"ვინ მოგცა უფლება, რომ ჩემი გვერდის ავლით გააკეთო ინფორმაცია? კეთილი გენება დაგერეკა ჩემთვის, მე პრესსამსახური ვარ და იმიტომ ვარ იქ, რომ მე მივაწოდო ჟურნალისტებს ინფორმაცია“ _ ასე გამოეხმაურა ოზურგეთის მუნიციპალიტეტის გამგეობის პრესსამსახურის ხელმძღვანელი ეკატერინე მგელაძე ჩვენ ვებგვერდზე გამოქვეყნებულ სტატიას “გამგებლის მოადგილე და მრჩეველი თანამდებობას ტოვებენ?“.
როგორც გაირკვა, მგელაძის გაღიზიანება მასალაში გამოყენებული კომენტარების მისგან დამოუკიდებლად მიღებამ გამოიწვია.
"ვინ მოგცა უფლება, რომ ჩემი გვერდის ავლით გააკეთო ინფორმაცია (კანონმა ქალბატონო ეკა. ავტ.)? ადამიანები გადმოხვეწილები არიან თბილისიდან, მიტოვებულები ჰყავთ ოჯახები და უბრალოდ ასეთ ცრუ ინფომაციას არ იმსახურებენ რა! დარბიან სამინისტროებში ორივე, ცხენებივით არიან ყოველდღე რომ საქმე გააკეთონ და კეთილი გენება დაგერეკა ჩემთვის, მე პრესსამსახური ვარ და იმიტომ ვარ იქ, რომ მე მივაწოდო ჟურნალისტებს ინფორმაცია" _ ასეთი ტექსტით და ხმამაღალი ტონით ცდილობდა მგელაძე "საქმის გარჩევას“, რომლის მტკიცებით თურმე ყველაფერი მას უნდა ვკითხოთ (?!).
_ ქალბატონო ეკა, არ გვაქვს უფლება გამგებელს და მის მოადგილეს თქვენს გარეშე დავუკავშირდეთ?
_ გეკითხა ჩემთვის, ჩემთვის უნდა გეკითხა, მე ვარ პრესსამსახური და აქ იმიტომ ვარ, რომ მე დამიკავშირდე. ცრუ ინფორმაციას არ უნდა ავრცელებდე.
_ იქნებ დააზუსტოთ რაზე გვედავებით _ ცრუ ინფორმაციის გავრცელებისთვის თუ კომენტარები რომ თქვენს გარეშე მოვიპოვეთ?
_მომასმენინე ალეკოს (საუბარია ოზურგეთის მუნიციპალიტეტის გამგებლის მოადგილეზე. ავტ.) ჩანაწერი მაშინ, მომასმენინე სადაც ალექსანდრე ყველაშვილი გეუბნება, რომ 15 დღეა სამსახურში არ ვყოფილვარო. ანდა ვინ მოგცა ეს ინფორმაცია, რომ ალეკო სამსახურში არ დადის? ვინ გითხრა? მომასმენინე ჩანაწერი, გამაგონე, რა გითხრა ალეკო ყველაშვილმა.
_ ყოფილი ჟურნალისტი და პრესსამსახურის ხელმძღვანელი ხართ… უნდა იცოდეთ, რომ ჩანაწერის თქვენთვის მოწოდებას კანონი არ გვავალდებულებს. შეგვიძლია სასამართლოს გზა გასწავლოთ…
_სასამართლოს მიმართეო იმიტომ მეუბნები, რომ არ გაქვს ეს ჩანაწერი, მე მომასმენინე. 9 დღეა რაც წასულები არიან, თუ გამოვაკლებთ კიდევ შაბათ – კვირას ესაა, ახლა რომ იწერ დიქტოფონზე მაგასაც ვხვდები რა!
