საქართველოს პრეზიდენტი დღეს ქალთა პოლიტიკურ მონაწილეობასთან დაკავშირებით გამართულ მაღალი დონის შეხვედრას დაესწრო. გიორგი მარგველაშვილმა დამსწრე საზოგადოებას სიტყვით მიმართა. ქვეყნის პირველმა პირმა პოლიტიკურ პროცესებში ქალთა როლის გაზრდასა და მათ აქტიურ ჩართულობაზე ისაუბრა.
გიორგი მარგველაშვილმა ხაზგასმით აღნიშნა როგორც ადგილობრივ, ისე ცენტრალური ხელისუფლების ფუნქციონირებაში ქალთა მონაწილეობის მნიშვნელობაც. ქვეყნის პირველი პირის შეფასებით, აღნიშნული მიმართულებით გადადგმული ნაბიჯები საქართველოში შექმნის ბევრად უფრო კონკურენტულ გარემოს.
ჩვენ დღეს ვაგრძელებთ იმ პროცესს, რომელშიც უკვე დიდი ხანია აქტიურად ვმონაწილეობთ. პროცესის შინაარსი მდგომარეობს შემდეგში:
ქართულ სახელმწიფო სისტემაში, ქართულ რეალობაში ბევრად მეტი ქალი უნდა იყოს ჩართული მაღალ თანამდებობებზე. დღევანდელი წარმომადგენლობითი შეხვედრა, ისევე როგორც სხვა შეხვედრები, რომლებიც ამ მიმართულებით ჩატარებულა, მიქმნის იმის განცდას, რომ ამაზე საქართველოში მნიშვნელოვანი კონსენსუსი შემდგარია. არის ჭეშმარიტება, ცოდნა, რომლითაც კაცობრიობა მდიდარია და ამ ცოდნის, კვლევისა და გამოცდილების საფუძველზე ჩვენ ნათლად ვხედავთ, რომ ქვეყნებში სადაც ქალთა მონაწილეობა მაღალია, ბევრად უფრო სტაბილური, კონკრეტულ მიზნებზე, მათ კვალიფიციურ გადაწყვეტაზე ორიენტირებული პოლიტიკაა.
ეს არის ფაქტობრივი რეალობა, რომლითაც ჩვენ დღეს აღჭურვილი ვართ და რომლის საფუძველზეც შეგვიძლია მივიღოთ გარკვეული გადაწყვეტილებები. მიუხედავად იმისა, რომ დღეს ქალთა მონაწილეობა როგორც პარლამენტში, ისე თვითმმართველობის ორგანოებში უფრო მაღალია ვიდრე წინა წლებში, ჯერ კიდევ არ გვაქვს ის სტატისტიკური დონე, რომელიც სასარგებლო იქნებოდა ჩვენი ქვეყნისთვის და განაპირობებდა უფრო აქტიურ, მშვიდობიან და მომავალზე ორიენტირებულ განვითარებას.
განვითარებული ქვეყნების მმართველობით სისტემებში ქალების წარმოდგენა 40 პროცენტამდეა. სავარაუდოდ, ეს რიცხვი ჩვენთვის უნდა იყოს მნიშვნელოვანი და ამ პროცენტული მაჩვენებლისკენ დინამიურად უნდა მიისწრაფოდეს ჩვენი სახელმწიფოც. რეალურად ამ მიმართულებით გადადგმული ნაბიჯები შეგვიქმნის ბევრად უფრო კონკურენტულ გარემოს. ქალები არიან ძალიან აქტიური მეცნიერებაში, ხელოვნებაში, ის რომ პოლიტიკაში ეს ჯერ არ არის ასახული, ბუნებრივია უნდა გამოსწორდეს. კიდევ ერთხელ ხაზგასმით მინდა გითხრათ, რომ ამ მიმართულებით ჩემი კომპეტენციის ფარგლებში, იქნება ეს პოლიტიკური განცხადება, 2015 წლის ქალთა წლად გამოცხადება თუ პრეზიდენტის ადმინისტრაციაში ან სხვადასხვა თანამდებობებზე ქალბატონების წარდგენა, მე ამ პრიორიტეტს ვინარჩუნებ და მაქვს იმედი, რომ ეს ასევე განხორციელდება, როგორც საკანონმდებლო დონეზე, ასევე ყოველდღიურ პრაქტიკაში.
კარგი იქნება, რომ საქართველოს მე-5 პრეზიდენტი ქალი იყოს", – განაცხადა საქართველოს პრეზიდენტმა.
სახელმწიფოს მეთაურმა, მადლობა გადაუხადა დამსწრე საზოგადოებას და წარმატება უსურვა თავიანთ საქმიანობაში.
შეხვედრას საქართველოს პარლამენტის თავმჯდომარე დავით უსუფაშვილი, საქართველოს უშიშროების საბჭოს თავმჯდომარე ირინე იმერლიშვილი, საქართველოს პრეზიდენტის მრჩევლები ეთნიკური უმცირესობის საკითხებში და ადამიანის უფლებების დაცვის საკითხებში სოფიო შამანიდი და კახაბერ კოჟორიძე, ასევე პარლამენტისა და მთავრობის წევრები, დიპლომატიური კორპუსის წარმომადგენლები, პოლიტიკური პარტიების, საერთაშორისო, სამთავრობო და არასამთავრობო ორგანიზაციების წარმომადგენლები ესწრებოდნენ.
