თბილისის მერიის ზედამხედველობის სამსახურის აპარატის ყოფილი უფროსის ჯოკია ბოდოკიას დაკავების ფაქტს თბილისის საკრებულოს ფრაქცია "გაერთიანებული დემოკრატიული მოძრაობის" თავმჯდომარე ზაზა ვეკუა ტელეკომპანია "კავკასიის" ეთერში გამოეხმაურა.
მისი თქმით, სანამ მერიაში იქნება ხალხი, ვინც ვიღაცას რაღაცის სანაცვლოდ ფულს გამოართმევს, ინვესტორების მოძიება ძალიან ძნელი იქნება.
"გაერთიანებული დემოკრატების" წევრი მიიჩნევს, რომ ეს ფაქტი დღევანდელი ხელისუფლების კიდევ ერთი უუნარობა და სირცხვილი იყო.
"ჩვენ ერთსა და იმავე წრეზე დავდივართ. ასევე დაიწყო "ნაციონალურმა მოძრაობამ". კარგად გვახსოვს, მაშინაც სწორედ სასტუმროს თემა იყო და მაშინაც 50 000-ზე იყო საუბარი, როდესაც დეპუტატი კენჭაძე დააკავეს და მასზე გადატყდა ყველაფერი. ახლაც შინაგან საქმეთა სამინისტრომ თუ ყველაფერი იცოდა და ეს ყველაფერი ორგანიზებული ჰქონდა, გასულიყო იმაზე, ვისთანაც მივიდოდა თანხა. იმის ძახილი, რომ ჯოკია ბოდოკია ფულს აიღებდა და საქართველოდან გაქცევას აპირებდა, ჩემი აზრით, არასწორია. ლოგიკით აქამდე მივდივართ, რომ მას თანამზრახველები ჰყავდა.
კარგად ვიცით სქემები, როდესაც ტენდერების ჩაშლა და შემდეგ ერთ პირთან მოლაპარაკება ხდება. ტენდერი ცხადდება, მასში რამდენიმე ფირმა მონაწილეობს, შემდეგ არავის აქვს სურვილი, ეს სამუშაო შეასრულოს და წყდება ყველაფერი ერთ პირთან მოლაპარაკებით. ყოველთვის ვეკითხები მერიის თანამშრომლებს, თუ სად პოულობენ ქალაქში ისეთ ფირმას, რომელიც ხელშეკრულებას დაუდებს და იმ პირობებს დააკმაყოფილებს, რომელიც საქართველოში ვერავინ დააკმაყოფილა.
ტენდერებთან დაკავშირებით ჩვენ ჩვენი შეხედულებები გვაქვს. 16 თებერვალს, 12:00 საათზე ტენდერებეთან დაკავშირებით თბილისის მერიის ორი სამსახური გვყავს დაბარებული. მიგვაჩნია, რომ მათ ჩვენ საკმაოდ მძიმე მასალას მივცემთ," _ განაცხადა ვეკუამ.
