განათლების საერთაშორისო ცენტრი 2015-2016 სასწავლო წლისთვის 115 სტუდენტის დაფინანსებას გეგმავს.
საზღვარგარეთ სამაგისტრო და სადოქტორო პროგრამებზე და საჯარო დაწესებულებაში დასაქმებულ პირთათვის კვალიფიკაციის ამაღლებისა და გადამზადების პროგრამებზე სწავლის გაგრძელების მსურველთა განაცხადების მიღებას ცენტრი 20 მარტიდან დაიწყებს, რაც 15 მაისის ჩათვლით გაგრძელდება.
2015-2016 სასწავლო წლისთვის პირველი კონკურსი 2014 წლის 3 ნოემბრიდან 19 დეკემბრის ჩათვლით ჩატარდა, რომლის შედეგადაც 10 კონკურსანტის სწავლა დაფინანსდა.
განათლების საერთაშორისო ცენტრში ამ ეტაპზე ხორციელდება საერთაშორისო სამაგისტრო და სადოქტორო პროგრამა, რომელიც უცხოეთის უნივერსიტეტების სამაგისტრო და სადოქტორო პროგრამებზე სწავლის კონკურსის წესით დაფინანსებას გულისხმობს; ასევე, ცენტრი ახორციელებს საჯარო დაწესებულებაში დასაქმებულ პირთა კვალიფიკაციის ამაღლებისა და გადამზადების პროგრამას, რომელიც, საჯარო სამსახურის მაღალკვალიფიციური კადრებით უზრუნველყოფის მიზნით, კონკურსის წესით საჯარო დაწესებულებაში დასაქმებულ პირთათვის კვალიფიკაციის ასამაღლებელი კურსებისა და გადამზადების პროგრამების დაფინანსებას ითვალისწინებს.
უახლოეს მომავალში უნივერსიტეტების კონსორციუმის პროგრამის დამტკიცება იგეგმება, რაც ქართველ სტუდენტებს საშუალებას მისცემს, ხელსაყრელი პირობებით მიიღონ უცხოური განათლება მსოფლიოს წამყვან უნივერსიტეტებში.
განათლების საერთაშორისო ცენტრმა, რომელიც 2014 წელს შეიქმნა, უცხოეთის წამყვან უნივერსიტეტებში 88 ქართველი სტუდენტის სწავლა უკვე დააფინანსა. ცენტრის საქმიანობის შესახებ მუდმივ რეჟიმში იღებს ინფორმაციას საქართველოს პრემიერ-მინისტრი. ირაკლი ღარიბაშვილი მიიჩნევს, რომ ქვეყანას სჭირდება კვალიფიციური კადრები, რომლებსაც საერთაშორისო სტანდარტების შესაბამისი ცოდნა და უნარ-ჩვევები ექნებათ.
გთავაზობთ, ხშირად დასმულ კითხვებს, რომელიც განათლების საერთაშორისო ცენტრის ვებგვერდზე შესაბამის რუბრიკაშია განთავსებული.
სად უნდა გავიაროთ რეგისტრაცია?
რეგისტრაცია შეგიძლიათ გაიაროთ შემდეგ ელ. მისამართზე: http://www.iec.gov.ge/
სად მოხდება სამაგისტრო და სადოქტორო პროგრამებზე სწავლის დაფინანსება? მხოლოდ საზღვარგარეთ თუ ასევე საქართველოში?
„განათლების საერთაშორისო ცენტრის“ პროგრამა გულისხმობს სწავლის დაფინანსებას მხოლოდ საზღვარგარეთის უმაღლეს საგანმანათლებლო დაწესებულებების სამაგისტრო და სადოქტორო პროგრამებზე, გარდა დისტანციური (დაუსწრებელი) სწავლების საგანმანათლებლო პროგრამებისა.
აქვს თუ არა მნიშვნელობა რომელ სასწავლებლიდან მივიღებ ჩარიცხვის წერილს?
„განათლების საერთაშორისო ცენტრის“ პროგრამის ფარგლებში 2014-2015 სასწავლო წლისათვის გამოცხადებული კონკურსი გულისხმობს სწავლის დაფინანსებას შესაბამისი უცხო ქვეყნის კანონმდებლობით აღიარებულ უმაღლეს საგანმანათლებლო დაწესებულებაში, პრიორიტეტული მიმართულებების სამაგისტრო ან სადოქტორო პროგრამებზე. პროგრამა უმაღლეს საგანმანათლებლო დაწესებულებების მხრივ შეზღუდვებს არ ითვალისწინებს.
