საქართველოს პარლამენტის თავმჯდომარემ, დავით უსუფაშვილმა და პარლამენტის თავმჯდომარის პირველმა მოადგილე მანანა კობახიძემ მონაწილეობა მიიღეს კონფერენციაში – "მაღალი დონის შეხვედრა ქალთა პოლიტიკური მონაწილეობის ხელშესაწყობად", რომელიც დღეს, სასტუმრო "რედისონ ბლუ ივერიაში" გაიმართა.
შეხვედრა მიზნად ისახავდა პოლიტიკურ ცხოვრებაში ქალთა მონაწილეობის გაზრდისა და გენდერული კვოტირებისთვის შესაბამისი პოლიტიკური ნების მობილიზებას. ღონისძიებაზე ქალთა პოლიტიკური გაძლიერების კუთხით განხორციელებული საქმიანობის ანგარიში იყო წარმოდგენილი და ასე მოხდა სხვა ქვეყნების კვოტირების პრაქტიკის გაცნობა.
კონფერენციაში მონაწილეობდნენ საქართველოს პრეზიდენტი, პარლამენტის თავმჯდომარე და თავმჯდომარის პირველი მოადგილე, მთავრობისა და პარლამენტის წევრები, დიპლომატიური კორპუსის, პოლიტიკური პარტიების, საერთაშორისო, სამთავრობო და არასამთავრობო ორგანიზაციების წარმომადგენლები.
ღონისძიება პარლამენტის თავმჯდომარის პირველმა მოადგილემ, გენდერული თანასწორობის საბჭოს თავმჯდომარემ, მანანა კობახიძემ გახსნა.
"დღევანდელი ღონისძიება ეძღვნება საკანონმდებლო ცვლილებებს ქალთა პოლიტიკური მონაწილეობის გაძლიერებისთვის, გააქტიურებისთვის. მეტი ქალი პოლიტიკაში, მეტი ქალი პარლამენტში – ეს არის ის დევიზი, რომლითაც გამსჭვალულია ჩვენი დღევანდელი ღონისძიება", – განაცხადა მანანა კობახიძემ. მისივე თქმით, ის რომ კონფერენცია ასეთი წარმომადგენლობითია, მიუთითებს ხელისუფლების დამოკიდებულებაზე ამ საკითხის მიმართ.
პარლამენტის თავმჯდომარის, დავით უსუფაშვილის კონფერენციაზე სიტყვით გამოსვლის ძირითადი თემა იყო: საკანონმდებლო რეგულირება პოლიტიკურ წარმომადგენლობაში ბალანსის დასაცავად. მისი განცხადებით, დროა დაიწყოს გადაწყვეტილებების შემუშავება და გადაწყვეტილებების მიღება.
"ვარ კვოტების წინააღმდეგი, მაგრამ მინდა მოგახსენოთ, რომ ვარ თანასწორობის მომხრე და თუ ვხედავ, რომ თანასწორობა ვერ მიიღწევა კვოტების გარეშე, მაშინ მე ვხდები კვოტების მომხრე. მე მგონი, ასე უნდა დავინახოთ ჩვენ საკითხი, ასე უნდა დავინახოთ ჩვენ ეს თემა და არა ვაქციოთ იდეაფიქსად, თემად, რომ კვოტები კარგია თუ ცუდია. კვოტები ცუდია, მაგრამ ამ შემთხვევაში ჩვენ გვაქვს საქმე ისეთ მდგომარეობასთან, როდესაც სამწუხაროდ აუცილებელია საკანონმდებლო ჩარევა. გარდა იმისა, რომ წინააღმდეგი ვარ კვოტების და მომხრე ვარ თანასწორობის, კიდევ ყველაზე უფრო მომხრე ვარ თავისუფლების. ნებისმიერი კანონი ეს არის თავისუფლების შემზღუდველი ახალი მექანიზმი, მაგრამ კარგად ვიცით, რომ თუ კანონებით რაღაცები არ შევზღუდეთ, მაშინ ჩვენი ნანატრი თავისუფლება ვერასოდეს ვერ მიიღწევა. სწორედ ამასთან გვაქვს საქმე და ამიტომ ვაცხადებ ამ შემთხვევაში პირადად ჩემგან, რომ ამ ეტაპზე საჭიროა ნაბიჯების გადადგმა საკანონმდებლო დონეზე ამ საკითხის დარეგულირებისთვის", – განაცხადა დავით უსუფაშვილმა.
