განათლების სამინისტროს ბოლოდროინდელმა გადაწყვეტილებებმა სტუდენტებისა და მეცნიერების კმაყოფილება გამოიწვია. განათლების მინისტრმა სამეცნიერო სექტორში დასაქმებულ ადამიანებს 2015 წლის პირველი იანვრიდან ხელფასის 2,5 -ჯერ გაზრდის შესახებ ახარა. მეორე სასიხარულო სიახლის შესახებ, რომელიც სტუდენტების სტატუსს შეეხება, საზოგადოებამ რამდენიმე დღის წინ განათლებისა და მეცნიერების მინისტრის მრჩევლისგან შეიტყო.
"სხვადასხვა უნივერსიტეტების ხელმძღვანელებთან მსჯელობის შედეგად, მივიღეთ გადაწყვეტილება და ჩამოვყალიბდით შემდეგ ფორმულირებაზე _ სტუდენტს სტატუსს არ შეუჩერებენ", _ განაცხადა ოთარ აბესაძემ გასულ კვირას `ბანკები და ფინანსებისთვის" მიცემულ ინტერვიუში.
თუ მეცნიერთა ხელფასების ნაწილში ყველაფერი ნათელია, სტუდენტების სტატუსთან დაკავშირებით, საზოგადოებაში უამრავი კითხვა გაჩნდა. კერძოდ, მოხდება თუ არა სტუდენტის სწავლის დაფინანსება და როგორ მოგვარდება პრობლემა იმ სტუდენტების შემთხვევაში, რომლებსაც სწავლის საფასურის გადაუხდელობის გამო სტუდენტის სტატუსი უკვე შეჩერებული აქვთ? დამატებითი განმარტება განათლებისა და მეცნიერების მინისტრის მრჩეველმა ოთარ აბესაძემ "მთავარი ინფოსთან" გააკეთა.
_ ეს პროგრამა რამდენიმე წელია მოქმედებს, მაგრამ ახლა უფრო დაიხვეწა. სტუდენტს, რომელიც სწავლობს უნივერსიტეტში და მისი სწავლის საფასური, პირობითად, 2250 ლარია, უნივერსიტეტის წინაშე აღებული ვალდებულებები რომ შეასრულოს და რეგისტრაციაზე პრობლემები არ შეექმნას, სემესტრულად 1125 ლარი ანუ წლიურად 2250 ლარი უნდა გადაიხადოს. ამიერიდან, სტუდენტს შეეძლება თავიდან აირიდოს ბანკთან ურთიერთობა, საბანკო პროცენტები და პირდაპირ, ადმინისტრაციას მოთხოვოს გადახდის გრაფიკი. კერძოდ, წლიური გადასახადის 4 ეტაპად, 6 ეტაპად, 8 ეტაპად და მაქსიმუმ, გამონაკლისის სახით, 10 ეტაპად დაყოფა. პირობითად, 10 ეტაპით დაყოფის შემთხვევაში, სტუდენტი სექტემბრიდან ივნისის ჩათვლით, თვეში მხოლოდ 225 ლარს გადაიხდის. აბსოლუტურად სტანდარტული და გამარტივებული პროცედურაა, ყოველგვარი პროცენტების გარეშე.
_ უმუშევარმა სტუდენტმა შეიძლება, ყოველთვიური 225 ლარის გადახდაც ვერ მოახერხოს. ასეთ შემთხვევაში რა მოხდება?
_ უნივერსიტეტის წინაშე აღებული ვალდებულების შესრულება ნებისმიერ შემთხვევაში უნდა მოხდეს. ზემოთხსენებული სქემის უპირატესობა იმაში მდგომარეობს, რომ აცილებულია ბიუროკრატიული და საბანკო პროცედურები. ინფორმაცია, რომ სტუდენტს სტატუსს აღარ შეუჩერებენ, არასწორად იყო აღქმული ჟურნალისტის მხრიდან. რიგ შემთხვევებში შეიძლება მოხდეს უფრო მეტ პერიოდზე გადავადება, მაგრამ აღებული ვალდებულება უნდა დაფაროს, ოღონდ ყოველგვარი საპროცენტო განაკვეთების გარეშე. რაც სერიოზული შეღავათია.
_ გადასახადის მომდევნო წლისთვის გადატანა შესაძლებელია?
_ ეს უკვე უშუალო და ინდივიდუალური შეთანხმების საგანია სტუდენტსა და უმაღლესი სასწავლებლის ადმინისტრაციასა და რექტორატს შორის და არა ჩვენი, სამინისტროსი.
_ იმ სტუდენტების შემთხვევაში, რომლებსაც სწავლის საფასურის გადაუხდელობის გამო სტატუსი უკვე შეუჩერდათ, რაიმე შეღავათი იმოქმედებს?
_ იმ სტუდენტებს, რომლებსაც სტატუსი უკვე შეჩერებული აქვს, შეუძლიათ წლის დასაწყისამდე ანუ აგვისტომდე აღიდგინონ სტატუსი, რაღაც სიმბოლური თანხა შეიტანონ და რომელ კურსზეც ისწავლიან, იმ წლის გრაფიკის ეტაპობრივად გადახდა დაიწყონ. თუ უნივერსიტეტი ათეტაპიან გრაფიკს შეუდგენს, სტუდენტს ექნება საშუალება, რომ სექტემბრიდან ივნისის ჩათვლით თვეში 225 ლარი შეიტანოს. ოღონდ გრაფიკი არ უნდა დაარღვიოს, თორემ სტატუსი ისევ შეუწყდება. უნივერსიტეტის წინაშე აღებული ვალდებულებების შესრულება ნებისმიერ შემთხვევაში უნდა მოხდეს.
