როგორც მოსალოდნელი იყო, პარლამენტმა საყდრისი-ყაჩაღიანის საბადოსთან დაკავშირებული დროებითი კომისიის დაკომპლექტების საკითხი ჩაააგდო. კანონპროექტს მხარი არ დაუჭირეს უმრავლესობაში შემავალმა იმ ფრაქციებმა და დამოუკიდებელმა დეპუტატებმაც, რომლებმაც გასული წლის დეკემბერში კომისიის შექმნა მიზანშეწონილად მიიჩნიეს. დეპუტატების ნაწილი სხდომაზე საერთოდ არ გამოცხადდა, დარბაზში მყოფმა უმრავლესობის წევრებმა კი კანონპროექტის წინააღმდეგოდ მისცეს ხმა.
"სამწუხაროდ პარლამენტის გადაწყვეტილება მოსალოდნელი იყო არა იმიტომ, რომ კანონიერი იყო, არამედ უმრავლესობამ გადაწყვიტა არ შექმნილიყო ეს კომისია. როდესაც პირველი მოსმენით პარლამენტმა მიიღო დადგენილება კომისიის შექმნის შესახებ, მას მხარი დაუჭირეს უმრავლესობაში შემავალმა რესპუბლიკურმა ფრაქციამ და ფორუმმა მთლიანად. ასევე, დამოუკიდებელმა დეპუტატებმა. პარლამენტის ეს გადაწყვეტილება რა თქმა უნდა, სრულიად მოულოდნელი აღმოჩნდა "ოცნების" ლიდერებისთვის და აღმასრულებელი ხელისუფლებისთვის. შესაბამისად, მათ სრული მობილიზაცია მოახდინეს და უმრავლესობის დეპუტატებს მოსთხოვეს, რომ არაფრით არ გასულიყო კომისიის შემადგენლობის საკითხი", _ ამბობს "თავისუფალი დემოკრატების" წევრი ნინო გოგუაძე "გურია ნიუსთან".
დეპუტატის თქმით, პარლამენტმა კანონი დაარღვია, როდესაც მის მიერვე მიღებული დადგენილების წინააღმდეგ გაილაშქრა.
"ამით დეპუტატებმა დაარღვიეს სამართლებრივი წესრიგი, რადგან პარლამენტის დადგენილება შესასრულებლად სავალდებულოა პარლამენტის ყველა წევრისათვის. რამდენადაც გუშინდელ სხდომაზე საუბარი იყო მხოლოდ კომისიის შემადგენლობაზე, ჩვენ მივმართეთ უმრავლესობას და ვკითხეთ, თუ კომისიის რომელიმე წევრის მიმართ ჰქონდათ პრეტენზია, ჩვენ მათ სხვა წევრებით შევცვლიდით. ამაზე მათ განაცხადეს, რომ კომისიის წევრებთან დაკავშირებით არანაირი პრეტენზია არ არსებობდა და ამის მიუხედავად მხარი არ დაუჭირეს კომისიის შემადგენლობას.
ამით მოხდა ორი ძალიან მნიშვნელოვანი რამ – ერთი, რომ პარლამენტის უმრავლესობა არ დაემორჩილა კანონს და მეორე, სწორედ პარლამენტის უმრავლესობის ინტერესებში უნდა ყოფილიყო კომისიის შექმნა თუ რა თქმა უნდა, დარწმუნებულები არიან, რომ იქ დანაშაული არ არის ჩადენილი.
გუშინდელი გადაწყვეტილებით უმრავლესობამ მხოლოდ გააძლიერა ეჭვი, რომ საყდრისში მართლაც დანაშაულია მოხდა", _ ამბობს გოგუძე.
მისვე თქმით, "თავისუფალი დემოკრატები" მომავალშიც აპირებენ პარლამენტში საყდრისის საკითხის დაყენებას.