რომელ მიმართულებებზე მოხდება საზღვარგარეთ სწავლის დაფინანსება?
პრიორიტეტული მიმართულებები, შესაძლოა, შეიცვალოს წლიდან-წლამდე. ცვლილება დამოკიდებულია ქვეყნის პროფესიული საჭიროებებისა და ჩატარებული მოკვლევის შედეგებზე. 2015-2016 აკადემიური წლისათვის პრიორიტეტული მიმართულებები იქნება: აგრარული; განათლება; ინჟინერია; საბუნებისმეტყველო მეცნიერებები; სოციალური მეცნიერებები; ჰუმანიტარული მეცნიერებები;
რა საკონკურსო ეტაპებია გასავლელი?
კონკურსის შედგება შემდეგი ეტაპებისგან: კონკურსის ვადებში ელექტრონულ სისტემაში დარეგისტრირება და სააპლიკაციო ფორმის შევსება; აპლიკაციის ფორმალური და შინაარსობრივი შემოწმება შესაბამისი ქულის მოსაპოვებლად; კომისიასთან გასაუბრება აპლიკაციის შერჩევის პროცესში წარმატების შემთხვევაში. კონკურსში მონაწილეობის მისაღებად დეტალური ინფორმაცია შეგიძლიათ იხილოთ “განათლების საერთაშორისო ცენტრის“ ოფიციალურ ვებგვერზე: http://www.iec.gov.ge/
მიიღებს თუ არა „განათლების საერთაშორისო ცენტრი“ მონაწილეობას სტუდენტის უცხოეთის უნივერსიტეტში ჩარიცხვის პროცედურებში?
უცხოეთის უნივერსიტეტში მიღების პროცედურებს კანდიდატი დამოუკიდებლად გადის. პროგრამა არ ითვალისწინებს აღნიშნული პროცედურებში კანდიდატისთვის ხელშეწყობას. შესაბამისად, კონკურსში მონაწილეობის მიზნით თავად უნდა შეარჩიოთ უმაღლესი სასწავლებელი, შეავსოთ უნივერსიტეტის სააპლიკაციო ფორმა და დააკმაყოფილოთ თქვენ მიერ შერჩეული უნივერსიტეტის მოთხოვნები.
რამდენჯერ შეიძლება გამოცხადდეს კონკურსი?
„განათლების საერთაშორისო ცენტრი“ პროგრამის ფარგლებში უცხოეთში სამაგისტრო და სადოქტორო პროგრამებზე სწავლის დაფინანსების მოსაპოვებლად კონკურსი 2015-2016 წლისათვის 2-ჯერ გამოცხადდება.
ითვალისწინებს თუ არა პროგრამა სამაგისტრო ან სადოქტორო პროგრამების მეორე ან მომდევნო კურსების დაფინანსებას?
„განათლების საერთაშორისო ცენტრის“ პროგრამის კონკურსში მონაწილეობის მიღება შეუძლიათ სამაგისტრო ან სადოქტორო პროგრამების მეორე ან მომდევნო კურსის სტუდენტებს. ამ შემთხვევაში აგრეთვე უნდა წარმოადგინონ განვლილი სასწავლო წლის შეფასება და ცნობა სტუდენტის სტატუსის შესახებ. კონკურსი ცხადდება კონკრეტული აკადემიური წლისათვის და შესაბამისად დაფინანსება გაიცემა უახლოესი მომავალი აკადემიური წლისათვის. რექტორიალურად, განვლილი წლის დაფინანსების საკითხი პროგრამის ფარგლებში არ განიხილება.
როგორ ხდება საბუთების მიღება?
