პაატა ბურჭულაძის საიუბილეო საღამოს ორგანიზატორმა კომპანია „არტპალასმა“ კონცერტის ბილეთებზე ფასი დააკლო. დღეიდან 90 და 100-ნლარიანი ბილეთები 60 ლარად გაიყიდება, ხოლო ფასთა შორის განსხვავებას, პაატა ბურჭულაძის თხოვნით, კომპანია ,,ლილო მოლი“ დაფარავს.
" ძალიან კარგი სიახლე გვაქვს პაატა ბურჭულაძის ღონისძიებაზე დასწრების მსურველთათვის, რომლებიც იმაზე მეტი აღმოჩნდნენ, ვიდრე ველოდით. თავიდანვე გავითვალისწინეთ უამრავი მსურველის ფინანსური მდგომარეობა და კონცერტის მასშტაბურობის და დიდი ბიუჯეტის მიუხედავად 10 და 25-ლარიანი ბილეთებიც კი ჩავუშვით გაყიდვაში. დაბალფასიანი ბილეთები ორ დღეში გაიყიდა, რის გამოც უამრავი ადამიანი, რომელთაც არ აქვთ 90 და 100-ლარიანი ბილეთის ყიდვის შესაძლებლობა უბილეთოდ დარჩა.
ამ პრობლემის მოსაგვარებლად ბატონი პაატას თხოვნით კომპანია ,,ლილო მოლმა" დიდი საჩუქარი გაუკეთა საღამოზე დასწრების ყველა მსურველს: დღეიდან 90 და 100 ლარიანი ბილეთები 60 ლარად გაიყიდება, ხოლო ფასთა შორის დანაკლისს კომპანია ,,ლილო მოლი“ დაფარავს" , _ განაცხადა "არტპალასის" პრეზიდენტმა გია ანდღულაძემ.
შეგახსენებთ, რომ მსოფლიო ბანის, პაატა ბურჭულაძის საღამო 12 ივლისს 20 საათზე სპორტის სასახლეში გაიმართება. კონცერტში მონაწილებას ქართველი და უცხოელი პრიმადონები მიიღებენ. საღამოს ფრანგი მსახიობი ალენ დელონი წაიყვანს.
