(გურია ნიუსი, ოზურგეთი) _ “საერთაშორისო გამჭვირვალობა საქართველოს” აღმასრულებელი დირექტორი ეკა გიგაური, ამავე ორგანიზაციის მედია ანალიტიკოსი მამუკა ანდღულაძე და მკვლევარი ერეკლე ურუშაძე, გასული კვირის ოთხშაბათს, ოზურგეთში, დემოკრატიული ჩართულობის ცენტრში ჟურნალისტებს შეხვდნენ.
ჟურნალისტებმა ისაუბრეს ბოლო დროს დანერგილ მანკიერ ტენდენციებზე, ხელისუფლებასთან კომუნიკაციის პრობლემებზე. ის, რომ საჯარო მოხელეები ნებისმიერ კითხვის, ოფიციალურად, წერილობითი ფორმით მიწოდებას ითხოვენ, არახალია. ასევე ითქვა ღია თუ შეფარული ზეწოლის ფაქტებზე, საჯარო ინფორმაციის მოპოვებასთან დაკავშირებულ სირთულეებსა და დისტრიბუციის საკითხებზე.
ერეკლე ურუშაძემ იმ ანგარიშზე ისაუბრა, რომლის პრეზენტაციაც რამდენიმე დღის წინ მოეწყო. პარლამენტი, მთავრობა, სასამართლო, საჯარო სამსახური, სამართალდამცავი უწყებები, საარჩევნო ადმინისტრაცია, სახალხო დამცველი, კონტროლის პალატა, პოლიტიკური პარტიები, სამოქალაქო საზოგადოება, მედია და ბიზნესი _ ეს ის ძირითადი ინსტრუმენტებია, რომელთაც კორუფციასთან ბრძოლისა და ქვეყანაში კეთილსინდისიერი მმართველობის დამკვიდრების საქმეში მთავარი როლი აკისრიათ. “საერთაშორისო გამჭვირვალობა _ საქართველომ” აღნიშნული ინსტიტუტების ორწლიანი დაკვირვების შედეგად საქართველოს ეროვნული ანტიკორუფციული სისტემა შეაფასა.
“პარლამენტისა და სასამართლოს სისუსტის შედეგად, აღმასრულებელი ხელისუფლების ზედა დონეებზე თანამდებობრივი უფლებამოსილებების ბოროტად გამოყენების მნიშვნელოვანი რისკი არსებობს. სისუსტით გამოირჩევა ზოგიერთი სხვა მნიშვნელოვანი ინსტიტუტიც, მათ შორის, პოლიტიკური პარტიები, სამოქალაქო საზოგადოება და მედია. უკანასკნელ წლებში საქართველოში არაერთი მნიშვნელოვანი საკანონმდებლო ნორმა იქნა მიღებული კეთილსინდისიერი მმართველობის უზრუნველსაყოფად. თუმცა, ეს ნორმები პრაქტიკაში ყოველთვის სრულფასოვნად არ ხორციელდება”, _ აღნიშნა ურუშაძემ.
“საქართველოს, მედიის თვალსაზრისით, კარგი კანონმდებლობა, მაგრამ ცუდი პრაქტიკა აქვს. არსებობს მედიის დამოუკიდებლობის პრობლემა. ვგულისხმობ იმას, რომ ქვეყნის ყველაზე გავლენიანი მედიასაშუალებები _ ტელევიზიები, რომლებიც მთელ საქართველოზე მაუწყებლობენ _ არ არიან რეალურად დამოუკიდებლები. რაც შეეხება სამართალდამცავ სტრუქტურებს, მძლავრი რესურსები აქვთ, კარგი საბიუჯეტო დაფინანსება, რაც ხელს უწყობს მათი ფუნქციების შესრულებას. კორუფციასთან ბრძოლის თვალსაზრისით, მათ გააჩნიათ სერიოზული წარმატებები _ ვგულისხმობ მექრთამეობასთან ბრძოლას. თუმცა, პრობლემად რჩება გამჭვირვალობა და ანგარიშვალდებულება”, _ თქვა ერეკლე ურუშაძემ.