„განათლების საერთაშორისო ცენტრის“ პროგრამის კონკურსში მონაწილეობის მიღება შეუძლიათ სამაგისტრო ან სადოქტორო პროგრამების მეორე ან მომდევნო კურსის სტუდენტებს. ამ შემთხვევაში აგრეთვე უნდა წარმოადგინონ განვლილი სასწავლო წლის შეფასება და ცნობა სტუდენტის სტატუსის შესახებ. კონკურსი ცხადდება კონკრეტული აკადემიური წლისათვის და საბუთები აპლიკაციასთან ერთად მიიღება ელექტრონულად. კერძოდ, კონკურსანტი აპლიკაციის შევსებისას დოკუმენტებს PDF ფორმატით ატვირთავს სააპლიკაციო ფორმაზე. აპლიკანტმა სრულყოფილად უნდა შეავსოს განაცხადი და უკლებლივ წარმოადგინოს მოთხოვნილი დოკუმენტები. წინააღმდეგ შემთხვევაში აპლიკაცია ავტომატურად ჩაითვლება არასრულად და არ განიხილება. ამასთან, აპლიკანტი ვალდებულია თვითონ შეამოწმოს აპლიკაციის სისრულე და საბუთების შესატყვისობა.
რა ენაზე უნდა იყოს წარმოდგენილი სამოტივაციო წერილი, რეკომენდაციები და სხვა საჭირო დოკუმენტები?
კონკურსანტი აპლიკაციაში მოცემულ ყველა ველს ავსებს ქართულ ენაზე. დოკუმენტაცია, რომლის დედანი მოპოვებულია ინგლისურ ენაზე, კონკურსანტს შეუძლია პირდაპირ ატვირთოს სააპლიკაციო ფორმაზე. რაც შეეხება სხვა უცხოურ ენაზე შედგენილ დოკუმენტაციას, სააპლიკაციო ფორმაზე უნდა ატვირთოს ოფიციალურ თარგმანთან ერთად.
შესაძლებელი იქნება თუ არა მოთხოვნილი საბუთების ფოსტით ან სხვა ფორმით წარმოდგენა?
განაცხადების მიღება სხვა ფორმით არ წარმოებს. ელექტრონული რეგისტრაციის დროს სააპლიკაციო ფორმაზე უნდა ატვირთოს კონკურსანტმა ყველა საჭირო დოკუმენტი pdf ფორმატით.
თუ უნივერსიტეტებიდან ჩარიცხვის თაობაზე აპლიკანტი პასუხს ელოდება საბუთების შემოტანის ვადის გასვლის შემდეგ, როგორ უნდა მოიქცეს?
აპლიკანტი დაფინანსების აპლიკაციის შემოტანას შეძლებს მომდევნო კონკურსის ფარგლებში.
უზრუნველყოფს თუ არა „განათლების საერთაშორისო ცენტრი“ უცხო ქვეყნის უმაღლეს საგანმანათლებლო დაწესებულებებში ბაკალავრიატის საგანმანათლებლო პროგრამაზე სწავლის დაფინანსებას?
პროგრამა არ ითვალისწინებს უცხო ქვეყნის უმაღლეს საგანმანათლებლო დაწესებულებებში ბაკალავრიატის საგანმანათლებლო პროგრამაზე სწავლის დაფინანსებას. შესაბამისად კონკურსის ფარგლებში არ მიიღება ახალი აპლიკაციები ბაკალავრიატის სწავლის დაფინანსების მოთხოვნის შესახებ.
აღნიშნული შეზღუდვა არ ეხება გასულ სასწავლო წლებში პროგრამა „ცოდნის კარის“ ფარგლებში დაფინანსებულ იმ პირებს, რომლებსაც ესაჭიროებათ მომდევნო სასწავლო წლის დაფინანსება.
ეხება თუ არა საზღვარგარეთ სწავლის დაფინანსება ბაკალავრიატის დამამთავრებელი კურსის სტუდენტებს?
„განათლების საერთაშორისო ცენტრის“ პროგრამის ერთ-ერთი მთავარი საკონკურსო მოთხოვნაა კონკურსში მონაწილეს უკვე მინიჭებული ჰქონდეს ბაკალავრის აკადემიური ხარისხი. ბაკალავრიატის დამამთავრებელ კურსზე მყოფ სტუდენტებს საშუალება ეძლევათ მონაწილეობა მიიღონ მომდევნო კონკურსში.
თუ სტუდენტი ბაკალავრიატის საფეხური ახლახანს დაამთავრა და ვერ ახერხებს დიპლომის აღებას ცენტრის მიერ გამოცხადებულ სარეგისტრაციო ვადაში, როგორ უნდა მოიქცეს?
