“რა გადაწვეტილებას იღებთ, ომს უცხადებთ ვინმეს? ნუ გააკეთებთ იმ ბაზარს და იყოს ისე! არ არის ეს თქვენი პრეროგატივა, ბატონებო! თქვენ თუ გინდათ ქალაქის აშენება, ასე არ გამოვა, რა! მე უნდა მოვაწესრიგო ქალაქი და მომეცით ამის საშუალება! ღმერთით, მომეცა იმის საშუალება, რომ მოვაწესრიგო ეს ქალაქი. ძალიან გთხოვთ, მომეცით ამის საშუალება! ხელს ნუ შემიშლით! დაგანახებთ, აქედან ერთ წელიწადში რასაც ვიზამ!“ _ აღნიშნული განცხადებები ქალაქ ოზურგეთის მუნიციპალიტეტის საკრებულოს სხდომაზე ქალაქ ოზურგეთის მერმა ბეგლარ სიორიძემ საკრებულოს რამდენიმე დეპუტატების მისამართით გააკეთა.
“ქალაქ ოზურგეთის მუნიციპალიტეტის საკუთრებაში არსებული ქონების 42 კვ.მ. ა.წულაძის ქუჩაზე სასყიდლიანი ფორმით სარგებლობის უფლებით, სასყიდლიანი იჯარის სახით 10 წლის ვადით გაცემის თაობაზე, აღნიშნულ ადგილზე ავტოსადგომის მოწყობის მიზნით და მეორე საკითხი, ქალაქ ოზურგეთის მუნიციპალტეტის საკუთრებაში არსებული ქონების გურიის ქუჩაზე მდებარე, 4724 კვ.მ. მიწის ფართიდან 160 კვ.მ. სასყიდლიანი ფორმით სარგებლობის უფლებით სასყიდლიანი აღნაგობის სახით 35 წლის ვადით გაცემის თაობაზე, აღნიშნულ ადგილზე სავაჭრო ობიექტის აშენების მიზნით“ _ აღნიშნულმა საკითხმა ოპოზიციონერი დეპუტატების პროტესტი გამოიწვია და საკრებულოს წევრებსა და ქალაქ ოზურგეთის მერს შორის შელაპარაკებაც მოჰყვა.
ქალაქ ოზურგეთის მუნიციპალიტეტის საკრებულოს სხდომაზე, სადაც დღის წესრიგით 17 საკითხი იყო გათვალისწინებული, დეპუტატებმა 16-ს დაუჭირეს მხარი. ხმაური გამოიწვია მე-16 საკითხმა, რომელიც შესყიდვებთან დაკავშირებით ცვლილებებს შეეხებოდა, მე-17 საკითხი _ “ქალაქ ოზურგეთის მუნიციპალიტეტის ქონების პირდაპირი განკარგვის წესით სარგებლობის უფლებით გაცემის შესახებ“, ქალაქ ოზურგეთის მუნიციპალიტეტის მერისთვის თანხმობის მიცემის თაობაზე _ დეპუტატების უმრავლესობამ მხარი არ დაუჭირეს და აღნიშნული საკითხი ჩავარდა.
ლევან მგელაძე: “გეთანხმებით, რომ გასაკეთებელი და მოსაწესრიგებელია ბაზარი, მაგრამ აქ ჩვენ გვაქვს საუბარი იმაზე, რომ მოხდეს აუქციონის წესით გასხვისება და არა პირდაპირი წესით განკარგვა, რატომ უნდა გავაკეთოთ ერთ პირთან მოლაპარაკებით? იქნებ სხვამ უფრო მეტი შემოიტანოს. სად არის განცხადებები გვაჩვენეთ, ვინ მოგმართათ, სად არის ბიზნესგეგმა?!“
ბეგლარ სორიძე: “აქ არის საუბარი იჯარაზე, ჩვენ გადავწყვიტეთ იჯარით გავცეთ ფართი. მგონი, გაუგებარი არაფერია. ბაზარს ჰქონდა 13 000 ლარი დავალიანება, წაგებაზე იყო. მომავალში ბაზარი უნდა გახდეს მომგებიანი, ამიტომ ბაზრის მოსაწესრიგებლად უნდა მივიღოთ ყველა ზომა. არის ადამიანი, ვინც ჩადებს ამაში ფულს. იღებს 35-წლიან იჯარას და გააკეთებს ამ ყველაფერს. ერთადერთი ადამიანია, ვინც შემოვიდა განცხადებით 35-წლიან იჯარაზე და ასევე, ერთადერთია ტაქსის სადგომის იჯარის განცხადებაც, ჩვენ გვაქვს ამის უფლება მონიჭებული, ამიტომ კანონდარღვევას ჩვენ არ ვაკეთებთ“.
