ხვალ, ოზურგეთის რაიონული სასამართლოში განიხილება ადმინისტრაციული სამართალდარღვევის საქმე თენგიზ ყაზაიშვილის მიმართ.
როგორც ჩვენთვისაა ცნობილი, ყაზაიშვილს უკანონო ნადირობას ედავებიან. ამ ინფორმაციას არ ადასტურებს თენგიზ ყაზაიშვილი და ის სასამართლოს დასკვნას ელოდება. ჩვენს მიერ მოპოვებული ინფორმაციით, ბოლო დროს ოზურგეთის მუნიციპალიტეტში დათვი, მგელი და ტურა ხშირად ესხმის თავს შინაურ ცხოველებს.
არაოფიციალური ინფორმაციით, ოზურგეთის მუნიციპალიტეტში დათვის და მგლის მოკვლის შესახებაც საუბრობენ, მაგრამ ამის დამადასტურებელი ინფორმაცია არ არსებობს.
"გარემოს დაცვის ინსპექცია მედავება უკანონო ნადირობას. ჩემს საკარმიდამო ნაკვეთში ამოღებულია ხაფანგი. ეს ხაფანგი უმოქმედო იყო და ზუსტად არც ვიცი როგორ მოხდა იქ. ვიღაცამ მომპარა ეს ხაფანგი და ამის გამო შემექმნა პრობლემები. ნამდვილად ასეა, სამი დღის განმავლობაში ვარკვევდი ხაფანგის ამბებს სოფელში და დარწმუნებული ვარ ჩემს სიმართლეში.
არ ვიცი ვინ დარეკა გარემოს დაცვის ინსპექციაში, მაგრამ ქუთაისიდან იყვნენ ჩამოსულები. ისე მოხდა ჩემს კარმიდამო ნაკვეთიდან ხაფანგის ამოღება, რომ არავის არაფერი არ უთქვამს და არც ვესწრებოდით ამოღების პროცესს", _ გვითხრა თენგიზ ყაზაიშვილმა.
ნელი კორკოტაძე გარემოს დაცვითი ზედამხედველობის დეპარტამენტის მთავარი სახელმწიფო ინსპექტორი, "გურია ნიუსთან" სატელეფონო საუბარში აღნიშნავს:
"2014 წლის 25 ნოემბერს, პიროვნებას სოფელ შემოქმედის ტერიტორიაზე, დათვის დაჭერის მიზნით, ტყეში დაგებული ჰქონდა ხაფანგი. მას ჩამოერთვა ეს ხაფანგი, შედგა ადმინისტრაციული სამართალდარღვევის ოქმი.
ეს სამართალდარღვევა უნდა დაადასტუროს სასამართლომ. სასამართლომ უნდა ცნოს პირი ადმინისტრაციულ სამართალდამრღვევად და მანვე უნდა დააკისროს სახდელი, ან არ დააკისროს და შეწყვიტოს საერთოდ საქმის წარმოება.
ჩვენ მხოლოდ ადმინისტრაციული სამართალდამღვევის ოქმს ვადგენთ, ვურთავთ ყველა იმ ნივთმტკიცებას, რაც მათ ხელთაა არსებული და ა.შ.
ოზურგეთის რაიონული სასამართლო მსჯელობს იმაზე ნამდვილად იყო თუ არა ჩადენილი სამართალდარღვევა და მათ შორის აკრძალული იარაღის გამოყენება. ყაზაიშვილის თქმით, დათვი ხშირად ესხმოდა თავს შინაურ ცხოველებს და მის საკარმიდამოში არსებულ მეურნეობას.
ჩვენი კანონმდებლობა ითვალისწინებს სხვადასხვა რეგულაციებს და მათ შორის ასეთ შემთხვევასაც, როდესაც ხდება გარეული ცხოველის თავდასხმა ადამიანის საცხოვრებელ სახლებზე ან მეურნეობაზე და პირდაპირ არის გარემოს დაცვის მინისტრის ბრძანებით დამტკიცებული ეს რეგულაციები, როგორ უნდა მოხდეს გარეული ცხოველის გარემოდან ამოღება.
თუ გარეული ცხოველი ესხმის და საფრთხეს უქმნის ადამიანის სიცოცხლეს და ჯანმრთელობას ან მის ქონებას ამ საფრთხის აცილება შესაძლებელია თუ ხდება თავდასხმის მომენტში ანუ უშუალოდ იმ მომენტში, როდესაც მას დათვი თავს ესხმოდა მას შეეძლო გაენადგურებინა ანუ მოეკლა და ამის შემდეგ ეთქვა გარემოს დაცვის ზედამხედველობის დეპარტამენტისთვის. იმ შემთხვევაში თუ ეს თავდასხმის მომენტში ვერ მოხდა ან ვერ ხერხდება დათვის ამოღება ბუნებრივი გარემოდან ამ შემთხვევაში სხვა რეგულაცია მუშაობს", _ აღნიშნავს კორკოტაძე და დასძნეს, რომ თუ სასამართლომ ვერ გამოკვეთა რომ აღნიშნულმა პირმა სამართალდარღვევა ჩაიდინა, სასამართლო ადეკვატურ გადაწყვეტილებას მიიღებს.
