1. ლესტერის კოდექსი.
მსოფლიოში ყველაზე ძვირადღირებული ხელნაწერი ლესტერის კოდექსია. ეს არის ერთგვარი ჩანაწერების წიგნი, რომელშიც ლეონარდო და ვინჩი, 1506-1510 წლებში, მილანში ცხოვრებისას თავის აღმოჩენებსა და შენიშვნებს ინიშნავდა. მანუსკრიპტი 18 ქაღალდისგან შედგება, რომლის ორივე მხარეს წარწერებია. ტექსტი განსაკუთრებული, ლეონარდოსთვის ჩვეული სტილითაა დაწერილი. მასში განხილულია ყველა ის შეკითხვა, რომელიც და ვინჩის აწუხებდა: რატომ ანათებს მთვარე, საიდან და რატომ ჩაედინება წყალი მდინარეებში, რისგან შედგებიან მინერალები. წიგნი 1994 წელს ბილ გეითსმა 30.8 მილიონ ევროდ შეიძინა.
2. ჰენრიხ ლომის სახარება.
საქსონიისა და ბავარიის ჰერცოგის, ჰენრიხ ლომის მიერ 1188 წელს გამოცემული. ხელნაწერი სახარება 226 გვერდისგან შედგება. უნიკალური ილუსტრაციებით გაფორმებული წიგნი, ჰენრიხის სიკვდილის შემდეგ დიდი ხნის განმავლობაში დაკარგულად ითვლებოდა. საბოლოოდ, ის მე-19 საუკუნეში, პრაღაში იპოვეს. წიგნი „სოტბის“ აუქციონზე გაიყიდა. მისმა ღირებულებამ 8.1 მილიონ ევრომდე მიაღწია.
3. ჯეფრი ჩოსერის „კენტერბერის ზღაპრები".
ეს წიგნი 1477 წელს გამოიცა. დღეს მისი მხოლოდ 12 ეგზემპლარია შემორჩენილი. მისი ფასი 4.6 მილიონი ევროა.
4. გუტენბერგის ბიბლია.
ერთ-ერთი პირველია იმ წიგნთა შორის, რომელიც იოჰან გუტენბერგმა და იოჰან ფასტმა გამოსცეს. ის 1455 წლით თარიღდება. სულ ამ რელიგიური შინაარსის წიგნის 180 ეგზემპლარი დაიბეჭდა, თუმცა ჩვენს დრომდე მხოლოდ 48 მათგანმა მოაღწია. ამჟამად მისი ღირებულება 5.3 მილიონი ევროა.
5. ნორტუმბერლანდის ჰერცოგის ბესტიარიუმი.
ბესტიარუმის ხელნაწერი შუა საუკუნეებით თარიღდება და ცხოველთა სამყაროს ალეგორიული აღწერების ერთგვარი ენციკლოპედიაა. წიგნი რეალური და არარეალური არსებების 112 ფერად ილუსტრაციასა და მათი აღწერის 148 გვერდს მოიცავს. მისი ფასი 2.7 მილიონი ევროა.
