დღეს განახლდა საქართველოს საფეხბურთო ჩემპიონატის მეორე წრე და წლის პირველ მატჩში ლანჩხუთის "გურიამ" "ზესტაფონს" უმასპინძლა. ჯერ კიდევ ჯეროვნად მოუმზადებულ გურულებს რთული დაპირისპირება ელოდათ ბოლო დროს უხერხულ მეტოქესთან. იმერლებმა აქამდე ხუთიდან ხუთივე მოგვიგეს და არც ამჯერად აპირებდნენ სხვა შედეგის მიღწევას. თუმცა ნავსი გატყდა და "გურიამ წრე უმნიშვნელოვანესი მოგებით დაიწყო.
ერთადერთმა გოლმა გადაწყვიტა მატჩის ბედი, მაგრამ გოლსაც გააჩნია. ზღაპრული სილამაზის გამოდგა ის დარტყმა, რომელმაც ლანჩხუთელებს 3 ქულა მოუტანა. მეორე ტაიმი ახალ დაწყებული იყო მარცხნიდან კობა შალამბერიძემ კუთხური რომ მოაწოდა, საჯარიმოს მისადგომებიდან ბურთს თორნიკე მოსიაშვილი შეეგება, მიწაზე დაუშვებლად დაჰკრა მარჯვენა და ცხრიანში ლურსმანივით გაჭედა. ეს გოლი ტურის კი არა ჩემპიონატის მშვენება უნდა დარჩეს უსათუოდ.
თავად შეხვედრა დინამიურად წარიმართა, მასპინძლები ძირითადად უტევდნენ, მაგრამ ერთი შემტევით ფონს ვერ გადიოდნენ. თანაც ვილი ისიანი აშკარად შორსაა ოპტიმალური ფორმიდან და მეორე ტაიმში თემურ ლორიამ გამოცვალა კიდეც. ისიანს მარცხნიდან შალამბერიძე ეხმარებოდა, მარჯვნიდან კი ლევან ინგოროყვა, რომელმაც მართლაც კარგად ითამაშა.
იმერლები ძირითადად სწრაფი კონტრშეტევების იმედზე იყვნენ და თავიდან რამდენიმე ჩხვლეტა გამოუვიდათ კიდეც, ოღონდ სამუშიას და ილურიძის თავგამოდებას შედეგი არ მოჰყოლია. ამასობაში "გურიამაც" გაიწია გასატანად და შალამბერიძეს ორჯერ მართებდა გატანა. ორჯერვე შორიდან დაემუქრა ის კარს, მაგრამ პირველ ეპიზოდში ოდნავ ააცილა, მეორეში კი მეკარემ აუღო რთული ბურთი.
გატანილი გოლის შემდეგ სტუმრებმა თამაშის გადარჩენა მოიწადინეს და შეტევა გააძლიერეს, თუმცა, საიმედოდ მოთამაშე მეტოქე მცველებს ვერაფერი დასტყუეს. კარგი შთაბეჭდილება დატოვეს ცენტრალურმა მცველებმა-ერეკლე კილაძემ და განსაკუთრებით ბიძინა ცინცაძემ. მარჯვნივ კი ტრადიციულად აქტიური იყო ლანჩხუთის საფეხბურთო სკოლის ორი აღზრდილი-გიგა ჭეიშვილი და იგივე ინგოროყვა.
ისიანს შეეძლო მატჩის ბედის ნაადრევად გადაწყვეტა, როცა მეკარესთან მახვილი კუთხიდან შესულს ცაციათი დარტყმის მაგიერ კოშკაძისთვის პასი რომ მიეცა, თუმცა მან დარტყმა ამჯობინა და უხეიროდაც გააკეთა ეს.
ბოლო წუთებში სტუმრებმა მეტოქე დაღალეს და საჯარიმოს სიახლოვეს მიეძალნენ. კინაღამ გაათანაბრეს კიდეც ანგარიში. შეცვლაზე შესულმა ზვიად სიხარულიამ, რომელიც სხვათა შორის "გურიაში" ისინჯებოდა, საჯარიმოს წინა ხაზიდან დაარტყა სახიფათოდ და მხოლოდ კარის ხარიხას გაარტყა.
ამ 3 ქულით ლანჩხუთელებმა 22 ქულა მოაქუჩეს და მერვე ადგილზე ამაღლდნენ. მომავალ ტურში, 27 თებერვალს მათ ქობულეთში სტუმრობა ელით იქაურ "შუქურასთან", რომელმაც თავის მხრივ ამ ტურში ზუგდიდში დათმო შეხვედრა ასევე 0-1.
"გურიამ" მატჩი ასეთი შემადგენლობით ჩაატარა: თებიძე, ჭეიშვილი,ცინცაძე, კილაძე, მჭედლიშვილი, ღაღანიძე, კოშკაძე (ბენაშვილი 82),ინგოროყვა, მოსიაშვილი, შალამბერიძე (კონოვალოვი 86) , ისიანი (მათიაშვილი 77).
