აბორტი მსოფლიოს 193 ქვეყნიდან 119 ქვეყანაშია ლეგალიზებული, რაც გულისხმობს, რომ ნებადართულია კანონით განსაზღვრულ შემთხვევაში. საქართველოში ეს შემთხვევები დადგენილია ჯანმრთელობის დაცვის შესახებ საქართველოს კანონით.
საქართველოში, ზოგადი სურათი ორსულობის შეწყვეტის ფაქტებთან დაკავშირებით საგანგაშოა. ბოლო წლების სტატისტიკური მონაცემების მიხედვით ეს რიცხვი საგრძნობლად გაიზარდა.
აღსანიშნავია, რომ აბორტების დინამიკა ყოველწლიურად მატულობს და 2004-2012 წლებში საქართველოში ორსულობის შეწყვეტის ფაქტებმა საგანგაშო ციფრს, 221 160 მიაღწია. საერთაშორისო ორგანიზაციების მონაცემებით, საქართველოში 4-ჯერ მეტი აბორტი კეთდება, ვიდრე ოფიციალურად არის რეგისტირებული, ანუ ექსპერტების გამოთვლებით, ყოველწლიურად აბორტების რაოდენობა 100 ათასს აჭარბებს.
არასრულწლოვნებში 2011 წელს 34 253 აბორტი დაფიქსირდა. 2012 წლის მაჩვენებლები 2004 წლის მონაცემებთან შედარებით კატასტროფულად, 300%-ით გაიზარდა. 2012 წლის მონაცემებით 15 წლამდე მოზარდებში აბორტის 20 შემთხვევა დაფიქსირდა. 2009, 2010, 2011 წლებში 15 წლამდე მოზარდებში აბორტის 21, 14 და 15 შემთხვევა დაფიქსირდა. სამწუხაროა, მაგრამ აბორტის რიცხვი არასრულწლოვნებში მზარდი მაჩვენებლით ხასიათდება.
არასრულწლოვნებისთვის აბორტის გასაკეთებლად, ჯანდაცვის სამინისტროდან ნებართვა და მშობლის თანხმობა არის საჭირო, შესაბამისად სამედიცინო დაწესებულებების უმეტესობა „პაციენტების მდგომარეობაში შედის“ და ამ პროცედურებისგან თავის არიდების მიზნით ჩატარებულ აბორტს „კისტის“ ოპერაციად აფორმებენ, რაც კიდევ ერთხელ მიუთითებს, რომ რეალური სურათი არასრულწლოვნებში ხელოვნური აბორტის რაოდენობის შესახებ უფრო მძიმეა ვიდრე ოფიციალური მონაცემებით ჩანს.
მიზეზები, რომლის გამოც საქართველოში, არასრულწლოვნებში აბორტის მაღალი მაჩვენებელი ფიქსირდება, უშუალოდ კავშირშია სოციალურ გარემოსთან, არასწორად გატარებულ პოლიტიკასთან. ექსპერტები, აბორტის გაახალგაზრდავების ერთ-ერთ მიზეზად მიიჩნევენ სექსუალური ცხოვრების შესახებ არასაკმარის ინფორმაციას, სწორი, ობიექტური, ჯანმრთელი ინფორმირებულობის ნაკლებობას. ინფორმაცია თუ რას იწვევს სქესობრივი კავშირი და როგორ შეიძლება არასასურველი ორსულობისგან თავის არიდება საქართველოში არ ვრცელდება, განსაკუთრებით მოზარდებში.
ინფორმაციის ნაკლებობის გარდა, აბორტის ასეთი ტემპით ზრდა გამოწვეულია დამკვიდრებული სტერეოტიპებით. ბევრი არასრულწლოვანი აბორტს, ხშირ შემთხვევაში მიმართავს, არალეგალურსაც, მხოლოდ იმიტომ, რომ ოჯახის წევრებმა არ გაიგონ და ეს არ გახდეს მათი ოჯახიდან გარიყვის მიზეზი. თუმცა, არსებობს მშობლები, რომლებიც თავად აიძულებენ არასრულწლოვნებს, აბორტის გაკეთებას, რადგან მათ არ ჰყავთ მეუღლე, ე.წ „შეცდენის“ დასაფარად, რათა თავიდან აიცილონ დაცინვა და „სირცხვილი“ საზოგადოებისგან.
აბორტის მაღალი მაჩვენებლის გამო, საქართველო დემოგრაფიული პრობლემების წინაშე დგას. გარდა ამისა, არასრულწლოვნებში აბორტი საშიშია სამედიცინო თვალსაზრისით, იგი საფრთხეს უქმნის დედის ჯანმრთელობას და უამრავ სხვა რისკთან არის დაკავშირებული.
აბორტი, როგორც ექიმი გინეკოლოგების განცხადებით არ არის მარტივი პროცედურა და ამ პროცესს შეიძლება ძალიან ბევრი გართულება მოყვეს. განსაკუთრებით, დიდია რისკი როცა პროცედურა არაპროფესიონალების მიერ ტარდება. თუმცა, ყველაზე დიდი რისკის წინაშე არასრულწლოვნები დგანან. ეს სხვადასხვა მიზეზების გამოა გამოწვეულია. პირველ რიგში, ორსულობის დადგომისთანავე ორგანიზმში გამოიხატება ჰორმონული ცვლილებები, როცა საქმე ეხება არასრულწლოვნებთან ამას ემატება ბიოლოგიურად და ასევე ფსიქოლოგიურად მოუმზადებელი ქალი, აბორტის შედეგად კი ხდება ჰორმონების მკვეთრი და უეცარი ბლოკირება, რაც თავის მხრივ სხვადასხვანაირ გამოვლინებებს იწვევს. ინფექციის შეჭრა, სისხლდენა, ძლიერი სტრესი ეს აბორტის „გვერდითი ეფექტების“ ჩამონათვალია, სხვადასხვა შემთხვევებს თუ განვიხილავთ აბორტმა არასრულწლოვნების ასაკში შეიძლება გამოიწვიოს უშვილობა, ყველაზე ცუდ შემთხვევაში სიკვდილი.
