“დანაპირები არ შეგვისრულეს, დაიკავეს სკამები და მოატყუეს ხალხი”

ქალაქ ოზურგეთში, მეცნიერების ქუჩაზე მდებარე N 35 და N 37 ე.წ. "ბარაკებში" მცხოვრები მოსახლეობა, ქალაქ ოზურგეთის მერს წინასაარჩევნო დაპირებებს ახსენებენ. როგორც მოსახლეობა "გურია ნიუსთან" ამბობს, მათი საცხოვრებელი ბინა ავარიულ მდგომარეობაშია და სასწრაფოდ გადახურვას საჭიროებს. მათივე თქმით, წინასაარჩევნოდ ქალაქ ოზურგეთის მერი დაჰპირდა მათ არსებული პრობლემის მოგვარებას, თუმცა, არჩევნების შემდეგ, მოსახლეობის არაერთი თხოვნის მიუხედავად, ქალაქ ოზურგეთის მერიიდან არანაირი პასუხი არ ჩანს.

დალი ციცქიშვილი, მეცნიერების ქუჩაზე მცხოვრები: "ნახეთ, როცა გარეთ წვიმს, ისეთივე მდგომარეობაა შიგნით. მთლად ჩამოშლილია ყველაფერი, კედლები ჩამონგრეულია. რამდენი წელია, ვითხოვ დახმარებას, მაგრამ არაფერი არ ჩანს. ასჯერ დავწერეთ განცხადება, ქალაქის მერიაში დევს, მაგრამ ყურადღებას არავინ გვაქცევს. სოციალური დახმარებაც არ გვაქვს. ეკონომიკურად ძალიან გვიჭირს. ვისაც ეხება, ყველას მივმართეთ, დაპირებებში გამოზაფხულდა უკვე. 5 წელია, ასეთ მდგომარეობაში ვართ".

მაგული დარჩიძე: "აი, რა პირობებში ვცხოვრობთ. ხუთსულიანი ოჯახი ორ ოთახში ვცხოვრობთ. ქმარი ინვალიდი მყავს, მუშაობა არ შეუძლია, რომ ფიზიკურად რამე გააკეთოს. სად წავიდე, მითხარით? სამი თვეა, რაც სოციალური დახმარება დაგვენიშნა და მაგის იმედზე ვართ. ნახეთ, შიფერზე ზემოდან აგურები გვიწყვია, ისე გვაქვს დამაგრებული. როცა წვიმს, სახლში ვერ გაივლი. კედლები სულ ჩამონგრეულია, ჭერი ხომ აღარ ვარგა. განცხადებები რამდენჯერ დავწერეთ, რამდენჯერ მივმართეთ კომპეტენტურ ორგანოებს, მაგრამ შედეგი არ ჩანს.

დასამალი რა გვაქვს, სეზონურად თუ თურქეთში გადავიდნენ ჩვენი შვილები, ესაა ჩვენი შემოსავალი. იქ რა წვალება უწევთ, კი იცით. ხან მთლად უფულოდ უშვებენ".

თამილა ტრუხანი: "წინასაარჩევნოდ რომ მოვიდნენ, რას არ ვეხვეწებოდით, ვემუდარებით, მაგრამ რაა? როგორც ხედავთ, არაფერი არ გაკეთებულა. გვპასუხობენ, ბიუჯეტში არაა თანხაო, გაჭირვებულებისთვის თანხა არასდროს არაა. ორი მცირეწლოვანი შვილი მყავს, არსად არ მუშაობს ჩემი ქმარი, ვინმეს შეშას თუ დაუჩეხავს და ეგაა, ისიც აღარ უნდათ ახლა. თურქეთშიც ვერ მიდის, რომ სოციალური დახმარება არ მოგვიხსნან, მაგაზე ვართ დამოკიდებული. ჩვენი მთავარი საზრუნავი სახლის გადახურვაა. ბავშვები ხშირად ავადმყოფობენ. წინასაარჩევნო დანაპირები არ შეგვისრულეს. დაიკავეს ის სკამები, რომელიც უნდოდათ და მოატყუეს ხალხი. 3 წლის ბავშვი მყავს, ურთულესი ოპერაცია გავუკეთეთ. ქალაქის მერს მივმართეთ, მოეცა ერთჯერადი დახმარება, რომ საოპერაციოდ წამეყვანა ბავშვი. რამდენი ხანი მატარა წინ და უკან, ვინ იცის. სანამ მანქანამდე არ მივდიე სიორიძეს, ყურადღება არ მომაქცია. ეს იყო იანვარში. რამდენჯერაც მივედი მიღებაზე – არ დამხვდა".

ლევან ჩიბურდანიძე: "თუ ვინმე თურქეთში გადავიდა სამუშაოდ, ესე იგი, მდიდარია და გიხსნიან სოციალურ დახმარებას. ბანკში რომ მიხვალ, სესხისთვის და ეტყვი თურქეთში დავდივარო, უკან უარით გიშვებენ. რით ვირჩინოთ თავი? ცოდვაა ეს ხალხი, რამდენი გაწვიმდება, იმდენი ტაშტებით დარბიან".

თალიკო მახარაძე: "მოხუცებული როგორ პირობებში მიწევს, ნახეთ?! სახლი ისეთ მდგომარებაშია, სულ ტაშტები გვაქვს დაწყობილი. ისეთი ავარიულია, რომ მეორე ოთახში ვერ გავდივართ. წინასაარჩევნოდ მოვიდნენ, ოღონდ ხმა მოგვეცით და აგერ ვართო. სად არის, გეკითხებით! მოვიდა საერთოდ? იკითხა ჩვენი ამბავი? არავინ ყურადღებას არ გვაქცევს, ასჯერ შევიტანეთ განცხადება ქალაქის მერიაში".

როდის მოუგვარდებათ ანასეულში, მეცნიერების ქუჩაზე მდებარე ე.წ. ბარაკებში" მცხოვრებ მოსახლეობას მათ მიერ დასახელებული პრობლემა, ამაზე ქალაქ ოზურგეთის მერს კონკრეტული პასუხი არ აქვს:

ბეგლარ სიორიძე: "ანასეულში, ე.წ. ბარაკებში მცხოვრები მოსახლეობის პრობლემებთან დაკავშირებით გეტყვით, რომ, სამწუხაროდ, ჯერჯერობით, ქალაქის მერიას არ გააჩნია ფინანსური საშუალება იმისთვის, რომ ყველა სახლის პრობლემა ერთდროულად მოაგვაროს. ასე რომ, ზოგი ადრე გაკეთდება, ზოგი _ ცოტა მოგვიანებით. ჩვენ ვიცით, სად რა პრობლემა აქვს მოსახლეობას, მაგრამ კიდევ ერთხელ ვიმეორებთ, სამწუხაროდ, ჩვენი ბიუჯეტიდან გამომდინარე, ყველა პრობლემის გადაჭრა ვერ ხერხდება, _ ამბობს სიორიძე და თან "გურია ნიუსის" მისამართით პრეტენზიებს გამოთქვამს: _ ისე, იქნებ, ერთხელ დაწეროთ, რომ რაღაცა კეთდება, ეგრე არ შეიძლება, არა?! _ გვითხრა სიორიძემ.