ქვემო ქართლის ყოფილი გუბერნატორი დავით კირკიტაძე, რომლესაც საგამოძიებო სამსახური უფლებამოსილების ბოროტად გამოყენებაში ედავება, ამერიკიდან საქართველოში დაბრუნებას მხოლოდ სასწავლო კურსის დამთავრების შემდეგ გეგმავს.
ამის შესახებ კირკიტაძემ "რუსთავი 2"-თან სატელეფონო საუბარში განაცხადა და აღნიშნა, რომ აშშ-ში სასწავლებლად იმყოფება და კურსის დამთავრებამდე გეგმების შეცვლას არ აპირებს.
"ეს არის პოლიტიკური დევნა იქედან გამომდინარე, რომ მე 2011 წლიდან 2015 წლის 4 იანვრამდე ვიყავი საქართველოში. თუ რამე კითხვები ჰქონდა გამოძიებას, მზად ვიყავი, მეპასუხა. 4 იანვარს დავტოვე ქვეყანა და წამოვედი სასწავლებლად. ეს მათ კარგად იციან. 6 თვეში მთავრდება კურსი, იქამდე ვერანაირდ ვერ ვახერხებ საქართველოში ჩამოსვლას, ამიტომაც დრო იხელთეს და წამიყენეს ბრალი. 10 ივნისს მიმთავრდება სწავლა და ამის შემდეგ ვაპირებ დაბრუნებას – ყველა შეკითხვას გავცემ პასუხს, თუ რამე აქვს გამოძიებას", _ აღნიშნა კირკიტაძემ და დასძინა, რომ მისთვის წაყენებული ბრალი "სასაცილოა".
"ბრალი სასაცილოდაც არ მყოფნის. ნამდვილად არ ვაპირებ ჩემი გეგმების შეწყვეტას იმის გამო, რას მოისურვებს რუსი ოლიგარქი, რომელსაც ქვეყანა მიჰყავს უფსკრულისკენ", _ აღნიშნა კირკიტაძემ.
ცნობისთვის, საგამოძიებო სამსახურმა, სამსახურებრივი უფლებამოსილების ბოროტად გამოყენების ფაქტზე, ქვემო ქართლის ყოფილი რწმუნებულ-გუბერნატორი დავით კირკიტაძე სისხლის სამართლის პასუხისგებაში მისცა.
გამოძიებიებამ ინფორმაციით, "2011-2012 წლებში, დავით კირკიტაძის მითითებით, ქვემო ქართლის გუბერნიის კუთვნილმა სპეცტექნიკამ, საქართველოს კანონმდებლობის დარღვევით, უსასყიდლოდ შეასრულა სამუშაოები დავით კირკიტაძის ძმის, ირაკლი კირკიტაძისა და ყოფილი საჯარო მოხელის, გიორგი უდესიანის ერთობლივი კომპანიების, შპს "ავტოჰაუს-რუსთავი 2011"-ისა და შპს "ტიტანი 2011"-ის სასარგებლოდ, თბილისი-რუსთავის გზატკეცილზე ავტობაზრობის მშენებლობის დროს, რითაც სახელწიფოს მიადგა 248 400 ლარის მატერიალური ზიანი. ვინაიდან დავით კირკიტაძე თავს არიდებს საგამოძიებო ორგანოში გამოცხადებას, მას დადგენილება ბრალდების შესახებ წარედგინება დაუსწრებლად და საქართველოს მთავარი პროკურატურა აღმკვეთი ღონისძიების სახით მოითხოვს პატიმრობას, რისი შეფარდების შემთხვევაშიც მის მიმართ გამოცხადდება ძებნა. საქმეზე გამოძიება გრძელდება საქართველოს სისხლის სამართლის კოდექსის 332-ე მუხლით.
