2015 წლის ზაფხულის რიგით მე-13 ახალგაზრდული ოლიმპიური ფესტივალისთვის, თითქმის ყველაფერი მზადაა – ოლიმპიურ სოფელში, რომელიც თბილისის ზღვის მიმდებარე ტერიტორიაზე შენდება, მხოლოდ ეზოს მოსაპირკეთებელი სამუშაოებია დარჩენილი. ხოლო, იმ შენობების რეაბილიტაცია, რომელიც ამას საჭიროებდა, კომიტეტის თავმჯდომარის მოადგილის ინფრასტრუქტურულ საკითხებში, იოსებ დარჩიას ინფორმაციით, უკვე დასრულებულია.
უფრო კონკრეტულად, კი რიგით მე-13 ახალგაზრდული ოლიმპიური ფესტივალისთვის 7 ახალი შენობა აშენდა, ხოლო 3-ს რეაბილიტაცია ჩაუტარდა.
"რებილიტირებულია კოსტავას 45 ნომერში მდებარე საკალათბურთო დარბაზი, ბელიაშვილის 5 ნომერში მდებარე ძიუდოს აკადემია და მიხეილ კეკელიძის სახელობის, წერეთლის 95ა-ში მდებარე საკალათბურთო სკოლას. აქ მხოლოდ ინვენტარის შეტანას ელოდებიან.
რაც შეეხება მშენებლობებს, ჯამში 7 ახალი ნაგებობა შენდება, საიდანაც ორს – საცურაო აუზს ახალი თბილისს ტერიტორიაზე და მაღლივ კორპუსთან ხელბურთის დარბაზს, სპორტისა და ახალგაზრდობის საქმეთა სამინისტრო აწარმოებს, ხოლო ხუთს – თავად კომიტეტი.
კომიტეტის მიერ წარმოებული მშენებლობები მოიცავს ტანვარჯიშისა და ფრენბურთის სასახლეებს, მძლეოსნობის სტადიონს, მზიურის მიმდებარე ტერიტორიაზე 11 საჩოგბურთო კორტს, საიდანაც 9 ღია იქნება, ხოლო 2 დახურული.
კომიტეტი ახალი თბილისის ტერიტორიაზე აშენებს 3 ვარსკვლავიან სასტუმროს, სადაც მხოლოდ შიდა კოსმეტიკური სამუშაოებია დარჩენილი.
რაც შეეხება ოლიმპიურ სოფელს, როგორც ზემოთ ავღნიშნეთ, მისი მშენებლობა დასრულდა და მხოლოდ ეზოს მოსაპირკეთებელი სამუშაოებია დარჩენილი", _ აღნიშნავს ოლიმპიური კომიტეტის საორგანიზაციო საბჭოს თავმჯდომარის მოადგილე ინფრასტრუქტურულ საკითხებში, იოსებ დარჩია.
აღსანიშნავია, რომ საპროექტო გეგმის მიხედვით, ოლიმპიური სოფელი საცხოვრებელი ბინით 3 800 სპორტსმენს უზრუნველყოფს.
ცნობისთვის, მიმდინარე წლის თებერვალში, 2015 წლის ზაფხულის რიგით მე-13 ახალგაზრდული ოლიმპიური ფესტივალის სამზადისს ინსპექტირება ჩაუტარა ევროპის ოლიმპიურმა კომიტეტმა.
როგორც კომიტეტის თავმჯდომარე ჯოზეფ ლიბამ აღნიშნა, ის სამზადისით კმაყოფილია.
"ჩვენ დავასრულეთ ევროპის ახალგაზრდული ოლიმპიური ფესტივალის ობიექტების ინსპექტირება. მდგომარეობა შევამოწმეთ, თუ რამდენად მზად იქნებიან ივლისის ბოლოსთვის ფესტივალის ჩასატარებლად. დიდი პროგრესი შეიმჩნევა წინა ვიზიტის შემდეგ. წინსვლა აღინიშნება როგორც სპორტსმენთა სოფლის მშენებლობის თვალსაზრისით, ასევე სპორტული ობიექტების კუთხითაც. ბოლო ინსპექტირების დროს გარკვეული პრობლემები არსებობდა ხელბურთისა და ცურვის სპორტულ ბაზებთან დაკავშირებთ, მაგრამ დღეს დავინახე, რომ არსებობს დიდი პროგრესი და ეს დამაკმაყოფილებელია", – განაცხადა ჯოზეფ ლიბამ.
ღონისძიებისთვის, რომელიც ივლისის მიწურულს დაიწყება, დაახლოებით 7 000-მდე სტუმარს ელოდებიან, მათ შორის 1 500-მდე ოფიციალურ პირს.
შეგახსენებთ, საქართველომ 2015 წლის ზაფხულის რიგით მე-13 ახალგაზრდული ოლიმპიური ფესტივალის ჩატარების უფლება, 2010 წლის 27 ნოემბერს მოიპოვა, როცა ბელგრადში ევროპის ოლიმპიური კომიტეტების რიგით 39-ე გენერალური ასამბლეა გაიმართა.
ასამბლეაში 49 ქვეყნის ეოკ-თან ერთად საქართველოც მონაწილეობდა. ფარული კენჭისყრის შედეგად კი, ქვეყანამ ჩეხეთის დედაქალაქ ბრნოს 5 ხმით აჯობა, (26-21) და საზაფხულო ოლიმპიური ფესტივალის ჩატარების უფლებაც მოიპოვა.
ახალგაზრდული ოლიმპიური ფესტივალის პროგრამაში სპორტის ცხრა სახეობაა – ძიუდო, ჩოგბურთი, სპორტული ტანვარჯიში, ველოსპორტი, მძლეოსნობა, ცურვა, ფრენბურთი, ხელბურთი, კალათბურთი.
ოფიციალური მონაცემებით, თბილისში 49 ქვეყნის 3 800-მდე სპორტსმენი მოიყრის თავს.
