"გაერთიანებული დემოკრატიული მოძრაობის" ოზურგეთის ორგანიზაციის თავმჯდომარე და ოზურგეთის საკრებულოს წევრი, თამარ ნადირიძე, ქალაქ ოზურგეთის მერისა და თანამშრომლების მისამართით განცხადებას აკეთებს და აღნიშნავს, რომ ისინი განსხვავებული აზრის დისკრედიტაციას ეწევიან.
"მინდა ჩემი პოზიცია დავაფიქსირო სოციალურ ქსელებში ოზურგეთის მერიის თანამშრომლებისა და მერიის დაქვემდებარებაში მყოფი ორგანიზაციების წარმომადგენელთა მხრიდან ბოლო დროს გახშირებულ დაპირისპირებებზე ოპოზიციონერ საკრებულოს წევრებთან, ჟურნალისტებთან და უბრალო ადამიანებთან, რომლებიც მერისათვის არასასურველ ინფორმაციას ავრცელებენ.
ზემოხსენებულ მოვლენებს სათავე დაუდო თავად მერის მიერ 2014 წლის 26 დეკემბერს ოზურგეთის საკრებულოს სხდომაზე ჩემს მიმართ საჯაროდ გამოთქმულმა პრეტენზიამ სოციალურ ქსელში გავრცელებულ მოსაზრებებზე. ამავე მოვლენებთან აშკარა კავშირშია იგივე სხდომაზე მერიის თანამშრომლების მობილიზაცია, რასაც შედეგად მოყვა მათი საჯარო დაპირისპირება საკრებულოს ოპოზიციონერ დეპუტატთან.
ოზურგეთში არსებული ზოგადი სიტუაციის გაანალიზებით ნათელია, რომ ამგვარი საქციელი მერის მხრიდან წახალისებისა და ორგანიზების გარეშე შეუძლებელია. ასევე ნათელია, რომ მერი ნებისმიერი საშუალებებით ცდილობს შეავიწროვოს განსხვავებული აზრის მქონე ადამიანები. არსებულ სიტუაციაში გასარკვევად საკმარისია თვალი გადაავლოთ მერიის თანამშრომლების მიერ ბოლო თვეებში სოციალურ ქსელებში გამოქვეყნებულ მასალას, რომელთა ერთობლიობიდან ნათლად ირკვევა, რომ მერისა და მასთან დაახლოებული პირების მიერ შექმნილია არაფორმალური ჯგუფი, რომელიც მიზანმიმართულად ეწევა განსხვავებული აზრის ადამიანების დისკრედიტაციას.
ახალი არ არის ის, რომ ოზურგეთის მერს მის პოლიტიკურ ოპონენტებთან, პრესასთან და საზოგადოებასთან ლეგიტიმური ოპონირების და ურთიერთობის არც სურვილი და არც რესურსი არ გააჩნია, შესაბამისად ასეთი გზით ცდილობს მისთვის მეტად მტკივნეული და არასასურველი პროცესები არაფორმალურ საზოგადოებისათვის ნაკლებად თვალსაჩინო და ემოციებით გადატვირთულ ფორმაში გადაიტანოს.
მინდა განვაცხადო, რომ მერიის დაფინანსებაზე მყოფი ადამიანებისაგან ნებისმიერი სახის არაფორმალური ჯგუფის შექმნა და მისი საშუალებით საზოგადოებრივ ან პოლიტიკურ პროცესებზე ზემოქმედება არის უკანონო და დაუშვებელი. ასევე მინდა განვაცხადო რომ ამ ჯგუფის მოქმედებებზე, პასუხისმგებლობა მთლიანად ეკისრება ოზურგეთის მერს.
მივმართავ ყველას ვისაც ევალება ან ხელეწიფება არსებულ არანორმალურ სიტუაციაზე მოახდინოს დადებითი ზეგავლენა, განსაკუთრებული ყურადღებით და დაუყოვნებლივ შეისწავლონ ოზურგეთის მერისა და მერიის დაფინასებაზე მყოფი ადამიანებისაგან შექმნილი არაფორმალური ჯგუფის მოღვაწეობა და აღკვეთონ მერის უკანონო მოქმედებები."
ქალაქ ოზურგეთის მერიის პრესსამსახურში აღნიშნულთან დაკავშირებით ასეთ კომენტარს აკეთებენ:
"ქალბატონი თამილას სერიულ სიზმრებზე, კომენტარის გაკეთება არასერიოზული გვეჩვენება. ქალმა, რომელმაც თანამდებობა პოსტების ლეგიტიმაციისათვის დატოვა, ვთვლით, რომ მერიის მხრიდან არანაირ შეფასებასა და კომენტარს არ იმსახურებს."
