შს მინისტრის მოადგილე არჩილ თალაკვაძემ “გურია ნიუსის“ რამდენიმე კითხვას გასცა პასუხი. თალაკვაძე ამბობს, რომ ამ ეტპზე გურიის სამხარეო მთავარ სამმართველოში საკადრო ცვლილებები არ იგეგმება. მისი კომენტარი სამმართველოს უფროსის გიორგი მდინარაძის ე.წ. კორტების სპეცოპერაციაში მონაწილეობის და მისი დაკითხვის შესახებ ასეთია:
_ამ ეტაპზე, ზუსტად შემიძლია გითხრათ, რომ არანაირი საკადრო ცვლილებები მოსალოდნელი ნამდვილად არ არის.
ბოლო დროს ბევრი განცხადება გაკეთდა საზოგადოების მხრიდან, ასევე, ჩვენი მხრიდან აღნიშნულ საქმეში პოლიციელების ჩართულობასთან დაკავშირებით. ეს შეკითხვები რომ მოხსნილიყო, სადაც ოდნავ მაინც სფუძვლიანი იყო ეს განცხადებები, თანამდებობის პირები გადადგნენ, რომ შემდეგ ხელი არ შეეშალათ გამოძიებისთვის. მინისტრის მიდგომაა ასეთი, რომ თუ გამოძიების დასრულებისას განთავისუფლებული პირების უდანაშაულობა დადასტურდება, შესაძლოა, ისევ აღადგინონ სამსახურში. მანამდე კი, გამოძიებას ხელი არაფერმა უნდა შეუშალოს. კონკრეტულ პირთან დაკავშირებით ვერ გიპასუხებთ, თუმცა ვინც არ უნდა იყოს ის, თუკი ბრალი დაუმტკიცდება და სამსახურებრივი გადაცდომა აქვს, დატოვებს სამსახურს და დაისჯება.
_რატომ ჭიანურდება სახელმწიფო უსაფრთხოების სააგენტოს გურიის სამსახურის უფროსის დანიშვნა?
_ ბატონი ვახტანგ გომელაური, სწორედ ამ სფეროს კურირებდა, ამ მიმართულებით ძალიან გამოცდილი პროფესიონალია, და დარწმუნებული ვარ, სათანადო კადრს შეარჩევს ამ პოზიციაზე. კონკრეტულად ვინ დაინიშნება, ჩემთვის უცნობია.
_როგორ შეაფასებდით გურიაში პოლიციის საქმიანობას, როცა რამდენიმე მძიმე გაუხსნელი დანაშაულია, რომელთა შესახებ “გურია ნიუსი“ არაერთხელ წერდა?
_ დანაშაულის გახსნის სტატისტიკა, ცხადია, გვაქვს და შემიძლია გაჩვენოთ; ძველ გაუხსნელ დანაშაულობებს კი გადავამოწმებ, რა მდგომარეობაა ამ კუთხით და შემიძლია შემდეგ გაგცეთ პასუხი; ჩამომიწერეთ და მომაწოდეთ კონკრეტული საქმეები და ვეცდებით, რომ ასევე კონკრეტულად გიპასუხოთ ყველა საქმესთან დაკავშირებით.
_ ბატონო არჩილ, სხვადასხვა დროს, “ გურია ნიუსის“ ჟურნალისტებისთვის მუშაობაში ხელშეშლის ან შეურაცხყოფის მიყენების გამო, რამდენიმე სისხლის სამართლის საქმე აღიძრა. არც ერთი გამოძიება ბოლომდე არ მისულა და არც არავინ დასჯილა. გაქვთ თუ არა ინფორმაცია ამასთან დაკავშირებით?
_ კი, ბატონო, მოვიძიებთ ამ მასალებს აუცილებლად და ამაზეც გაგცემთ პასუხს.