„განათლების საერთაშორისო ცენტრის“ მიერ გამოცხადებული სამაგისტრო პროგრამის ერთ-ერთი მთავარი კრიტერიუმია კონკურსში მონაწილეს უკვე მოპოვებული ჰქონდეს ბაკალავრის აკადემიური ხარისხი. თუ აპლიკანტი კონკურსის ვადებში ვერ ახერხებს დიპლომის აღებას, შეუძლია წარმოადგინოს ცნობა აკადმეიური ხარისხის მინიჭების შესახებ.
რამდენად არის შესაძლებელი სოციალურად დაუცველმა სტუდენტებმა, იძულებით გადაადგილებულმა ან შშმ პირებმა მიიღოს საზღვარგარეთ სწავლის დაფინანსება?
„განათლების საერთაშორისო ცენტრის“ პროგრამის ფარგლებში დაფინანსების მოთხოვნით შეუძლიათ მოგვმართონ სოციალურად დაუცველი სტატუსის მქონე, იძულებით გადაადგილებულმა და შშმ პირებმა, რომელიც აკმაყოფილებს საკონკურსო კრიტერიუმებსა და პირობებს.
წარმოადგენს თუ არა 3.0 GPA პროგრამაში მონაწილეობის აუცილებელ პირობას?
ერთერთ მთავარ საკონკურსო პირობას წარმოდგენს მაღალი აკადემიური მოსწრება. კერძოდ, საბაკალავრო პროგრამაზე ან უცხო ქვეყნის უნივერსიტეტში პრიორიტეტული საგანმანათლებლო პროგრამული მიმართულებების შესაბამის სამაგისტრო პროგრამის განვლილი სასწავლო წლის GPA მინიმუმ – 3.0, ან შესაბამისი ქულა განსხვავებულ შეფასების სისტემის შემთხვევაში.
შესაბამისად, სადოქტორო პროგრამის შემთვევაში სამაგისტრო პროგრამაზე სწავლის შედეგად GPA მინიმუმით – 3.0 ან/და შესაბამისი ქულა განსხვავებულ შეფასების სისტემის შემთხვევაში. ან უცხოეთის უნივერსიტეტის სადოქტორო პროგრამაზე განვლილი სასწავლო წლის GPA მინიმუმ – 3.0 ან/და აკადემიური წარმატებულობის შესახებ ანგარიშის/დახასიათების არსებობა.
თუ კანდიდატი შეფასებულია GPA შეფასების სისტემისგან განსხვავებული შეფასების სისტემით, როგორ უნდა მოახერხოს აკადემიური მოსწრების შესახებ საკონკურსო პირობის დაკმაყოფილება?
განსხვავებულ შეფასების სისტემის შემთხვევაში პროგრამის მონაწილემ უნდა წარმოადგინოს GPA მინიმუმ – 3.0 შესაბამისი ქულა სასწავლებლის მიერ გაცემული ცნობის საშუალებით.
ითვალისწინებს თუ არა „განათლების საერთაშორისო ცენტრის“ პროგრამა აკადემიური პროგრამების მოსამზადებელი კურსების დაფინანსებას?
„განათლების საერთაშორისო ცენტრი“ არ ითვალისწინებს მოსამზადებელი კურსების ორგანიზებას ან მათ დაფინანსებას.
როგორია დაფინასნების გაცემის წესი?
დაფინანსება გაიცემა ერთი აკადემირი წლისთვის სრულად ან ნაწილობრივ.
რა ხარჯების ანაზღაურდება გამოყოფილი დაფინანსების ფარგლებში?
დაფინანსება გულისხმობს სწვალის საფასურის, სწავლასთან დაკავშირებულ ხარჯებისა და სწავლის პერიოდში უცხო ქვეყანაში ცხოვრებასთან დაკავშირებული ხარჯების ანაზღაურებას.
როგორ ხდება საჭირო ხარჯების შესახებ კომისიის მოთხოვნის დასაბუთება?
კონკურსანტმა სწავლის საფასურის მოთხოვნის შემთხვევაში უნდა წარმოადგინოს სასწავლების მიერ გაცემული ოფიციალური ცნობა/ინვოისი სწავლის საფასურის ოდენობის შესახებ. ხოლო უცხო ქვეყანაში ცხოვრებასთან დაკავშირებული ხარჯების ანაზღაურების მოთხოვნის შემთხვევაში კონკურსანტი თავად განსაზღვრავს აუცილებელ მოსალოდნელ ხარჯებს ხარჯის ტიპის (კვების, მგზავრობის და ა.შ ხარჯები) მიხედვით.
