“დნმ-ის კვალი ასევე აღმოჩენილია ხალათებსა და ზეწარზეც”

ტელეკომპანია "რუსთავის 2"-ის ინფორმაციით, კონფიდენციალურმა წყარომ მათ ამერიკის გამოძიების ფედერალური ბიუროს დასკვნის კიდევ ერთი ნაწილი მიაწოდა:

_ დასკვნები 2005, 2006 და 2007 წლებით თარიღდება და მათში დეტალურად არის აღწერილი შემთხვევის ადგილი, ყველა ნივთი და ყველა ნივთიერება, რომელიც გამომძიებლებმა ბინაში აღმოაჩინეს. ნივთმტკიცებულებები დეტალურად არის აღრიცხული და დანომრილი. დოკუმენტში ასევე მითითიებულია, რომ ზურაბ ჟვანიასა და რაულ უსუპოვის დნმ-ის კვალი რამდენიმე განსხვავებული ტიპის ნივთზეა აღმოჩენილი. მათ შორის, არის არა მარტო ჭიქა და სიგარეტის ნამწვავი. დნმ-ის კვალი ასევე აღმოჩენილია ხალათებსა და ზეწარზეც, _ იუწყება "რუსთავი 2"

ყოფილი მთავარი პროკურორის მურთაზ ზოდელავას განცხადებით, ამ დასკვნას ზურაბ ჟვანიას ოჯახის წევრები კარგად იცნობენ და მათთვის ცნობილი იყო ის მოტივი, რის გამოც საქმის მასალების ნაწილი გასაიმდუმლოვდა:

 _ ოჯახის სრულწლოვანმა წევრებმა, რა თქმა უნდა, იცოდნენ. ზუსტად ვიცი, რომ ისინი არაერთხელ გაეცნენ ამ მასალას და ზუსტად იციან, მთელი ეს პერიპეტიები, მათ შორის, პირადი ცხოვრების დეტალები, რომელიც იყო მოტივატორი მაშინდელი ხელისუფლებისა, რომ ამ საქმის გარკვეული ნაწილის გასაიდუმლოება მომხდარიყო.

ამ მთელი პერიპეტიების მიუხედავად, ახლაც მიმაჩნია, რომ ეს ადამიანურად სწორი გადაწყვეტილება იყო.

 გოგლა ჟვანია დღეს სადაც არის, იმის გამოა, რომ ეს პროცესები განახორციელა.

ის, ფაქტობრივად, იყო მედროშე ამ მოვლენებისა. ეს მისი პასუხისმგებლობაა, მისი არჩევანია, თუმცა არცთუ პოზიტიური.

მიუხედავად იმისა, რომ ის ესწრებოდა ექსპერტ ლევან ჩაჩუას მიერ განხოციელებულ ამ პროცედურებს, მისი სინდისი არ შეუწუხებია იმას, რომ ეს ადამიანი დააკავეს.

მიუხედავად იმისა, რომ ის თავად უყურებდა, ხედავდა,  მაშინ არ გასჩენია კითხვები. მიუხედავად იმისა, მან ზუსტად იცოდა, რომ დაცვის წევრებმა არათუ კანონი დაარღვიეს, არამედ ადამიანურადაც კი, ჟარგონს გამოვიყენებ, ისინი "არ ჩაჭრილან" დაცვის ობიექტთან _ ბატონ ზურაბთან. როდესაც ეს ადამიანები დააკავეს, მას არც პროტესტი გასჩენია, არც სინდიდის ქენჯნა უგრძვნია, ამიტომ ამ ადამიანის შეფასებები ჩემთვის მნიშვნელოვანი არ არის, _  განაცხადა მურთაზ ზოდელავამ გადაცემა "არჩევანში" საუბრისას.  

ამავე თემაზე: გოგლა ჟვანია: "ეს არ არის ჩემი ოჯახისთვის ახალი"; "ძაძამია ჟვანიას საიდუმლოს იცავდა და ამისთვის სჯიან"