ბოლო დღეებში ფოთში, ზუგდიდსა და ხობში არასამთავრობო ორგანიზაცია "ყველა თაობა საქართველოსთვის" მოზარდებისთვის სპეციალურ ღონისძიებებს აწყობს. ტელეკომპანია "რუსთავი 2"-ის ინფორმაციით ბავშვებს თეატრის დარბაზში აგროვებენ და გასული წლების გახმაურებული საქმეების კადრებს აჩვენებენ, მათ შორის ციხის სკანდალურ კადრებს.
"პოსტსკრიპტუმში" გასული სიუჟეტის თანახმად, პროცესში ჩართულია ადგილობრივი ხელისუფლებაც და განათლების სამინისტროც.
"ფოთში მოსწავლეები ქალაქის განვითარების თემასთან დაკავშირებით დაიბარეს, თუმცა მათ წინა ხელისუფლების 9-წლიან მმართველობაზე ესაუბრნენ და ციხეში გადაღებული კადრები აჩვენეს. 12-დან 17 წლამდე მოზარდები, მათივე თქმით, ფოთის სხვადასხვა საჯარო სკოლებიდან პედაგოგებმა და დირექტორებმა ორგანიზებულად წაიყვანეს.
ანალოგიური მოვლენები განვითარდა ხობშიც, სადაც სხვადასხვა სოფლიდან ავტობუსებით თეატრში ათობით ბავშვი მასწავლებლებმა და ადგილობრივი ხელისუფლების წარმომადგენლებმა მიიყვანეს.
იმავე შინაარსის ფილმის ჩვენება გაიმართა ზუგდიდშიც. დარბაზში შეკრებილ არასრულწლოვნებს და მათ პედაგოგებს აქაც საკრებულოს თავმჯდომარე და გუბერნატორის მოადგილე მიესალმნენ და 9-წლიან რეჟიმზე ესაუბრნენ.
ორგანიზაციში, სადაც საკუთარ აპოლიტიკურობაზე მიუთითბენ, პოლიტპატიმრის სტატუსით გათავისუფლებული პირები ერთიანდებიან. რატომ აქვს რიგით არასამთავრობო ორგანიზაციას ადგილობრივი ხელისუფლების დიდი მხარდაჭერა, მოძრაობის ხელმძღვანელი არ განმარტავს. დარბაზში არასრულწლოვნების მიყვანაზე პასუხისმგებლობას გია სალუქვაძეც ადგილობრივ ხელისუფლებას აკისრებს" _ იუწყება ტელეკომპანია.
განათლების სამინისტრო საკითხის კვლევას დღეიდან დაიწყებს. უწყებაში განმარტავენ, რომ იმ შემთხვევაში, თუ დადასტურდა სკოლის დირექტორებისა და პედაგოგების მხრიდან აქციის ხელშეწყობა, სადაც არასრულწლოვნებს აკრძალული ვიდეომასალა აჩვენეს, სამინისტრო მკაცრ რეაგირებას მოახდენს.
ამ ფაქტს უკვე მოყვა გამოხმაურებები. საპარლამენტო უმრავლესობის წევრი თამარ კორძაია მიიჩნევს, რომ "ეს არის საბჭოთა კავშირის დაბრუნება საქართველოში":
_ ეს არის საბჭოთა კავშირის დაბრუნება საქართველოში! ყველა, ვინც სკოლის ადმინისტრაციიდან, ან ადგილობრივი თვითმმართველობიდან ან სამინისტროდან ამ პროცესში მონაწილეობდა, პასუხი უნდა აგოს სამსახურებრივად, ანუ დაატოვებინონ სამსახური! _ წერს დეპუტატი ფეისბუქის საკუთარ გვერდზე.
ამავე თემაზე: როგორ მოხვდნენ სკოლის მოსწავლეები ენმ-ს შესახებ გადაღებული ფოლმის პრეზენტაციაზე