რა პრინციპით განსაზღვრავს კომისია უცხო ქვეყანაში ცხოვრებასთან დაკავშირებული ხარჯების დაფინანსების ოდენობას?
კომისია უცხო ქვეყანაში ცხოვრებასთან დაკავშირებული ხარჯების ოდენობის განსაზღვრის დროს მხედველობაში მიიღებს კონკრეტულ ქვეყანაში ცხოვრების სიძვირის ხარისხს.
გაუგრძლდებათ თუ არა მომდევნო აკადემიური წლისთვის დაფინანსება ერთხელ უკვე დაფინანსებულ სტუდენტებს?
სტუდენტებს, რომლებსაც ერთი აკადემიური წელი დაუფინანსდათ 2 წლიანი სამაგისტრო პროგრამაზე ან/და 3 წლიან სადოქტორო პროგრამაზე და საჭიროებენ მომდევნო წლის დაფინანსებას, კომისია უფლებამოსილია მათი დაფინანსების საკითხი განიხილოს შესრულებული სახელშეკრულებო ვალდებულებების გათვალისწინებით. აღნიშნული პირები სააპლიკაციო ფორმას ავსებენ „მიმდინარე გრანტის მფლობელის“ სტატუსით.
აპლიკაციის წარმოდგენის ვადის დასრულების შემდეგ რა პროცედურები იწყება?
აპლიკაციისა წარმოდგენის ვადის დასრულების შემდეგ იწყება კონკურსანტების შერჩევის სამ საფეხურიანი მერიტორიალური პროცესი : 1. ადმინისტრაციული (ფორმალური) შემოწმება; 2. აპლიკაციისა და თანდართული დოკუმენტების ხარისხობრივ (შინაარსობრივი) შეფასება; 3. კომისიასთან გასაუბრება.
რას გულისხმობს ადმინისტრაციული (ფორმალური) შემოწმება?
ადმინისტრაციული (ფორმალური) შემოწმების საფეხურზე ხდება აპლიკაციისა და თანდართული დოკუმენტების საკონკურსო პირობებთან შესაბამისობის დადგენა. იმ შემთხვევაში, თუ წარმოდგენილი აპლიკაცია და საბუთების ნუსხა სრულყოფილია და აკმაყოფილებს საკონკურსო მოთხოვნებს, აპლიკაცია შერჩევის მეორე – ხარისხობრივი (შინაარსობრივი) შეფასების საფეხურზე გადადის.
რას გულისხმობს აპლიკაციისა და თანდართული დოკუმენტების ხარისხობრივ (შინაარსობრივი) შეფასება?
აპლიკაციისა და თანდართული დოკუმენტების ხარისხობრივ (შინაარსობრივი) შეფასების ეტაპზე აპლიკაციას და თანდართულ საბუთებს კომისია განიხილავს. შეფასება კონკრეტული კონკურსისათვის დადგენილი მოთხოვნების მიხედვით ხდება, სადაც განსაკუთრებული მნიშვნელობა სამოტივაციო წერილს, სამუშაო გამოცდილებას, შერჩეულ სკოლას/უნივერსიტეტს და დარგს, აკადემიურ წარმატებულობას ექცევა.
რას გულისხმობს კომისიასთან გასაუბრება?
ზემოთ აღნიშნული ორი საფეხურის წარმატების გავლის შემდგომ ხდება აპლიკანტის მოწვევა გასაუბრებაზე. გასაუბრება გრძელდება დაახლოებით 7-15 წუთამდე.
როგორ და რა შემადგენლობით მტკიცდება კომისია?
კომისია დამტკიცებულია საქართველოს მთავრობის 2014 წლის 22 აპრილის #303 დადგენილებით. კომისიის შემადგენლობა დაკომპლექტებულია სამთავრობო, არასამთავრობო და საერთაშორისო ორგანიზაციების წარმომადგენლებით.
როგორ წარმოებს კონკურსანტის შეფასება და როგორ ხდება საბოლოო ქულის გამოყვანა?
