თითქმის ერთი თვეა, ოჯახის წევრები და ახლო ნათესავები თემურ სიხარულიძეს უშედეგოდ ეძებენ.
როგორც “გურია ნიუსის” ოზურგეთის განყოფილებაში მოსული, დაკარგულის და _ ნათელა სიხარულიძე ამბობს, მისი ძმა სახლიდან მიმდინარე წლის 6 ნოემბერს გავიდა და ამ დროის განმავლობაში მისი მდგომარეობის შესახებ ოჯახს არანაირი ინფორმაცია არ გააჩნია.
“საშინელი ამინდი იყო. საქონელი ჰყავდა მოსარეკი და სახლიდან ჩვეულზე ადრე, დღის სამ საათზე გავიდა. დაღამდა და რომ აღარ გამოჩნდა, შვილმა ძებნა დაუწყო. ძებნაში მეზობლები და ახლობლებიც ჩაერთნენ. ღამის ორი საათი იქნებოდა, როცა მდინარე სუფსის გადაცურვა მოახერხეს. გადაუღებელი წვიმის გამო, მდინარე ადიდებული იყო. საქონელი, რომლის მოსარეკადაც ის სახლიდან გავიდა, იქვე ყანაში ნახეს დაბმული. ეჭვი გვაქვს, რომ მას მდინარე არც კი გადაულახავს”, _ გვითხრა ნათელა სიხარულიძემ.
მისი თქმით, მთელი ღამის განმავლობაში, უშედეგო ძებნის შემდეგ, დილით პოლიციას მიმართეს: _ პოლიციის თანამშრომლები გვეუბნებიან, რომ ძებნა არ შევწყვიტოთ: _ “მასწავლეს, რომ თქვენი გაზეთისთვის მომემართა. იქნებ, ინფორმაციის გამოქვეყნების შემდეგ ვინმე გამოგვეხმაუროს და რაიმე ცნობა მოგვაწოდოს ჩემი ძმის შესახებ. არ ვიცით, ცოცხალია თუ მკვდარი. ვეჭვობთ, რომ ადიდებულმა მდინარემ წაიღო. ნათესავების და თანასოფლელების პარალელურად, სამძებრო სამუშაოებს გურიის საგანგებო სიტუაციის სამსახურის თანამშრომლებიც აწარმოებენ, _ თქვა დაკარგულის დამ.
როგორც “გურია ნიუსს” გურიის საგანგებო სიტუაციების სამსახურის უფროსმა შალვა ბოლქვაძემ უთხრა, ლანჩხუთის მუნიციპალიტეტის სოფელ ჩოჩხათში მცხოვრები, 1947 წელს დაბადებული თემურ დიმიტრის ძე სიხარულიძის დაკარგვის შესახებ შეტყობინება საგანგებო სიტუაციების სამსახურში 7 ნოემბერს შევიდა: _ სამაშველო ჯგუფი, შეტყობინების მიღებისთანავე გამოძახების ადგილზე გავიდა. დაათვალიერეს ტერიტორია და ინფორმაცია შეაგროვეს.
სიხარულიძე საქონლის მოსარეკად, სახლიდან ნასვამ მდგომარეობაში მყოფი გავიდა. თუმცა, რა მიმართულებით, უცნობია. თვითმხილველიც არავინ არის. მას შემდეგ მიმდინარეობს ამ პიროვნების ინტენსიური ძებნა. სამაშველო ჯგუფი თხუთმეტჯერ იყო გასული სოფელში ტერიტორიების დასათვალიერებლად. იმ ადგილზე, საიდანაც საიდანაც საქონელი უნდა გამოერეკა, ჩამოედინება მდინარე სუფსა. ვივარაუდეთ, რომ შესაძლებელი იყო, ადიდებულ მდინარეს წაეღო. გამოვიძახეთ მყვინთავები აჭარის საგანგებო სიტუაციათა სამსახურიდან. მდინარე სუფსაში ინტენსიური ძებნა სამი დღე გრძელდებოდა. ვერანაირ კვალს ვერ მიაგნეს, რასაც შეიძლებოდა, ინფორმაცია მოეცა ჩვენთვის. ამჟამადაც მიმდინარეობს საძიებო სამუშაოები. ყველაზე მეტად ვითარებას ართულებს ის, რომ არავინ იცის, რა მიმართულებით არის ეს პიროვნება წასული. აქვე გეტყვით, რომ სოფლის მთლიანი ტერიტორია ჩვენი ჯგუფების მიერ არაერთხელ შემოწმდა, პარალელურად ვაწარმოებთ სამაშველო სამუშაოებს შავი ზღვის სანაპიროზე _ გრიგოლეთი-შეკვეთილი-ურეკი, ვხვდებით მოსახლეობას, თუმცა კიდევ ერთხელ ვიმეორებ, რომ თვითმხილველი არ არსებობს. თუკი რაიმე ინფორმაცია მივიღეთ, მაშინვე დაგიკავშირდებით, _ გვითხრა სატელეფონო საუბარში შალვა ბოლქვაძემ.
განცხადებაში, რომლითაც “გურია ნიუსს” დაკარგულის ოჯახის წევრებმა მომართეს საკონტაქტო ტელეფონია მითითებული. იმ შემთხვევაში, თუ ფლობთ რაიმე ინფორმაციას, თუ კი ვინმეს შეგინიშნავთ ან შენიშნავთ ხანშიშესულ, ჭაღარა მამაკაცს, გთხოვთ, დარეკოთ ნომერზე: 599585818 ან დაუკავშირდეთ გურიის საგანგებო სიტუაციების სამსახურს.
