„ერთიანი ნაციონალური მოძრაობის“ წევრ ნუგზარ წიკლაურის ინფორმაციით, დღეს რუსული სამხედრო მანქანა, რუსი მძღოლითა და რუსული სანომრე ნიშნებით გადაადგილდებოდა სენაკის ტერიტორიაზე, სამხედრო ბაზის მიმართულებით.
წიკლაურის ინფორმაციით, მანქანის მძღოლმა იქაურ მოქალაქეებს ჰკითხა თუ სად მდებარეობდა სამხედრო ბაზა, რის შემდეგაც გზა გააგრძელა.
„საგულისხმოა, რომ საპატრულო მანქანა, რომელიც რუსულ ნომრიან მანქანას შეხვდა, არც კი დაინტერესებულა თუ რა მიზნით გადაადგილდებოდა ეს მანქანა და არც კი უკითხავს მისი იქ ყოფნის მიზანი.
ფაქტია, რომ ოკუპანტი სამხედრო ძალები უკვე უკონტროლოდ გადაადგილდებიან საქართველოს ტერიტორიაზე. ამას გუშინ გავრცელებული ფოტოებიც ადასტურებს, ასევე ინფორმაცია, რომ რუსული სამხედრო მანქანები დარიალის ხეობაში გადაადგილდებოდნენ.
გუშინ და დღეს ჩვენ ამასთან დაკავშირებით მოვისმინეთ მთავრობის აბსურდული განცხადებები, რომ ეს მანქანები ჩამოყვანილია სათადარიგო ნაწილებად დაშლის მიზნით, რაც პირდაპირ თვალებში ნაცრის შეყრაა ქართული საზოგადოებისათვის.
მოვითხოვთ თავდაცვის მინისტრ ჯანელიძისაგან, გამოვიდეს და მკაფიოდ განუმარტოს ქართულ საზოგადოებას თუ რა მიზნით გადაადგილდებიან რუსული სამხედრო მანქანები საქართველოს ტერიტორიაზე. ჩვენ ვიცით თავდაცვის მინისტრის დამოკიდებულება რუსების მიმართ, თუ როგორ აწინაურებს იგი საპასუხისმგებლო თანამდებობებზე იმ ადამიანებს, რომლებიც შემჩნეულნი არიან რუსებთან ძალიან ახლო ურთიერთობებში და მისგან მოვითხოვთ, განმარტოს თუ რა შეიცვალა საქართველოში. არის თუ არა ეს ის, რომ უკვე ოკუპანტ ქვეყანას მიცემული აქვს უფლება საქართველოს მთელ ტერიტორიაზე განახორციელოს კონტროლი და ეს კონტროლი განახორციელოს ცინიკურად ისე, რომ ყველა ამას ხედავს“, _ აცხადებს ნუგზარ წიკლაური.
ასევე, ვრცელდება ინფორმაცია და ფოტოკადრები, რომ დღეს რუსული კავშირგაბმულობის სამხედრო მანქანა, რუსული ნომრებით, 06-ინგუშეთის რესპუბლიკა, ქალაქ ფოთში, ცხრა აპრილის ხეივანშიც გადაადგილდებოდა.