მისივე თქმით, ეს იქნება დროებითი ზომა და მალე კვოტების შესახებ კანონი აღარ იქნება საჭირო და ის გაუქმდება.
დავით უსუფაშვილმა, ასევე ისაუბრა პარლამენტში ქალთა წარმომადგენლობის გაზრდის აუცილებლობაზე და მნიშვნელობაზე:
"პარლამენტში მეტი ქალი, ეს არ ნიშნავს მეტ პრივილეგირებულ ქალს. ეს ნიშნავს მეტი ქალის ჩართულობას ჯოჯოხეთურ, კატორღულ შრომაში და ვინც ნამდვილი პარლამენტარია, მისთვის პარლამენტარობა ეს არის კატორღული შრომა და ნამდვილ პარლამენტარობას ქალები მეტად ახერხებენ თუ კაცები, ამაზე მე კომენტარს არ გავაკეთებ, ზოგადად. ყოველ შემთხვევაში აქ რამე განსაკუთრებული მაგალითები იმის საწინააღმდეგოდ, რომ კაცები უფრო მეტად შრომობენ ვიდრე ქალები პარლამენტში, ემპირიული დასკვნები ამის საშუალებას არ გვაძლევს. ასე, რომ შრომაში ერთად ყოფნაზეა საუბარი, შრომის და პასუხისმგებლობის განაწილებაზეა აქ საუბარი და არა პრივილეგიების განაწილებაზე".
პარლამენტის თავმჯდომარემ აღნიშნა, რომ დიდი მნიშვნელობა აქვს იმას, თუ რამდენად ექნება საკანონმდებლო წინადადებას და საკანონმდებლო ცვლილებების პროექტს მხარდაჭერა საზოგადოების მხრიდან და რამდენად იქნება იგი განმარტებული და ახსნილი მოსახლეობისათვის.
"მე ვისურვებდი ეს პროექტი გამხდარიყო, რაც შეიძლება ფართო სახალხო განხილვის საგანი, სადაც იქნებოდა ახსნილი და განმარტებული, თუ რაზე ვსაუბრობთ. რა არის მისი შინაარსი, რატომ არის პოლიტიკურ პროცესში ქალების მონაწილეობა უკიდურესად აუცილებელი. რატომ არის ამაზე დამოკიდებული ჩვენი პოლიტიკური ცხოვრების შედეგიანობა, ეფექტურობა, პოლიტიკური კულტურის დახვეწა, ინტელექტუალური რესურსის უკეთ გამოყენება.
მოქალაქე რა დადებით შედეგს მიიღებს ამისგან, ქალიც და კაციც, ანუ ჩვენ, ვინც საჯარო სამსახურში ვართ ან ვიქნებით ჩართული, მათ შორის, გარკვეული საკანონმდებლო ცვლილებების შედეგადაც, რატომ და რა კონკრეტულ სარგებელს მოვუტანთ საზოგადოებას", – განაცხადა დავით უსუფაშვილმა. მისივე თქმით, პერსპექტივაში შესაძლებელია მომავალი საპარლამენტო არჩევნებისთვის ამ მიმართულებით მნიშვნელოვანი ნაბიჯი გადაიდგას წინ, რისთვისაც, თავის მხრივ აუცილებელია პოლიტიკურ ძალთა შორის ფართო კონსენსუსის მიღწევა.
ღონისძიება 8 მარტს თბილისსა და საქართველოს 20-ზე მეტ ქალაქში კვოტირების სისტემის შემოღების მოთხოვნით გამართულ აქციას ეხმიანება.
ღონისძიების ორგანიზატორია ქალთა პოლიტიკური მონაწილეობის სამუშაო ჯგუფი, რომლის შემადგენლობაშიც შედიან ქალთა პოლიტიკური გაძლიერების საკითხებზე მომუშავე ადგილობრივი არასამთავრობო და საერთაშორისო ორგანიზაციები, ასევე პოლიტიკური პარტიების და სამთავრობო სტრუქტურების წარმომადგენლები.