_ კარგია რომ ხვდებით… არც გვითქვამს, რომ არ ვიწერთ საუბარს, რომლის ტონი მინიმუმ უხერხულია საჯარო მოხელისთვის…
_ძალიან კარგი ტონით გესუბრები, არ გიყვირივარ …. კიდევ ერთხელ გეუბნები, რომ მუნიცპალიტეტს ჰყავს პრესსამსახური და კეთილი ინებე და დაუკავშირდი მას, თუ რაიმე ინფორმაცია გაინტერესებს. როდესაც საჯარო მოხელე პატივს გცემს, შენ უნდა დაიცვა სუბორდინაცია და გაითვალისწინო, ეს არის უბრალოდ ეთიკის ნორმები, ვსიო მორჩა!
მართალია, ასე და ამგვარად „მორჩა“ ჩვენთან საუბარს ეკატერინე მგელაძე, თუმცა, კარგი იქნება ქალბატონ ეკატერინეს მართლაც კეთილი ენება და თვალი გადაევლო ოზურგეთის მუნიციპალიტეტის გამგეობის დებულებისთვის, სადაც მისი ფუნქციები მერვე მუხლში კარგად არის განმარტებული, რომელსაც აქვე ვთავაზობთ:
მუხლი 8. სამსახურის საზოგადოებასთან ურთიერთობისა და საინფორმაციო განყოფილების ფუნქციები
სამსახურის საზოგადოებასთან ურთიერთობისა და საინფორმაციო განყოფილება დადგენილი წესით უზრუნველყოფს:
ა) გამგეობის ურთიერთობის ორგანიზებას მოქალაქეებთან, საკრებულოსთან, იურიდიულ პირებთან, გაერთიანებებთან, სახელმწიფო ორგანოებთან, სხვა თვითმმართველ ერთეულებთან და საერთაშორისო ორგანიზაციებთან;
ბ) გამგეობის ურთიერთობას მასობრივი ინფორმაციების საშუალებებთან; გამგეობის თანამდებობის პირების პრეს-კონფერენციების ჩატარების ორგანიზებას, გამგეობის საქმიანობის შესახებ ყოველთვიური პრეს-დაიჯესტის მომზადებასა და გამოქვეყნებას;
გ) საჯარო რეესტრის წარმოებას; საჯარო ინფორმაციის ხელმისაწვდომობას; მოქალაქეთა საინფორმაციო მომსახურეობას ,,ერთი ფანჯრის" პრინციპის დაცვით;
დ) მუნიციპალიტეტის ვებ-გვერდის ადმინისტრირებას;
ე) გამგეობის თანამდებობის პირების სამართლებრივი აქტების და სხვა დოკუმენტების დადგენილი წესის შესაბამისად პროაქტიულად გამოქვეყნებას;
ვ) სამსახურის სამუშაოთა გეგმების/ანგარიშების მომზადებას; გამგეობის სამსახურების სამუშაოთა გეგმების/ანგარიშების საფუძველზე გამგეობის სამუშაო გეგმის/ანგარიშის პროექტის მომზადებას;
ზ) გამგეობის სტრუქტურული ერთეულებისა და გამგებლის წარმომადგენლების კოორდინირებულ მუშაობას;
თ) ელექტრონული საქმისწარმოების დანერგვას;
ი) გამგეობის საინფორმაციო-საკომუნიკაციო სისტემის ფუნქციონირებას;
კ) გამგეობის სამსახურებისათვის საჭირო ინფორმაციის მოძიებასა და სელექციას;
ლ) მოქმედი კანონმდებლობით, გამგეობის დებულებით და მუნიციპალიტეტის თანამდებობის პირთა სამართლებრივი აქტებით განსაზღვრული სხვა ფუნქციების განხორციელებას.
ასე და ამგვარად, დებულების თანახმადაც, მგელაძის ფუნქციებში ჟურნალისტებთან ხმამაღალი ტონით საუბარი და "საქმის გარჩევები“ ნამდვილად არ შედის.
აღარაფერს ვამბობთ მართლაც ელემენტარულ ეთიკის და ზრდილობის ნორმებზე, რომელიც საზოგადოებასთან ურთიერთობისა და საინფორმაციო განყოფილების უფროსს ნამდვილად უნდა ჰქონდეს.