"რამდენჯერაც ჩააგდებენ, იმდენჯერ დავაყენებთ ამ საკითხს, რათა საზოგადოებას და ხელისუფლებას არასოდეს დაავიწყდეს საყდრისი. ასე მოქცევა ძალიან ძვირად დაუჯდება ხელისფლებას."
პარლამენტში საყდრისის საკითხის განმეორებით დაყენებას აპირებს "ერთიანი ნაციონალური მოძრაობაც". პარლამენტის გუშინდელი გადაწყვეტილება არც დეპუტატ სერგო რატიანისთვის ყოფილა მოულოდნელი.
"დამრჩა ისეთი შთაბეჭდილება და ეს ასეც იყო, რომ ამ დროის განმავლობაში ძალიან დიდი ზეწოლა მიმდინარეობდა დეპუტატებზე და სხვათაშორის გუშინ კანონპროექტს იმათაც კი არ დაუჭირეს მხარი, ვისაც კომისიის მიზანშეწონილობასთან დაკავშირებით განსხვავებული პოზიცია ჰქონდა. ანუ კენჭის ყრის დროს დარბაზში იყვნენ მხოლოდ ისინი, ვინც მხარს არ უჭერდა საკითხს, ხოლო ისინი, ვისაც შინაგანი დისკომფორტი ჰქონდა ამის გამო, საერთოდ არ დასწრებიან სხდომას.
ფაქტობრივად უმრავლესობა დაემორჩლა ბიძინა ივანიშვილის და მთავრობის ზეწოლას და უარი თქვა გამოეძიებინა ბოლოს დროის ყველზე სერიოზული და მასშტაბური დანაშუალი ქართული კულტურის წინააღმდეგ", _ ამბობს რატიანი.
მისივე თქმით, "ნაციონალური მოძრაობა" საყდრისთან დაკავშირებით საკანონმდებლო ორგანოში ბრძოლას გააგრძელებს.
"ამით ეს საკითხი არ დასრულდება, პირადად მაქვს შეტანილი და უნდა იყოს დადგენილება საყდრისში სამუშაოების შეჩერების შესახებ. გარდა ამისა, არ მოვეშვებით არც საგამოძიებო კომისიის შექმნის საკითხს", _ ამბობს რატიანი.
საყდრისის გადარჩენის საზოგადოებრივი კომიტეტი პროკურატურაში საჩივარს ამზადებს და ყველა იმ ჩინოვნიკის დასჯას მოითხოვს, რომლებმაც, მათი თქმით, უკანონო გადაწყვეტილებებით პრეისტორიული ძეგლი განადგურებამდე მიიყვანეს.
"საყდრისის კომიტეტი მიესალმება პრემიერის მიერ პროკურატურაში ახალი დეპარტამენტის შექმნას და რადგანაც მივიჩნევთ, რომ საყდრისთან მიმართებაში საჯარო მოხელეების მიერ ჩადენილია სისხლის სამართლის დანაშაული, ჩვენ აუცილებლად მივმართავთ ამ დეპარტამენტს და მოვითხოვთ გამოძიების დაწყებას", _ ამბობს კომიტეტის წევრი ირაკლი მამალაძე.
მიუხედავად იმისა, რომ პარლამენტმა გასული წლის დეკემბრის ბოლოს, საყდრისი-ყაჩაღიანის საბადოს საკითხთან დაკავშირებით, საგამოძიებო კომისიის შექმნის მიზანშეწონილობას დაუჭირა მხარი, გუშინ თავადვე ჩააგდო კომისიის შექმნის საკითხი.
ფორუმმა და რესპუბლიკელებმა საყდრისის თემა პრიორიტეტად აღარ მიიჩნიეს და შესაბამისად 76 ხმის ნაცვლად კანონპროექტმა მხოლოდ 55 ხმა დააგროვა, აქედან, როგორც სერგო რატიანი ამბობს, დაახლოებიით 39 ხმა "ნაციონალური მოძრაობის" წევრებს ეკუთვნოდათ.
