სურსათის უვნებლობის სააგენტოს ინსპექტირების ჯგუფმა 11 და 12 თებერვალს ლანჩხუთის მუნიციპალიტეტის ექვსი საბავშვო ბაღი შეამოწმა და იქ არსებული სანიტარული ნორმების დარღვევისთვის ექვსივე 400-400 ლარით დააჯარიმა.„გურია ნიუსი“ ინფორმაციის გადასამოწმებლად სკოლამდელი სააღმზრდელო ცენტრის ახალ ხელმძღვანელს, დავით წულაძეს დაუკავშირდა, რომელიც კონკრეტულ ინფორმაციას ფაქტთან დაკავშირებით არ ფლობდა.
სსიპ სურსათის უვნებლობის ეროვნული სააგენტოს გურიის რეგიონალური სამმართველოს ინსპექტირების ჯგუფის ხელმძღვანელი გიორგი მიქაძე ინფორმაციას ადასტურებს და აცხადებს, რომ სააგენტო შემოწმებებს მუნიციპალიტეტის სხვა ბაღებშიც გეგმავს.
„გასულ წელს აქცენტი ბაღების შემოწმებაზე გვქონდა გაკეთებული და პერიოდულად ამ სისტემაში არსებულ მდგომარეობას ვსწავლობდით. შედეგად ლანჩხუთის მუნიციპალიტეტის საბავშვო ბაღები შევამოწმეთ, პირველადი რეკომენდაციები მივეცით, რა თქმა უნდა, კანონთან შესაბამისობაში. გამოვლენილი ხარვეზების გამოსასწორებლად ვადაც დავუწესეთ და ახლა ვამოწმებთ, რა გაკეთდა არსებული პრობლემების აღმოსაფხვრელად.
ამ ეტაპისთვის ექვსი ბაღი შევამოწმეთ და 400-400 ლარიანი ჯარიმა გამოვუწერეთ. პერიოდულად მუნიციპალიტეტის სხვა ბაღებშიც შევალთ და თუ იქაც ანალოგიური ვითარება დაგვხვდა, მათ მიმართაც მივიღებთ შესაბამის სანქციებს,“ _ უთხრა „გურია ნიუსს“ გიორგი მიქაძემ.
ჩვენი ინფორმაციით, გასულ წელს სურსათის უვნებლობის ინსპექტირების ჯგუფის მიერ პირველადი შემოწმების შედეგად მიღებული შენიშვნების შესახებ ბაღების მაშინდელმა ხელმძღვანელობამ მუნიციპალიტეტის ხელმძღვანელობა საქმის კურსში ჩააყენა, რომელმაც თავის მხრივ, წერილობით მიმართა სურსათის უვნებლობის სააგენტოს და პირობა მისცა, 2015 წლის ბიუჯეტში ბაღებში ხარვეზების აღმოსაფხვრელად თანხებს გაითვალისწინებდა.
თუმცა, რეალურად ბიუჯეტის ფორმირებისას ეს პრობლემა არავის გახსენებია, თუ არ ჩავთვლით იმას, რომ ოთხ ადმინისტრაციულ ერთეულში არსებული საბავშვო ბაღების სრული რეაბილიტაციაა გათვალისწინებული.
