"მოგმართავთ თხოვნით ყურად იღოთ და გულთან მიიტანოთ ჩვენი პრობლემები, რადგანაც ჩვენც ამ მუნიციპალიტეტის ნაწილი ვართ და ჩვენ არ ვითხოვთ იმას, რისი გაკეთებაც ხელისუფლებას არ შეუძლია" _აღნიშნული განცხადება ოზურგეთის მუნიციპალიტეტის სოფელ ოზურგეთისა და გურიანთის დამაკავშირებელი გზის მაცხოვრებლებს ეკუთვნით.
მათი თქმით, გზის ეს მონაკვეთი ჩასმული იყო 2015 წლის განსახორციელებელ პროექტებში, თუმცა ის პროგრამიდან ამოიღეს.
"ორი სოფლის დამაკავშირებელი ცენტრალური გზის ამ ერთკილომეტრიან მონაკვეთზე ავტომანქანით გავლა გაუსაძლისი ხდება ყოველდღე, არაფერს ვამბობთ ფეხით მოსიარულეების გადაადგილებაზე.
ამ მონაკვეთის ავარიულობისა და უვარგისობის შესახებ იცის მთელმა მუნიციპალიტეტმა, რადგან არც ტაქსი მოგვყვება არანაირი გასამრჯელოს ფასად, არც ამ ცენტრალურ გზაზე მომუშავე მიკროავტობუსების მძღოლების წუწუნი გვიკვირს.
რაც შეეხება გადაუდებელ სასწრაფო მომსახურებას, მართალია ჩვენი მედიკოსები უარს არ გვეუბნებიან, მაგრამ გზის უვარიული მდგომარეობის გამო, ხშირად, დროულად ვერ გვიწევენ მომსახურებას, არადა შეიძლება ამ დროს რამდენიმე წუთსაც ჰქონდეს გადამწყვეტი მნიშვნელობა.
მოგმართავთ თხოვნით ყურად იღოთ და გულთან მიიტანოთ ჩვენი პრობლემები, რადგანაც ჩვენც ამ რაიონის ნაწილი ვართ და ჩვენ არ ვითხოვთ იმას, რისი გაკეთებაც ხელისუფლებას არ შეუძლია", _ განცხადებას ხელს 30-მდე მოქალაქე აწერს.
აღნიშნული გზაზე ცხოვრობს ოზურგეთის მუნიციპალიტეტის საკრებულოს თავმჯდომარის მოადგილე დიმიტრი კვერღელიძე, რომელიც "გურია ნიუსთან" განმარტავს, რომ სოფელ ოზურგეთისა და გურიანთის დამაკავშირებელი ცენტრალური გზის სრული რეაბილიტაცია და კაპიტალურად შეკეთება 2016 წელს მოხდება.
"აღნიშნული გზის კაპიტალური რეაბილიტაცია ვერ მოხდებოდა "სოფლის მხარდამჭერი პროგრამის" თანხებით, 2016 წელს კი გადაიჭრება ეს პრობლემა " _ამბობს კვერღელიძე.
ფოტოები, რომელიც მასალას ახლავს, სწორედ სოფელ ოზურგეთისა და გურიანთის დამაკავშირებელ გზის მონაკვეთზეა გადაღებული.
