ლანჩხუთის ახალგაზრდა რაგბისტთა გუნდი, რომელიც მუნიციპალიტეტის სპორტული ცენტრის ბაზაზე არსებობს და საქართველოს ეროვნული ჩემპიონატის „ბ“ ლიგაში ასპარეზობს, დაბა ურეკში ერთ კვირიან სასწავლო-საწვრთნელო შეკრებას გადის მწვრთნელების – ალექსანდრე წილოსანისა და გურამ პატარაიას თაოსნობით.
მოსამზადებელ პერიოდში ლანჩხუთელმა რაგბისტებმა ამხანაგური შეხვედრა გამართეს ფოთის სარაგბო გუნდთან და მეტოქე დამაჯერებელი ანგარიშით 24:7 დაამარცხეს.
აღსანიშნავია, რომ ფოთელებს ლანჩხუთელებთან შედარებით ბევრად უკეთეს პირობები გააჩნიათ სავარჯიშოდ. აქვთ ევროსტანდარტების შესაბამისი ორი სარაგბო სტადიონი და ფინანსური თვალსაზრისიტაც ბევრად უკეთესი მდგომარეობაში იმყოფებიან.
გუნდის ხელმძღვანელობის თქმით, ლანჩხუთელებს წინ კიდევ ერთი ამხანაგური შეხვედრა ელის ქობულეთის „პონტოსთან“.
სარაგბო ჩემპიონატი სტარტს მიმდინარე წლის 19 მარტს აიღებს, სადაც ლანჩხუთელებთან ერთად ჯგუფში ვანის „არგო“ და ქუთაისის ორი გუნდი „ბაგრატი“ და „აია“ იასპარეზებენ.
თავის მხრივ სპორტული ცენტრის დირექტორი, მინდია დვალიშვილი ამბობს, რომ გუნდს მიზნად სერიოზული გეგმები აქვს დასახული, თუმცა აქვე იმასაც აღნიშნავს, რომ ოდნავი მეტი დაფინანსების პირობებში ლანჩხუთელებს რაგბში გაცილებით სერიოზული შედეგების მიღწევაზეც შეეძლებოდათ ფიქრი.
