“ვერ გვისრულებს მოვალეობას თოვლში, ტალახში და ისეთ ადგილებში”

ჩოხატაურის მუნიციპალიტეტმა სამხედრო აღრიცხვისა და გაწვევის სამსახურისა და გამგეობის სოციალურ საკითხთა და კულტურის სამსახურისათვის სამგზავრო ტრანსპორტის მძღოლთან ერთად დაქირავების მომსახურების შესყიდვაზე ტენდერი რამდენიმე დღის წინ გამოაცხადა, რომლის სავარაუდო ღირებულებად 8 500 ლარია განსაზღვრული.

დოკუმენტის თანახმად, ამ თანხაში "მგზავრთა გადაყვანა უნდა მოხდეს არა უმეტეს 20 კაცის ტევადობის მიკროავტობუსებით. მარშუტით _ ჩოხატაური-თბილისი-ჩოხატაური _ 20 ბრუნი, ჩოხატაური- ოზურგეთი-ჩოხატაური _ 8 ბრუნი."

სამხედრო აღრიცხვისა და გაწვევის სამსახურს საკუთარ ბალანსზე ერთი მიკროავტობუსი 2010 წლიდან ჰყავს, თუმცა, როგორც გავარკვიეთ ამჟამად გაფუჭებულია:

_ ახლა სამსახურის ეზოში დგას. ამ წუთში გაფუჭებულია, წვრილმანი რაღაცეები უნდა და ჩავაყენებთ, ალბათ, მალე მწყობრში, _ გვითხრა აღნიშნული სამსახურის უფროსმა ვახტანგ მეფარიშვილმა.

_ როგორც გვითხრეს, დიდი ხანია გაფუჭებულია. რა დაემართა?

_ არაფერი ისეთი. დინამოა, "ჩოთქი" თუ აკუმულატორი გაფუჭებული, ჯერ ვერ დავაზუსტეთ. ვეღარ მოვიცალეთ, გაწვევის პროცესში ვართ.

მეფარიშვილის თქმით, მაშინ როცა მიკროავტობუსი მუშაობდა, წვევამდელების გადაყვანისთვის მიკროავტობუსს მაინც ქირაობდნენ:

_ ვქირაობთ. ეს მიკროავტობუსი რვაკაციანია და არ გვყოფნის _ ჩვენ ათი კაცი სულ გვყავს და მერე ჯარიმას გვიწერენ.

_ თუ არ გყოფნიდათ, რატომ იყიდეთ ან მისი მოვლა-შენახვისთვის ყოველთვიურად თანხას რატომ ხარჯავთ?

_ მე არ მიყიდია, დამხვდა, უფროსად რომ გადმოვედი.

_ ეგ ვიცით და ისიც გვახსოვს 2012 წლის საპარლამენტო არჩევნების წინ, როცა თქვენ უფროსის მოვალეობის შემსრულებელ იყავით, ამ მიკროავტობუსით "ნაციონალების" კოორდინატორები და მომხრეები გადაჰყავდათ საარჩევნო უბნებზე…

_ მაგას ნამდვილად ვერ გეტყვით, ვინ და სად გადაყავდათ. სამსახურისთვის კი ვიყენებდით ადგილზე, _ გვითხრა მეფარიშვილმა, რომელმაც დაზუსტებით არ იცის, რა თანხა იხარჯება ყოველ თვეში მიკროავტობუსის მოვლა-პატრონობისთვის:

_ ალბათ, დადგება სხვაგან გადაყვანის საკითხი. თოვლში ვერ გვისრულებს მოვალეობას, ტალახში და ისეთ ადგილებში _ სოფლებში ხომ გაქვს საქმე გაწვევასთან დაკავშირებით? პირადად თუ არ წავალ, თანამშრომლები წავლენ, ან ერთად წავალთ, მაგრამ ეგ მიკროავტობუსი ერთხიდიანია და არ ვარგა, _ აღნიშნავს ვახტანგ მეფარიშვილი.

"გურია ნიუსმა" გაარკვია, რომ 2010 წელს 9 926 ლარად შეძენილი "თოვლში, ტალახში და ისეთ ადგილებში გამოუსადეგარი" მიკროავტობუსისთვის ყოველთვიურად საშუალოდ 275 ლარი იხარჯება. ეს იმ დროს, როცა წვევამდელების გადასაყვანად სამსახური მიკროავტობუსს ქირაობდა დამატებით.

_ მიკროავტობუსი, რომელიც ერთადერთი სატრანსპორტო საშუალებაა სამხედრო აღრიცხვისა და გაწვევის სამსახურში, დელეგირებული სატრანსპორტო თანხით შეძენილი იქნა რამდენიმე წლის წინ. ხშირად მისი ტევადობა არ შეესაბამება გადასაყვან წვევამდელთა რაოდენობას. გარდა ამისა, ამ ავტომობილს ვიყენებთ მუნიციპალიტეტის სხვა და სხვა საჭიროებისათვის, ამიტომაც ბიუჯეტში გათვალისწინებული უნდა იყოს მოვლა-შენახვის თანხა, _ აღნიშნავს ჩვენთან საუბრისას ჩოხატაურის მუნიციპალიტეტის გამგებელი ირაკლი კუჭავა.

კითხვაზე, როგორ დაადგინეს წინასწარ, რომ 20 რეისია საჭირო და არა 24 ან რის საფუძველზე აკონკრეტებენ ქალაქებს, გამგებელი გვპასუხობს, რომ სატენდერო წინადადებაში სავარაუდო მარშუტების რაოდენობა მიუთითეს:

_ ეს არის სავარაუდო თანხა და სავარაუდო მარშრუტების რაოდენობა, სატენდერო წინადადებაშიც ასეა მითითებული. წლის განმავლობაში ანაზღაურება მოხდება ფაქტობრივად შესრულებული მომსახურეობის შესაბამისად წარმოდგენილი დოკუმენტაციის საფუძველზე, _ გვითხრა გამგებელმა.