ყველა გახმაურებული საქმის გამოძიება პრაქტიკულად დასრულებულია და ეს საქმე ერთ-ერთი მათგანია, – ასე გამოეხმაურა საქართველოს პრემიერ-მინისტრი ირაკლი ღარიბაშვილი ე.წ კორტებთან ჩატარებული სპეცოპერაციის დროს მოკლული ზურაბ ვაზაგაშვილისა და ალექსანდრე ხუბულოვის საქმის გახსნას.
პრემიერმა აღნიშნა, რომ საქმის დეტალებზე საუბარი პროკურატურის პრეროგატივაა.
"რაც შეეხება პოლიტიკურ შეფასებას, ჩვენი ხელისუფლების სათავეში მოსვლის შემდეგ პრაქტიკულად ყველა გახმაურებული საქმე გამოვიძიეთ და ეს არის ერთ-ერთი მათგანი. სამწუხაროდ, ჩვენ ძალიან მძიმე მემკვიდრეობა გვერგო. ეს საქმეები გამოძიებულია, ბევრი დასრულების სტადიაშია და ყველა გახმაურებული საქმის გამოძიება ძალიან მალე დასრულდება“, – განაცხადა პრემიერმა.
ირაკლი ღარიბაშვილმა ასევე კომენტარი გააკეთა ქვეყნის ეკონომიკურ მდგომარეობასთან დაკავშირებით და განაცხადა, რომ სირთულეების მიუხედავად, საქართველოს გასული წლის ეკონომიკური ზრდის მაჩვენებელი 5%-ის ფარგლებში იქნება.
„ეს არის ძალიან დიდი წარმატება, იმ ვითარებაში, როცა წამყვანი ევროპული სახელმწიფოების და წარმატებული ეკონომიკის ქვეყნების ზრდა 3%-ზე დაბალი იყო. წელს ასევე ვგეგმავთ მნიშვნელოვან ზრდას. ყველაფერს გავაკეთებთ იმისთვის, რომ მაქსიმალურად წარმატებული წელი იყოს საქართველოში, მაგრამ დამოკიდებული ვართ საგარეო ფაქტორებზე“, – აღნიშნა პრემიერმა.
პრემიერ-მინისტრი ასევე გამოეხმაურა არასამთავრობო ორგანიზაციების უკმაყოფილებას ბიძინა ივანიშვილის მისამართით. ირაკლი ღარიბაშვილის თქმით, ბიძინა ივანიშვილს დაფუძნებული აქვს არასამთავრობო ორგანიზაცია „მოქალაქე“ და მისთვის გაუგებარია, რატომ უნდა გახდეს შეშფოთების საგანი ერთი არასამთავრობო ორგანიზაციის მიერ მეორის გაკრიტიკება.
პრემიერის შეფასებით, ეს არის ჯანსაღი დისკუსია არასამთავრობოებს შორის და დამახასიათებელია დემოკრატიული ქვეყნებისთვის.
„ყველა ადამიანს აქვს სრული უფლება და თავისუფლება, ერთმანეთზე გამოთქვას აზრი. მთავრობის წევრები ხშირად ვისმენთ კრიტიკას, ყოველთვის გაგებით ვეკიდებით და ეს არის ნორმალური პროცესი. ჩვენ უზრუნველვყავით სრული დემოკრატია. ყველაფერს გავაკეთებთ, რომ სიტყვის თავისუფლება გარანტირებულად დაცული იყოს საქართველოში“, – განაცხადა ირაკლი ღარიბაშვილმა.