ნათია შარაშენიძე: “გვეტყვით, ვინ არიან ეს ადამიანები, ვისაც სურთ იჯარით აიღონ აღნიშნული ტერიტორიები?“
_ ამისთვის საჭიროა აუქციონის ჩატარება და არა პირდაპირი წესით განკარგვა, თითოეულ დეპუტატს აქვს პასუხისმგებლობა. ამიტომ ვთხოვ მათ, სწორად მიიღონ გადაწყვეტილება, _თქვა თამარ ნადირიძემ.
ბეგლარ სიორიძე: “რა გადაწვეტილებას იღებთ, ომს უცხადებთ ვინმეს? ნუ გააკეთებთ იმ ბაზარს და იყოს ისე! არ არის ეს თქვენი პრეროგატივა, ბატონებო! თქვენ თუ გინდათ ქალაქის აშენება, ასე არ გამოვა, რა! მე უნდა მოვაწესრიგო ქალაქი და მომეცით ამის საშუალება! ღმერთით, მომეცა იმის საშუალება, რომ მოვაწესრიგო ეს ქალაქი, ძალიან გთხოვთ მომეცით ამის საშუალება! ხელს ნუ შემიშლით! დაგანახებთ აქედან ერთ წელიწადში რასაც ვიზამ!“
თამარ ნადირიძე: “აბა ვისი პრეროგატივაა?“
ლევან მგელაძე: “ჩვენ გიშლით ხელს? “
ნინო გოგუაძე: “დავაყენოთ კენჭისყრაზე საკითხი და, ქალბატონო თამარ, მე მივიღებ იმ გადაწყვეტილებას, რასაც ჩავთვლი საჭიროდ“.
გოჩა მგელაძე: “მაშინ გავყიდოთ ეგ ბაზარი ბარემ. სადაც 35-წლიანია იჯარა, იქ, ფაქტობრივად, გაყიდულია“.
აღნიშნულ საკითხს მხარი არ დაუჭირს დეპუტატებმა და ჩავარდა.
ნათია შარაშენიძე: “გილოცავთ, ღირსება არის!“
ნინო გოგუაძე: “რას ნიშნავს, ქალბატონო ნათია, ღირსება არის? გამეცით პასუხი, განმიმარტეთ, ქალბატონო ნათია, მაგრამ, როგორც ყოველთვის, გაიქცევით ახლა!“
ნათია შარაშენიძე: “მოვა დრო და თქვენ გაიქცევით, ქალბატონო ნინო!“
სხდომის დასრულებისას ბრიფინგი გამართა საკრებულოს ოპოზიციონერმა დეპუტატებმა: ლევან მგელაძემ, ნათია შარაშენიძემ და თამარ ნადირიძემ. მათ საკრებულოს წევრების მიმართ დადებითი პოზიცია დააფიქსირეს და კიდევ ერთხელ აღნიშნეს, რომ ყველა საკითხს გაჰყვებიან ბოლომდე და მკაცრად გააკონტროლებენ.
_ “დღეის შემდეგ, ყველა საკითხი მაქსიმალურად იქნება ჩვენ მიერ კონტროლზე აყვანილი და გაშიფრული“, _ აღნიშნეს მათ.
თამარ ნადირიძე: “მე ვიტყოდი, რომ დღეს ქალაქ ოზურგეთის საკრებულო შედგა. ჩვენ ღიად დავაფიქსირეთ ჩვენი პოზიცია, დარწმუნებული ვართ, რომ ამით უფრო მეტი გავუკეთეთ ქალაქის მერს“
ნათია შარაშენიძე: “ის, ფაქტი, რომ რამდენიმე დღის წინ მე ვამბობდი, რომ ქალაქ ოზურგეთის მერს მისი საკუთრება ჰგონია ოზურგეთი, ამას ცხადჰყოფს ის, რომ მას სურდა პირდაპირ წესით გაესხვისებინა ოზურგეთის ქონება, მაგრამ დღეს ოზურგეთის საკრებულომ აჩვენა მაგალითი და მერის ეს სურვილი და ოცნება ჩააგდო“.
