საატესტატო და ეროვნული გამოცდების შერწყმის შესახებ ინიციატივა, რომელზეც დღეს განათლების მინისტრმა ისაუბრა, 2012 წელს უკვე დამუშავების პროცესში იყო და 2013 წლიდან მისი ამუშავებაც იგეგმებოდა.
თამარ სანიკიძის წინამორბედის, დიმიტრი შაშკინის განცხადებით, ხელისუფლების ცვლილების შემდეგ რეფორმა დღის წესრიგიდან მოიხსნა.
შაშკინი "8+1" მოდელს გულისხმობს, რომლის მიხედვითაც უმაღლეს სასწავლებლებში ჩასაბარებლად მოსწავლეებს მხოლოდ რვა საატესტატო და ერთი უნარ-ჩვევების გამოცდების ჩაბარება მოუწევდათ.
განათლების სამინისტროში აცხადებენ, რომ რეფორმის ძირითადი მონახაზი 2015-2016 წლისათვის მზად იქნება. დადგინდება, რამდენი გამოცდის ჩაბარება მოუწევთ მოსწავლეებს და როდიდან. თუმცა, მიმდინარე და მომავალი წლის დამამთავრებელი კლასის მოსწავლეებს ცვლილება არ შეეხებათ.
განათლების ყოფილი მინისტრი დიმიტრი შაშკინი ეროვნული გამოცდების საატესტატო გამოცდებთან შერწყმის იდეას დადებითად აფასებს. თუმცა, აღნიშნავს, რომ ინიციატივა ჯერ კიდევ 2012 წლის ივნისში მაშინდელმა პრეზიდენტმა მიხეილ სააკაშვილმა გაახმაურა.
ყოფილი მინისტრის თქმით, ეროვნული გამოცდების სისტემის დანერგვის დროს მთავარი გამოწვევა უმაღლეს სასწავლებლებში ჩაბარების დროს არსებული კორუფცია იყო, რომელიც ეროვნულმა გამოცდებმა მოაგვარა. შემდგომი გამოწვევა კი უკვე 2010 წელს დადგა, როდესაც აღმოჩნდა, რომ მოსწავლეები მხოლოდ ეროვნულ გამოცდებზე ჩასაბარებელ საგნებში ემზადებოდნენ და სხვა საგნებს ყურადღებას თითქმის აღარ უთმობდნენ. შაშკინი 2010 წელს საატესტატო გამოცდების შემოღებას ამ გამოწვევაზე პასუხად აფასებს და აღნიშნავს, რომ ამავე პერიოდიდან გაჩნდა იდეა, რომ ეროვნული გამოცდები საატესტატო გამოცდებთან შერწყმულიყო.
"სისტემა, რომელზეც ჩვენ ვსაუბრობთ თითქმის ყველა წამატებულ ქვეყანაში მუშაობს. საატესტატო პროგრამით 8 საგანი ჩაბარდებოდა. უნივერსიტეტები მათთვის საინტერესო საგნებისთვის ზღვარს დაადგენდნენ, რის შემდეგაც მოსწავლეები სპეციალურ ცენტრებში მხოლოდ ერთ გამოცდას – ზოგად უნარებს ჩააბარებდნენ. ამ მოდელის შესახებ 2012 წლის ივნისში განვაცხადეთ. ოქტომბერში ჯერ მარგველაშვილმა და შემდეგ უკვე 2013 წლის მაისში სანიკიძემ წარმატებით დამარხეს ეს რეფორმა. ახლა ამოთხარეს და ჰგონიათ, რომ შეუძლიათ საკუთარ იდეად გაყიდონ," _ ამბობს დიმიტრი შაშკინი "გურია ნიუსთან".
მისივე თქმით, "როდესაც სანიკიძე ამ რეფორმაზე საუბრობს, სავარაუდოდ, მისი შინაარსი არ ესმის". შაშკინის განცხადებით, პრობლემა, რაც ამ დროისთვის დგას, ეროვნული გამოცდების საგამოცდო საკითხების სასკოლო პროგრამასთან შეუსაბამობაა.
"ამიტომ, ბავშვებს რეპეტიტორებთან უწევთ მომზადება. წლიური სარეპეტიტორო ბაზრის მოცულობა 80-დან 100 მილიონ ლარამდეა. ეს ის თანხაა, რასაც მშობლები შვილების ეროვნული გამოცდებისთვის მოსამზადებლად წლიურად იხდიან. ეს კი იმის გამოა, რომ 2012 წლიდან ეროვნული გამოცდები საერთოდ არ ემთხვევა სასკოლო პროგრამას," _ ამბობს შაშკინი.
არსებობს თუ არა კორუფციის რისკი ეროვნული გამოცდების სკოლის დონეზე ჩატარების შემთხვევაში – ამ საკითხზე საუბრისას განათლების ყოფილი მინისტრი აღნიშნავს, რომ თუ რეფორმა "მათ მიერ გაწერილი პროგრამის მიხედვით განხორციელდა, გამოცდებზე კორუფციის რისკი ნულოვანი იქნება".
"რეფორმა ბავშვსა და მშობელზე იყო ორიენტირებული და დამატებით მომზადებას გამოცდებისთვის არ საჭიროებდა. მაგრამ ეს იმუშავებს იმ შემთხვევაში, თუ არ მოხდება ის, რაც ახლა სკოლებში საატესტატო გამოცდებთან დაკავშირებით ხდება – ბავშვები საატესტატო გამოცდებს გოჭებით და "ბამბანერკებითაც" რომ აბარებენ. ეს თუ მოხდა ბევრად უარეს შედეგს მივიღებთ, რადგან 17-18 წლის ბავშვისთვის ყველა მნიშვნელოვანია განცდა იმისა, რომ ყველაფერი სამართლიანად ტარდება. თუ ეს განცდა დაირღვა, დაზიანებულ თაობებს მივიღებთ," _ უთხრა "გურია ნიუსს" დიმიტრი შაშკინმა.
