ქალაქ რუსთავის ცენტრალურ პარკში, ტბის გარშემო, "განახლებადი ენერგეტიკისა და ენერგოეფექტურობის ახალი პროექტის" ფარგლებში, განათების არსებული ძველი სისტემა ეკონომიური შუქდიოდური (LED) განათებით შეიცვალა.
სამუშაოები "BP საქართველოსა" და მისი პარტნიორების დაფინანსებით, ენერგოეფექტურობის ცენტრმა განახორციელა.
განხორციელებული პროექტი რუსთავს, როგორც "მერების შეთანხმების“ ხელმომწერ ქალაქს, აღებული იმ ვალდებულებების შესრულებაში დაეხმარება, როგორიცაა მის ტერიტორიაზე 2020 წლისთვის ნახშირორჟანგის ემისიის 20%-ით შემცირება და სუფთა ენერგოტექნოლოგიების გამოყენების 20%-ით გაზრდა.
აღნიშნული პროექტი რუსთავს ყოველწლიურად 20 ათასი ლარის ეკონომიას გაუკეთებს, რომელის ქალაქს ელექტროენერგიაში უნდა გადაეხადა.
"ენერგოეფექტურობის“ ცენტრის დირექტორმა, "მერების შეთანხმების“ წარმომადგენელმა საქართველოში, გიორგი აბულაშვილმა "გურია ნიუსთან“ საუბრისას აღნიშნა, რომ უკვე 5 წელია "BP საქართველოსთან“ ერთად ქვეყანაში მსგავსი ენერგოეფექტური პროექტები ხორციელდება.
"ვახორციელებთ ენერგოეფექტურ პროექტებს, რომელსაც სოციალური დატვირთვაც აქვს. რუსთავში განხორციელებული პროექტის ღირებულება დაახლოებით 40 ათას დოლარამდე იყო. ამ პროექტის შედეგად ყოველწლიური დანაზოგი რუსთავისთვის, ელექტროენერგიის გადასახადი, 20 ათასი ლარი იქნება. ამასთანავე, საკმაოდ მნიშვნელოვანია, რომ მოხდება ნახშიროჟანგის ემულსიის დაზოგვაც“, _ აღნიშნა აბულაშვილმა და დასძინა, რომ მსგავსი პროექტები "მერების შეთანხმების“ 9 ქალაქში განხორციელებული და დაგეგმილია.
"თელავში განხორციელდა სკოლის დათბუნების პროექტი, გორში – სამხედრო ჰოსპიტალის ცხელი წყლით მომარაგება მზის ენერგიაზე. ბათუმში ახლა ვახორციელებთ თბური ტუმბოებით ენერგიების მიღებას“, _ განაცხადა აბულაშვილმა.
ქალაქ რუსთავის მუნიციპალიტეტის ქონების მართვისა და ეკონომიკური განვითარების სამსახურის უფროსის ლაშა ლობჯანიძის განცხადებით, მსგავსი ეკონომიური პროექტების განხორციელება რუსთავისთვის დიდი შეღავათი იქნება.
"ამ ტერიტორიაზე შეცვალა 120 სანათი. ქალაქ რუსთავის მუნიციპალიტეტი ენერგოეფექტურობის ფარგლებში კიდევ აპირებს მსგავსი ღონისძიებების გატარებას. მსგავსი პროექტის მიმდინარე სამუშაოები უკვე წარმოებს 21-ე ბაღში. ამ კუთხით ქალაქს სერიოზული ეკონომია ექნება. დაახლოებით, საუბარია, 40% ეკონომიაზე“, _ აღნიშნა ლობჯანიძემ.
როგორც პრეზენტაციისას ქვემო ქართლის გუბერნატორმა პაატა ხიზანაშვილმა აღნიშნა, "პატარ-პატარა ენერგიების დაზოგვითა და მსგავიი პროექტების განხორციელებით, იქმნება ის ენერგია, რომლითაც პროგრესის მიღწევა ნამდვილად შესაძლებელია“.
როგორც გუმერნატორმა აღნიშნა, მსგავსი პროექტების განხორციელება მომავალშიც გაგრძელდება. ქვემო ქართლში, კერძოს, დმანისსა და წალკაში მცირე ჰესების განვითარების პროექტზე მუშაობა უკვე მიმდინარეობს.
"გუშინ შევხვდი ენერგეტიკის მინისტრს, რომელიც თავად არის დაინტერესებული მცირე ჰესების მშენებლობის საკითხით. მისგან მივიღე დაპირება, რომ პირად კონტროლზე აიყვანს ამ საკითხს. დიდი დაინტერესებაა ინვესტორების მხრიდანაც. ამიტომ მსგავსი პროექტების განხორციელებას მომავალშიც ველოდებით“, _ აღნიშნა ხიზანაშვილმა.
რუსთავის ცენტრალური პარკის ტერიტორიაზე არსებული ტბის გარშემო მდებარე განათების განახლებული სისტემა ოფიციალურად გაიხსნა, თუმცა დამსწრე საზოგადოებას ეკონომიური შუქდიოდური განათების ხილვის შესაძლებლობა არ მიეცა. როგორც ღონისძიების ორგანიზატორებმა განმარტეს, კომპანია BP-ს მოთხოვნა იყო,რომ ღონისძიება სამუშაო საათებში, 6 საათამდე დასრულებულიყო, დღის შუქზე კი, განათების ხილვა არაეფექტური იქნებოდა.
მდგრადი ენერგეტიკის დღის ფარგლებში, რუსთავის ცენტრალური პარკის ტერიტორიაზე ჩატარდა ველოგარბენი სპორტის ამ სახეობის მოყვარულთათვის, ადგილობრივი საჯარო სკოლების ეკოკლუბების მოსწავლეებმა წარმოადგინეს პრეზენტაციები თემაზე "რუსთავი-ენერგოეფექტურობა-მე“.
სკოლის მოსწავლეებმა მუნიციპალიტეტის ხელმძღვანელობას ახალი პროექტების, "სიცხიანი დედამიწის მკურნალობის“ და – "10 ათასი მზის სახურავი რუსთავში“ იდეები შესთავაზეს.
ღონისძიებას ქალაქ რუსთავის მერიის ხელმძღვანელი პირები -მერი დავით ჯიქია, ვიცე-მერი ნოდარ შეროზია, კომპანია "BP საქართველოს“ და ენერგოეფექტურობის ცენტრის წარმომადგენლები დაესწრნენ.
ტბის მიმდებარე ტერიტორიაზე გაიხსნა საინფორმაციო დაფა, მდგრადი ენერგეტიკის დღის ყველა მონაწილეს კი, სამახსოვრო საჩუქრები და საცნობარო ინფორმაცია გადაეცა.
