შეუწყობს თუ არა ხელს მუნიციპალიტეტი აგრარული სექტორის განვითარებას

“გლეხის წახალისება, დასაქმებისთვის ხელშეწყობა, სოციალური მდგომარეობის გაუმჯობესება, ფერმერული მეურნეობის განვითარება, სოფლის ფეხზე დადგომა და მიგრაციის შეჩერების პროცესი”, _ ოზურგეთის მუნიციპალიტეტის საკრებულოს წევრს თემურ სალუქვაძეს მიაჩნია, რომ ამ პრობლემების გადაჭრა დასაქმების ხელშეწყობის მუნიციპალური პროგრამის 20011 წლის ბიუჯეტში გათვალისწინებით გახდება შესაძლებელი.
მან ამ ინიციატივით და დასაქმების ხელშეწყობის მუნიციპალური პროგრამის 2011 წლის ბიუჯეტში გათვალისწინების შესახებ ადმინისტრაციული წარმოების დაწყების თაობაზე, ოზურგეთის მუნიციპალიტეტის საკრებულოს თავმჯდომარეს ალეკო მამეშვილს მიმართა.
როგორც სალუქვაძე ამბობს, ოზურგეთის მუნიციპალიტეტი აგრარული რეგიონია და შესაბამისად, საკრებულომ უნდა იზრუნოს სოფლის მეურნეობაში დასაქმებულ პირთა ხელშეწყობისთვის, რომ მათ სამეურნეო საქმიანობის სწორად და ეფექტურად წარმართონ.
მისივე თქმით, დასავლეთ ევროპაში აპრობირებულია მუნიციპალური კრედიტის გაცემა თვითმმართველობების მიერ, დასაქმების ხელშეწყობის მიზნით: _ მიმაჩნია, რომ მუნიციპალიტეტს შესაძლებლობა აქვს, შეამციროს დაფინასებები იმ სფეროში, რომელიც არ განეკუთვნება თვითმმართველობის საკუთარ უფლებამოსილებებს. შესაბამისად, საშუალება გვაქვს, ეს თანხები მუნიციპალური კრედიტის სახით მიემართოს ჩვენი მოსახლეობის დასაქმების ხელშესაწყობად.
საბიუჯეტო კოდექსის შესაბამისად, თვითმმართველობას ფინანსთა სამინისტროსთან შეთანხმებით შეუძლია, ადგილობრივი თვითმმართველი ერთეულების ბიუჯეტებიდან სესხის გაცემა. აქედან გამომდინარე, შესაძლებლობა გვაქვს, განვსაზღვროთ ინვესტირების მიმართულებები და შევიმუშაოთ დასაქმების ხელშემწყობი მუნიციპალური პროგრამები, _ დასძენს თემურ სალუქვაძე.
მისი განცხადებით, მუნიციპალიტეტის ტერიტორიაზე, სოფლის მეურნეობაში დასაქმებული პირები ვერ ახორციელებენ სრულფასოვან სამეურნეო საქმიანობას, ვინაიდან არ გააჩნიათ ამისთვის საჭირო საწყისი კაპიტალი და თანამედროვე მოთხოვნების შესაბამისი ცოდნა: _ თვითმმართველობის მხრიდან არ არსებობს არანაირი მხარდაჭერა კერძო სექტორის, დარგის განვითარების თვალსაზრისით. სოფლის მეურნეობის განვითარებას და ამ სექტორში მოსახლეობის დასაქმებას ხელს უშლის საკრედიტო დაწესებულებების მხრიდან, ამ დარგის განვითარების მიზნით კრედიტების გამოყოფის უინტერესობა და ასევე, მაღალი სასესხო სარგებელი გაცემულ კრედიტზე. სერიოზულ პრობლემას ქმნის ის, რომ ფერმერები ვერ ახერხებენ იმის გარკვევას, თუ რა სახის სოფლის მეურნეობის კულტურების მოყვანა იქნება მათ ნაკვეთზე მომგებიანი.
საკუთარი სახსრებით მეურნეობის განვითარებისას, ხშირ შემთხვევაში, არ ხდება ნიადაგის სპეციალური ლაბორატორიული შესწავლა და ბევრისთვის ასევე ხელმიუწვდომელია კვალიფიციური სპეციალისტების რჩევები, თუ რა კულტურა შეიძლება მოყვანილი იქნეს კონკრეტულ ნაკვეთზე. აღნიშნულიდან გამომდინარე, ფერმერი, გლეხი 7-8 წლის გასვლის შემდეგ იგებს, რომ ამა თუ იმ ნაკვეთზე, მის მიერ გაწეული შრომა და ხარჯები ფუჭი იყო, _ გვითხრა სალუქვაძემ.
ოზურგეთის მუნიციპალიტეტის საკრებულოს თავმჯდომარე ალეკო მამეშვილი: _ რაც შეეხება საკრებულოს სხდომაზე დაყენებულ საკითხს სოფლის მეურნეობის განვითარებისთვის ბიუჯეტიდან კრედიტების გამოყოფის შესახებ, ვფიქრობ, არასერიოზულია ამ ფორმით წარმოდგენილ წინადადებაზე საქმიანი მსჯელობის დაწყება. ეს იყო მხოლოდ ხმამაღალი განცხადება და არა შედეგზე გათვლილი, არგუმენტირებულად წარმოდგენილი პროექტი, რომელიც ამ შემთხვევაში საკრებულოს განხილვის საგანი გახდებოდა. თუკი ბატონი თემური აგრობიზნესის სფეროში ჩემს გამოცდილებას გაიზიარებს, შემიძლია, აღნიშნულთან დაკავშირებით გავუწიო კვალიფიციური კონსულტაცია და მივცე სასარგებლო რჩევები.
როდესაც საქმე ეხება გლეხებისთვის კრედიტების გაცემას, აქ კარგად უნდა იქნას გათვლილი შემდგომში მისი ამოღების გზები და საშუალებები _ მიღებული მოსავლის გარანტირებული რეალიზაცია, რათა ფერმერს სესხის დაბრუნების საშუალება მიეცეს. ჩვენ არ ვართ ბანკი, რომ მოვახდინოთ მოსახლეობის ქონების დაყადაღება გადაუხდელობის შემთხვევაში და შემდგომში მათი ამოღება.
ბიუჯეტში გათვალიწინებული იქნება სასოფლო-სამეურნეო სადემონსტრაციო ნაკვეთების მოწყობა, სადაც მოხდება ახალი ჯიშების დანერგვა; მოსახლეობისთვის შედეგების გაცნობა-კონსულტირება; წარმოების საშუალებების გამოცდა (პესტიციდები, სასუქები, ბიო-ქიმიკატები). პროექტში მონაწილეობას მიიღებს ანასეულის სამეცნიერო კვლევითი ინსტიტუტი. ნებისმიერ დროში გაწერილ, დასაბუთებულ და შედეგზე ორიენტირებულ პროექტებს მიესალმება საკრებულო და მოახდენს მათ გათვალისწინებას, _ გვითხრა მამეშვილმა.