კონკურის მეორე და მესამე ეტაპებზე აპლიკაციებისა და გასაუბრების შეფასება ხდება ქულობრივად. კომისია შინაარსობრივი შეფასების ეტაპზე განიხილავს ყველა სრულყოფილად წარმოდგენილ განაცხადს, ხოლო გასაუბრებაზე იწვევს იმ აპლიკანტებს ვინც გადალახა შესაბამისი ქულობრივი ზღვარი.
ქულების მაქსიმალური შესაძლებელი რაოდენობა 106.5 ქულაა (100%). აქედან, აპლიკაციის შეფასებისას მაქსიმუმ 60 (%)/ქულა, ხოლო გასაუბრების შეფასებისას მაქსიმუმ 40 (%)/ ქულა; დარჩენილი 6.5 ქულა წარმოადგენს ადმინისტრაციული ქულას და იწერება აპლიკანტის სოციალური სტატუსის გათვალისწინებით.
შემრჩევი კომისიის წევრები თითოეულ აპლიკაციას ერთმანეთისაგან დამოუკიდებლად და შეუთანხმებლად აფასებენ ელექტრონულ სისტემის მეშვეობით. აპლიკაციის სხვადასხვა შესაფასებელ ნაწილს, როგორიცაა სამუშაო გამოცდილება, მიღებული განათლება და შერჩეული მიმართულება, აკადემიური პროგრამა, რეკომენდაციები, შერჩეული სკოლა/უნივერსიტეტი და სამოტივაციო წერილი შეფასებისას განსხვავებული ხვედრითი წილი აქვს საერთო ქულაში.
გასაუბრება თითოეულ აპლიკანტთან განსაზღვრული დროითა და ფორმატით მიმდინარეობს. კომისიის წევრები აპლიკანტს გასაუბრების დასრულების შემდეგ, ერთმანეთისგან დამოუკიდებლად აფასებენ.
საბოლოო ქულის გამოყვანა ხდება კონკურსის მეორე და მესამე საფეხურზე მოპოვებული ქულების დაჯამების გზით.
რა პრინციპით დგინდება კონკურსის ამა თუ იმ ეტაპზე გადასალახი ქულობრივი ზღვარი?
კონკურსის პროცესში მიღებული მონაცემების შესწავლის შედეგად კომისია განსაზღრავს ქულობრივ ზღვარს: აკადემიური პროგრამების მიხედვით (სამაგისტრო, სადოქტორო პროგრამა); პრიორიტეტული მიმართულებების მიხედვით.
როგორ ხდება და რა ვადაში მოხდება კონკურსის შედეგების შეტყობინება?
საბოლოო შედეგის შესახებ ყველა აპლიკანტის (გამარჯვებული, სარეზერვო და დაბალქულიანი) ინფორმირება ერთდროულად ხდება. ელექტრონული სისტემის მეშვეობით შესაბამისი ინფორმაცია გაეგზავნება აპლიკანტს განაცხადში მითითებული ელ.ფოსტის მისამართზე. იგივე გზით მოხდება გასაუბრებაზე მოწვევა იმ აპლიკანტების რომლებიც კონკურსის მეორე ეტაპს წარმატებით გადალახავენ. აპლიკანტებს კონკურსის საბოლოო შედეგები გასაუბრების ეტაპის დამთავრებიდან ერთ თვის მაძილზე ეცნობებათ.
შეუძლია თუ არა დაინტერესებულ პირებს ცენტრის ადმნისტრაციასთან შეხვედრა?
საკონკურსო ვადების ფარგლებში, კვირაში ორჯერ ორშაბათ და ოთხშაბათს 13:00-15:00 ცენტრის ადმინისტრაცია გამართავს საინფორმაციო შეხვედრებს. საინფორმაციო შეხვედრებზე დასწრების მსურველებმა უნდა მოგვწერონ სასურველი შეხვედრის თარიღი, სახელი, გვარი, პირადი ნომერი და ტელეფონის ნომერი მისამართზე iecmeetings@geo.gov.ge. შეხვედრების განრიგის შესახებ ინფორმაცია იხილეთ ცენტრის ოფიციალური ვებგვერდზე iec.gov.ge. შეხვედრაზე დასწრება შეუძლია ნებისმიერ დაინტერესებულ პირს.
