_ ამ განცხადებით “გურია ნიუსის” ოზურგეთის განყოფილებას ოზურგეთის მუნიციპალიტეტის სოფელ ნატანებში მცხოვრებმა ერთ-ერთმა მოქალაქემ მომართა.
ინფორმაციის დასაზუსტებლად “გურია ნიუსი” ოზურგეთის მუნიციპალიტეტის სოფელ ნატანებში მექანიზაციის ცენტრში მივიდა. იქ მისულებს ინდმეწარმე გელა გამყრელიძე ოფისში დაგვხვდა.
როგორც “გურია ნიუსი” წერდა, აშშ-ის ელჩმა საქართველოში, ჯონ ბასმა, ადგილობრივ ხელისუფლებასთან ერთად ნატანების მექანიზაციის სერვისცენტრი, 4 ნოემბერს საზეიმოდ გახსნა.
ნატანებელმა ინდმეწარმემ, გელა გამყრელიძემ გრანტის სახით 110 ათასი აშშ დოლარი მიიღო. როგორც სერვისცენტრის წარმომადგენლებმა “გურია ნიუსთან” საუბარში თქვეს, ადგილობრივ მცირე ფერმერებს მაღალტექნოლოგიურ ფასიან მომსახურებას (თესვას, ხვნას, კულტივაციას) გაუწევენ, ასევე, სარგებელს ნახავს 400 ფერმერი. უნდა დამუშავდეს 800 ჰექტარი სასოფლო-სამეურნეო სავარგული. ცენტრის გახსნის დღეს, სამანქანო მომსახურების ცენტრი, 9 ტრაქტორით და 21 სამანქანო იარაღით იყო დაკომპლექტებული.
თუმცა, იქ მისულებს ადგილზე მხოლოდ ერთი ტრაქტორი დაგვხვდა. მიზეზი კი, გამყრელიძის თქმით ისაა, რომ სამუშაო სეზონი არაა და საწყობში ყინავს(?!), ამიტომ ტრაქტორები მძღოლების ავტოფარეხებში დგას:
_ რა გაინტერესებთ? _ აქეთ დაგვისვა კითხვა გამყრელიძემ.
_ თუ შეიძლება, ტრაქტორები გვაჩვენეთ.
_ მძღოლებს ჰყავთ სახლში. ერთი საწყობში გვყავს, ერთი აგერ არის ახლოს, რამდენიმე _ იქეთ უბანში, ერთი ურეკშია. სულ შვიდი ტრაქტორია. შემიძლია, წაგიყვანოთ და გაჩვენოთ. ვისაც ტრაქტორი გავატანე, სახლში უყენიათ, რა უნდა აქ ტყუილად დაყენებულ ტრაქტორს? ყინვაა, არ შეიძლება(?!). თუ ვინმეს სამუშაოს შესრულება უნდა, დამირეკავენ და მოვემსახურებით. ახლა არაფრის სეზონი არაა, წამლობა არაა, ციტრუსის მასიური კრეფა, ჯერჯერობით, არაა, ხვნა-თესვის სეზონი, კი იცით, გაზაფხულამდე არ იქნება. მეტი რა გითხრათ?!
_ მექანიზაციის ცენტრის გახსნაზე თქვით, რომ ცენტრში 2 ადგილობრივია დასაქმებულიო. რამდენი ადამიანი გყავთ დასაქმებული და გაეცით თუ არა ჯერ ხელფასები?
_ ჯერ რა ხელფასი უნდა უნდა გავცე? 4 ნოემბერს გავხსენით. ჯერჯერობით, 10 მძღოლი მყავს აყვანილი. ეს სპეციფიკური პროფესიაა, თანამედროვე ტექნიკას თანამედროვე სპეციალისტი სჭირდება და ყველას ვერ დავასაქმებ. ისე, რა იყო, რა ხდება, რაიმე ინფორმაცია გაქვთ ჩემზე? _ გაკვირვებული ჩანდა ინდმეწარმე.
_ მექანიზაციის პროექტი 30 თვეს მოიცავს და 5.1 მლნ. აშშ დოლარის ოდენობის პროგრამაა. ეს თანხა იმ დაპირებული 1 მილიარდი დოლარის ნაწილია, რომელიც ამერიკის მთავრობამ ომის შემდგომ პერიოდში გამოუყო საქართველოს დახმარების მიზნით. პროექტი დააფინანსებს კერძო მფლობელობაში არსებულ 25-მდე სამანქანო მომსახურების ცენტრის განვითარებას მთელი ქვეყნის მასშტაბით. პროგრამის გახორციელების შედეგად, სასოფლო სამეურნეო მანქანა-დანადგარები უფრო ხელმისაწვდომი გახდება მცირე ფერმერებისთვის. ქვეყნის მასშტაბით, დაახლოებით, 250 სამუშაო ადგილი შეიქმნება. მომსახურება გაეწევა 14 ათას მცირე ფერმერს, რომელთა შემოსავალი 10 მლნ აშშ დოლარით გაიზრდება, _ თქვეს აღნიშნული პროექტის წარმომადგენლებმა, ცენტრის გახსნაზე.
