიბარე დობორჯგინიძე და ვუთხარი, თავად მოეწვია ფინანსური პოლიცია. მიუხედავად იმისა, რომ ბაღების გაერთიანებას ჩვენ ვაფინანსებთ, მის საქმიანობაში არასდროს ჩავრეულვარ. აბსოლუტურად დამოუკიდებლად მუშაობდნენ.
ცოტა ხნის წინ, დობორჯგინიძემ კერძო აუდიტი მოიწვია. ერთი კვირის წინ დასკვნაც მივიღე, სადაც მნიშვნელოვანი დარღვევებზე არ არის საუბარი.
თუმცა, როგორც ჩანს, რაღაც მაინც გამოგვეპარა. ძალიან მოხარული ვარ იმის, რაც მოხდა. მოხარული იმიტომ, რომ დანაშაული არავის არ უნდა შერჩეს და ვირთხები უნდა დაისაჯონ, _ აღნიშნა "გურია ნიუსთან" საუბრისას ზაზა ურუშაძემ.
როგორც გვითხრეს, ფინანსთა სამინისტროს საგამოძიებო სამსახურმა ბაღების გაერთიანებიდან უკვე წაიღო შესყიდვების დოკუმენტაცია. ჩვენი წყაროს თქმით, არ არის გამორიცხული, ძიების პროცესში სხვა საქმეებიც გამოვლინდეს.
