ოზურგეთის რაიონულმა სასამართლომ ქალაქ ოზურგეთის ცენტრალური სტადიონის ყოფილი დირექტორის, მურთაზ აბაშიძის სამსახურში აღდგენა და განაცდური ხელფასის ანაზღაურება ხელმეორედ დააკისრა.
აბაშიძე, რომელიც თავდაპირველად საკმაოდ კურიოზული ბრძანებით, თოჯინების თეატრის წესდების საფუძველზე გაათავისუფლეს საკუთარი უფლებების დაცვას ბოლომდე აპირებს და დახმარებას სახალხო დამცველსაც სთხოვს.
G-News TV-ის ყოველკვირეული გადაცემისთვის ამ თემაზე სიუჟეტი ჩვენმა კორესპონდენტებმა გიორგი გირკელიძემ და ჟანა მეგრელიშვილმა მოამზადეს.
ოფიციალური ინფორმაციის თანახმად, 2014 წლის ბოლოს საქართველოში 430 000 სოციალურად დაუცველი ცხოვრობდა. ეს ოფიციალური სტატისტიკაა.
თუ გავითვალისწინებთ ქვეყანაში არსებულ მდგომარეობას, ეს რიცხვი გაცილებით მაღალი იქნება. ადამიანებს ძალიან უჭირთ. უმრავლესობას პურის ფულიც არა აქვს. ერთ-ერთ ასეთ ოჯახზე წინა გადაცემაში სპეციალური სიუჟეტი გავიდა. სამწუხაროდ, მას ოზურგეთის მუნიციპალიტეტის გამგეობა არ გამოხმაურებია.
გასული კვირის "კვირის თემაში" დაბა ანასეულში, ბარაკებში მცხოვრები ოჯახების მდგომარეობაზე ვისაუბრეთ. ქალაქ ოზურგეთის მერი ამბობს, რომ მერიას ამ ეტაპზე დახმარება არ შეუძლია. ბარაკებში მცხოვრებნი კი ხელისუფლებას წინასაარჩევნო დაპირებებს ახსენებენ.
"კვირის თემის" ბოლო ბლოკში ერთმანეთს ჩოხატაურის მუნიციპალიტეტის საკრებულოს თავმჯდომარის მოადგილე ვლადიმერ სიხარულიძე და საკრებულოს წევრი "ნაციონალური მოძრაობიდან" მამუკა ბარამიძე დაუპირისპირდნენ.
საუბრის მთავარი თემა სახელმწიფო აუდიტის სამსახურის დასკვნა იყო, რომლის სხდომაზე განხილვას ბარამიძე დიდი ხანია ითხოვს. სიხარულიძის თქმით, ამ საკითხს კომისიები განიხილავენ:
_ ამ დასკვნის განხილვები კომისიაში მიდის, რადგან ეს მთლიანობაში ბიუჯეტს შეეხება. დასკვნა ეხება 2012-2013 წლებს. ალბათ, უახლოეს სხდომაზე განვიხილავთ, _ აღნიშნა სიხარულიძემ.
მისივე თქმით, დადგება იმ ადამიანების პასუხისმგებლობის საკითხი, რომლებიც დოკუმენტებს დარღვევით ადგენდნენ. სიხარულიძემ კონკრეტული გვარები არ დაასახელა, თუმცა, აღნიშნა, რომ დანაშაულზე პასუხი ყველამ უნდა აგოს.
_ მე ვფიქრობ, რომ ვინც საქმეს ცუდად აკეთებდა, სამსახურიდან უნდა წავიდეს, _ თქვა სიხარულიძემ.
_ ბატონო ვლადიმერ, რომ დავაზუსტოთ, ფიქრობთ, რომ ზურაბ ჩანტლაძემ, რომელიც დღეს აუდიტის სამსახურის უფროსია და რომელიც აუდიტის ჩატარების დროს საფინანსო სამსახურს ხელმძღვანელობდა, სამსახური უნდა დატოვოს?
_ კონკრეტიკაზე მე არ მივდივარ. როცა საკითხი განიხილება და კონკრეტულად გამოჩნდება, რა და როგორ, შემდგომ დადგება პასუხისმგებლობის საკითხი.
საკრებულოს თავმჯდომარის მოადგილის განმარტებით, საინტერესო იქნება ძველი წლების აუდიტის დასკვნაც, რომლებიც რატომღაც არ ჩატარებულა.
მამუკა ბარამიძე სიხარულიძის განცხადებას არ დაეთანხმა და აღნიშნა, რომ ის ორი კომისიის წევრია, თუმცა არცერთ კომისიაში ეს საკითხი არ განხილულა:
_ განსაკუთრებულად ხაზს გავუსვამ _ ვარ საფინანსო-საბიუჯეტო კომისიის წევრი და ამ კომისიაში ეს საკითხი ჯერჯერობით არ იხილება, _ აღნიშნა ბარამიძემ.
მისივე თქმით, ის რომ ნაციონალური მოძრაობის ხელისუფლებაში ყოფნის დროს აუდიტი არ ჩატარებულა, არ ნიშნავს იმას, რომ დარღვევა იყო:
_ უბრალოდ, ახლა, არსებობს ფაქტი, დასკვნა გარკვეულ პერიოდზე. ეს არის რეალობა და ჩვენ ამაზე ვსაუბრობთ. მე არ ვლაპარაკობ ამაზე ჩასაფრებული ადამიანის პოზიციიდან. მინდა, რომ რაც შეიძლება ობიექტური ინფორმაცია იცოდეს საზოგადოებამ და მათ შორის ჩვენც, დეპუტატებმაც, _ თქვა ბარამიძემ.
გადაცემის სტუმრებმა ჩოხატაურის 2015 წლის ბიუჯეტზეც ისაუბრეს. ბარამიძის თქმით, ბიუჯეტი სამომავლოდ არ არის გათვლილი და ის მხოლოდ დღევანდელობასაა მორგებული. სიხარულიძის განმარტებით, წლევანდელი ბიუჯეტით ბევრი მნიშნელოვანი პროექტი გახორციელდება.
ვისზე აქვს სწორება ვლადიმერ სიხარულიძეს, რას ნიშნავს "პოლიტიკური პრასტიტუტკა" და რაში ადანაშაულებს "ნაციონალური მოძრაობა" "ქართულ ოცნებას" _ გადაცემის სრული ვერსია შეგიძლიათ ნახოთ ამ ლინკზე.
