საპარლამენტო კულუარებში შეთანხმებულ ინიციატივაზე, რომელიც უკრაინაში მებრძოლი ქართველების ოჯახებზე კანონით დადგენილი შეღავათებისა და პრივილეგიების გაცემას გულისხმობდა, დღეს ჯანდაცვისა და სოციალურ საკითხთა კომიტეტმა, უარყოფითი დასკვნა გასცა.
აღნიშნული ინიციატივა ფრაქცია "ერთიანმა ნაციონალურმა მოძრაობამ" ბიუროზე 2014 წლის დეკემბერში დაარეგისტრირა. ის ომისა და სამხედრო ვეტერანების შესახებ კანონში ცვლილებას გულისხმობდა.
"ნაციონალური მოძრაობა" ითხოვდა, რომ უკრაინაში გარდაცვლილ ქართველ სამხედროებსა და მათი ოჯახის წევრებს იგივე სტატუსი მიენიჭებოდათ, რითიც საქართველოს ერთიანობისთვის დაღუპული გმირების ოჯახები სარგებლობენ.
თუმცა, დღეს, პარლამენტში ჯანდაცვისა და სოციალურ საკითხთა კომიტეტმა საკითხი ჩააგდო. მიზეზად კი, კომიტეტის თავმჯდომარე დიმიტრი ხუნდაძემ, უკრაინაში დაღუპული ქართველების პოლიტიკური სპეკულაციისთვის გამოყენება დაასახელა.
"საქმე გვაქვს ისევ პოლიტიკურ სპეკულაციასთან, რაშიც სამწუხაროდ, უკრაინის ტერიტორიული მთლიანობისათვის დაღუპული ბიჭების სახელს იყენებენ და ცდილობენ ამ მგრძნობიარე თემით მოსახლეობა ჩვენს წინააღმდეგ განაწყონ", _ აღნიშნა ხუნდაძემ.
მისივე თქმით, პირს შეუძლია მონაწილეობა მიიღოს სხვა ქვეყნის ტერიტორიული მთლიანობისათვის ბრძოლაში იმ პირობით, თუ მის მონაწილეობას დათანხმდებიან იმ სხვა ქვეყნის კომპეტენტური ორგანოები. ამ შემთხვევაში ურთიერთვალდებულება წარმოიქმნება ამ პირსა და იმ სხვა ქვეყანას შორის.
"ჩვენ ვალდებულებას ვიღებთ იმ პირების სიცოცხლესა და ჯანმრთელობაზე, რომლებიც ქვეყნის შიგნით თუ საერთაშორისო დონეზე მონაწილეობას იღებენ სახელმწიფოს მხრიდან საომარ ქმედებებში ან სამშვიდობო მისიებში ჩართულობის გადაწყვეტილების შედეგად. ამ კონკრეტულ შემთხვევაში სახელმწიფოს კანონით ვერ დავავალდებულებთ, კომპენსაცია ან სოციალური დახმარება გასცენ იმ პირებზე, რომლებიც საკუთარი ნებით და არა სახელმწიფოს გადაწყვეტილებით იღებენ მონაწილეობას სხვა ქვეყნის საომარ ქმედებებში.
ფრაქცია "ერთიანი ნაციონალური მოძრაობის" მიერ წარმოდგენილი ინიციატივა არა მარტო პოლიტიკური სპეკულაციაა, არამედ საფრთხეს უქმნის ქვეყნის უსაფრთხოებას", _ აღნიშნა ხუნდაძემ.
თუმცა, როგორც საპარლამენტო უმცირესობის წარმომადგენელი ლევან ბეჟაშვილი "გურია ნიუსთან" ამბობს, მისთვის გაურკვეველია უმრავლესობის ეს პოზიცია, რადგან კულუარულად და ზოგჯერ საჯარო განცხადებებშიც, ისინი ენმ-ს აღნიშნულ ინიცატივას მხარს უჭერდნენ.
"ეს ინიციატივა, რომელიც ჩვენმა ფრაქციამ წარადგინა, უკრაინაში მებრძოლი საქართველოს მოქალაქეებისთვის, გარდაცვალების შემთხვევაში, ვეტერანის სტატუსის მინიჭებას ითავლისწინებდა.
მათი გათანაბრება უნდა მომხდარიყო ტერიტორიული მთლიანობისთვის მებრძოლის სტატუსთან. შესაბამისად, ინიციატივის თანახმად, სახელმწიფოს მხრიდან მებრძოლეების ოჯახის წევრების ფინანსური უზრუნველყოფა უნდა მომხდარიყო.
ამ შემთხვევაში პარლამენტში პოზიციები ერთნაირი იყო. კულუარულად და ზოგიერთი საჯარო განცხადებითაც, უმრავლესობის მხრიდან ითქვა, რომ საქართველოს მოქალაქეები, რომლებიც დღეს უკრაინაში იბრძვიან, საქართველოს საქმესაც აკეთებენ.
სწორედ ამით იყო განპირობებული ეს ინიციატივა, რომ მთავრობისთივს შეგვექმნა სამართლებრივი საფუძველი, რათა სახელმწიფოს მათი ოჯახის წევრებისათვის გარკვეული სოციალური გარანტიების შეექმნის ვალდებულება აეღო", _ ამბობს ბეჟაშვილი და დასძენს, რომ აღნიშნული წინადადება საფინანსო-საბიუჯეტო კომიტეტს განხილული ჰქონდა, მეტიც, გარკვეული ცვლილებებით მხარი დაუჭირა კიდეც.
"დღეს ჯანდაცვის კომიტეტმა ამ კანონპროექტზე უარყოფითი დასკვნა გასცა. მიზეზები გაურკვეველია. კულუარულად, თითქოს ყველა ეთანხმება შინაარს, თუმცა საბოლოოდ უარი თქვეს იმ მოტივით, რომ ჩვენ უფრო უნდა დავფიქრდეთ, სახელმწიფოებრივად ვიაზროვნოთ.
თუმცა, ჩვენ გვექნება შანსი, რომ ეს საკითხი კიდევ დავაყენოთ", _ უთხრა "გურია ნიუსს" ბეჟაშვილმა.
