სუდანში, დარფურის რეგიონში ორი რუსი პილოტი გაიტაცეს. ამის შესახებ "ფრანს პრესს" სუდანში რუსეთის საელჩოში განუცხადეს.
"სამწუხაროდ, ვადასტურებთ, რომ 2 რუსი პილოტია გატაცებული. შემთხვევა დარფურის პროვინციაში 29 იანვარს მოხდა," _ განაცხადა საელჩოს საზოგადოებასთან ურთიერთობის სამსახურის წარმომადგენელმა არტურ საფუკოვმა.
მან სხვა დამატებითი ინფორმაციის გაცემისგან, გამოძიების ინტერესების გათვალისწინებით, თავი შეიკავა.
რუსული მედიის ინფორმაციით, გატაცებულები რუსული კომპანიის თანამშრომლები არიან და სუდანში გაეროს მისიის ფარგლებში იმყოფებოდნენ.
გაეროს აღნიშნული მისია სუდანში 2007 წელს მოქალაქეთა დაცვისა და უსაფრთხოების ზომების განმტკიცების მიზნით დაიწყო, რასაც წინ ქვეყანაში 2003 წლიდან ეთნიკურ ნიადაგზე წარმოშობილი კონფლიქტები უძღვოდა.
მისიის წარმომადგენლებსა და ოფიციალურ ხარტუმს შორის ურთიერთობა მას შემდეგ დაიძაბა, რაც მისიამ ოქტომბერში სუდანელი ჯარისკაცების მიერ 200 ქალის გაუპატიურების საქმის გამოძიება დაიწყო.
