“თუ 2 მარტს ეს საკითხი საკრებულომ დაუმტკიცა მერს, მე მოვუწოდებ ყველა ოზურგეთელს დაიწყონ ხელმოწერების შეგროვება მერისთვის უფლებამოსილების დროზე ადრე შეწყვეტის თაობაზე“ _აღნიშნული განცხადება ქალაქ ოზურგეთის საკრებულოს დეპუტატმა ნათია შარაშენიძემ ჟურნალისტებთან გააკეთა.
საქმე ისაა, რომ დღეს ქალაქ ოზურგეთის მუნიციპალიტეტის საკრებულოს ბიუროს სხდომა გაიმართა, სადაც ქალაქ ოზურგეთის მერმა კვლავ შეიტანა ინიციატივა ქალაქ ოზურგეთის მუნიციპალიტეტის ქონების მერის მიერ პირდაპირი განკარგვის წესით სარგებლობის უფლებით გაცემაზე.
საკრებულოს მორიგი სხდომა 2 მარტს გაიმართება.
ნათია შარაშენიძე: “დღეს ბიუროს სხდომაზე არ მომეცა საშუალება ჩემი აზრი გამომეთქვა, ამიტომ ახლა მინდა გავაკეთო კომენტარი იმასთან დაკავშირებით, რაც დღეს 27 თებერვალს ქ.ოზურგეთის მუნიციპალიტეტის საკრებულოს ბიუროს სხდომაზე მოხდა: მერმა ისევ შემოიტანა 2 მარტის საკრებულოს სხდომაზე განსახილველ საკითხად და ითხოვს ნებართვას იმაზე რაზეც ერთხელ უკვე უარი უთხრა საკრებულომ, ის, რომ მან ეს საკითხი თავიდან შემოიტანა ზუსტად იმაზე მეტყველებს, რომ მერი პატივს არ სცემს საკრებულოს გადაწყვეტილებებს და სურს საკუთარი ნება მოახვიოს თავს ხალხის მიერ არჩეულ საკრებულოს, თავად ბატონი ბეგლარი ხშირად გვახსენებს იმას, რომ თავადაც ხალხის მიერაა არჩეული და შეუძლია გაყიდოს ყველაფერი რასაც თვითონ ჩათვლის საჭიროდ, თუმცაღა ავიწყდება ის, რომ ხალხის მიერ არჩეული არ ნიშნავს იმის მანდატს, რომ შეუძლია გაასხვისოს ქალაქის ქონება ისე, რომ არავის ჰკითხოს, ამის უფლება ოზურგეთელებს ნამდვილად არ მიუცია მისთვის არამედ ის დაიქირავეს იმისთვის, რომ თითოეული მოქალაქისთვის, თითოეული ოზურგეთელისთვის სასურველი და მისაღები საქმიანობები გასწიოს, სამწუხაროა, რომ არჩეულმა მერმა ეს არ იცის ( არჩეული მეთქი ვამბობ, მაგრამ ყველა ოზურგეთელს ახსოვს არჩევნების წინა დღეები და ისიც, რომ მან პირველი რაუნდი წააგო და ისიც, რომ არც თუ ისე სასურველი მერობის კანდიდატი იყო და მოსახლეობა ივანიშვილს ხშირად საყვედურობდა ამის გამო, სამაგიეროდ დღეს რის ვაი-ვაგლახით გამხდარი მერი გვესაუბრება იმაზე, რომ ხალხისგან აქვს იმის უფლება გაყიდოს ქალაქის ის ქონება რასაც თვითონ დათვლის, გამოთვლის და მიიჩნევს, რომ გასაყიდია) და ქალაქის და ხალხის ქონებას ისე ეპყრობა, როგორც საკუთარს.
საკრებულოს პატივისცემა, რომ არ აქვს მერ ბეგლარ სიორიძეს ეს არაერთგზის გამოჩნდა სხდომებზე და დღეს კიდევ ერთდელ ბიუროს სხდომაზე“, _ აღნიშნავს შარაშენიძე. და საკრებულოში არსებულ ოპოზიციური პარტიის წარმომადგენლების მისამართით საუბრობს:
“ადგილობრივი თვითმმართველობის არჩევნების შემდეგ ოზურგეთის მოსახლეობამ არჩევანი ისე გააკეთა, რომ ქალაქს ჰყოლოდა ისეთი საკრებულო სადაც უმრავლესობაში ოპოზიციური პარტიები იქნებოდნენ, მმართველი კოალიცია კი წარმოდგენილია უმცირესობით, თუმცა ხელისუფლება დაშინების ან გადაბირების მეთოდით ყოველთვის აგროვებდა იმ ხმებს, რომელიც მათ სჭირდებოდა კონკრეტული საკითხის დასამტკიცებლად, ასეთი სხდომა იყო პირველი სხდომა სადაც თავმჯდომარე და თავმჯდომარის მოადგილე იქნა არჩეული, მას შემდეგ თითქმის 6 თვის განმავლობაში საკრებულოს არც ერთი საკითხი არ ჩაუგდია და იქმნებოდა შთაბეჭდილება, რომ იმ პარტიის დეპუტატები რომლებიც წარმოდგენილნი არიან როგორც ოპოზიციურები და პრეტენზია აქვთ ოპოზიციონერობაზე სულაც არ იყვნენ ოპოზიციონერები, არამედ ყველაფერში ეთანხმებოდნენ ხელისუფლებას და მათთვის სასურველი გადაწყვეტილებები გამოჰქონდათ, თუმცა 20 თებერვალს მოხდა ის ფაქტი რაც მოხდა, ადგილობრივმა ხელისუფლებამ განიცადა სრული კრახი და მათ მიერ გამოტანილი ბოლო საკითხი ჩააგდო.
დღეს შეგვიძლია ვთქვათ, რომ ხელისუფლებისთვის ძალიან მძიმე ეტაპი დაიწყო, ხელისუფლებას მორჩილი უმრავლესობა დაეშალა. მიმდინარეობს კონსულტაციები და რა შედეგი იქნება ამ კონსულტაციების შედეგად ამას საზოგადოება აუცილებლად შეიტყობს. მე არ გამოვრიცხავ, რომ ის რეალობა დადგეს რაც ხალხმა დაავალა თითოეულ ჩვენთაგანს არჩევნებამდე და ხმა მოგვცა სწორედ იმის გამო, რომ მმართველი კოალიცია არ ყოფილიყო ადგილობრივი ხელისუფლების სათავეში, თუ ეს ასე არ იქნება და ყველაფერი ძველებურად დარჩება ეს ნიშნავს რომ მოხდა ისევ გარიგებები, დაშინებები და ა. შ. მე მინდა ვისარგებლო შემთხვევით და ოზურგეთლებს მოვეფერო, ვუთხრა მათ, რომ ერთი წუთითაც კი არ მიღალატია მათთვის და ბოლომდე ვიბრძოლებ იმისთვის რომ მათი ნება ასრულდეს.“
