27 იანვარს გაიმართა ლანჩხუთის მუნიციპალიტეტის საკრებულოს სხდომა, რომელსაც მარინა თოთლაძეც ესწრებოდა. შეგახსენებთ, რომ თოთლაძე ლანჩხუთის ხელმძღვანელობისგან საფეხბურთო კლუბ ლანჩხუთის"გურიასადმი" სესხად გაცემულ 150 ათას ლარს ითხოვს. თოთლაძის ძმა, კობა მირზაშვილი ა(ა)იპ საფეხბურთო კლუბ"გურიას" დირექტორად 2012 წლის საპარლამენტო არჩევნების შემდეგ დაინიშნა და თანამდებობიდან გასული წლის ხუთ აგვისტოს გაათავისუფლეს.
თავის მხრივ, მუნიციპალიტეტის გამგებელი ზაზა ურუშაძე თოთლაძისგან საბუთს ითხოვს, რომელიც დაამტკიცებს, რომ ოფიციალურად ასესხა თანხა კლუბს და უკან დაუბრუნებენ.
მარინა თოთლაძე გარკვეულ ბრალს სდებს ნიგოითის თემის მაჟორიტარ დეპუტატს თემურ ალექსაიას, რომელსაც თვითმმართველობის არჩევნებამდე კლუბში მირზაშვილის მოადგილის პოსტი ეკავა.
_"მინდა დავამტკიცო, რამდენი იყო გახარჯული ჩემი თანხა. მეგონა, სიკეთეს ვაკეთებდი ლანჩხუთისთვის. თემურ ალექსაიამ, როცა გამგებელის კაბინეტში შევხვდით ერთმანეთს და ვისაუბრეთ, განაცხადა, რომ პირადი ანგარიშიდან 26 ათასი ლარი ჰქონდა გახარჯული. ჯერ თქვა, ჩეკები ბუღალტერს აქვსო, შემდეგ კი განაცხადა, ჩემს ძმასთანააო. გამგებელი ჩემგან საბუთის წარმოდგენას ითხოვს, რაც არ შემიძლია. 34 ათასი ლარი, რომელიც ფეხბურთელებზე გავეცი და ალექსაიამ ისინი შეცდომაში შეიყვანა, დაადასტურა ერთ-ერთმა მწვრთნელმა გია ჩხაიძემ. ეს თანხა გავეცი, თუმცა, გამოდის, რომ უარი უნდა ვთქვა. შემდეგ კიდევ 52 ათასი ლარი, რომელზეც გამოდის, რომ ისევ უარის თქმა მიწევს. მაღაზიებიდან აღებული ნისიები 59 ათას ლარამდე, რომელიც კლუბს მე დავუფარე. გამოდის, ესეც უნდა დავთმო.
ბატონო გამგებელო, ჩემთვის ცნობილია, რომ კლუბთან დაკავშირებით ჩაგივარდათ ორი ტენდერი, მაშინ, როცა ჩემი ძმა იყო კლუბის ხელმძღვანელი, ბიუჯეტში არ იყო თანხა და შესაბამისად, ტენდერიც ვერ გამოცხადდებოდა. მაინტერესებს, რატომ არ მოხდა კლუბის რეორგანიზაცია და რატომ არ გაუქმდა საერთოდ. თქვენგან და საკრებულოს თავმჯდომარისგან ვითხოვ პასუხს, ვითხოვ ჩემი თანხის დაბრუნებას, რომელიც გავეცი უპროცენტოდ. ბატონი ზაზა ამბობს, მომეცი საბუთები და თანხას დაგიბრუნებო, თუმცა, რაც არის 52 ათასზე, იმის გაწერაც კი ვერ მოხერხდა დღემდე.
დეპუტატმა ალექსაიამ ჩაიდინა დანაშაული. მაინტერესებს, კობა მირზაშვილს, რომელმაც 30 მარტს დაასაფლავა შვილი, ექნებოდა სურვილი ან აზრი, დაეფარა თემურ ალექსაიას შვილის ქორწილის ხარჯები? ჩემი ძმის მაშინდელი მდგომარეობით ისარგებლა ალექსაიამ, ხელი მოაწერინა და შვილის ქორწილის თანხა გადაარიცხვინა რესტორან"ნიკალასათვის".
რადგან სხვა გზას არ მიტოვებთ, მოვითხოვ ჩამოვიდეს ფინანსური პოლიცია, შეისწავლოს კლუბში არსებული მდგომარეობა ჩემი ძმის ხელმძღვანელობის პერიოდიდან. მე არ მეშინია! ჩემმა ძმამ ჩემი თანხა დახარჯა და კლუბს მოახმარა და მადლობის ნაცვლად რა მივიღე?! კანონის წინაშე ყველა თანასწორია და თუ დასაჭერი და დასასჯელია, დაისაჯოს ჩემი ძმა", _ აცხადებს თოთლაძე.
თოთლაძის შემდეგ კომენტარი თემურ ალექსაიამაც გააკეთა: ეს არის სრული დემაგოგია. მე, პირადად, მივმართავ სასამართლოს და პასუხს გაგებინებთ ამ დემაგოგიური განცხადებისთვის. თქვენ ძირითადი დამფინანსებელი იყავით ჭყონიას შტაბის და რახან ვერ გაიმარჯვეთ არჩევნებში, რევანშისტული განწყობა გამოძრავებთ. როცა ჭყონიას შტაბში გადახვედით, მე არ დაგიდექით გვერდით და ამიტომ აკეთებთ მსგავს განცხადებებს. მე არ მეშინია, იმიტომ, რომ მართალი ვარ ყველაფერში! _ თქვა ალექსაიამ.
