კახა ასიეშვილი რაგბს საფრანგეთში თამაშობს. მის შესახებ ფრანგული მედია ბევრს წერს. 28 წლის მოთამაშის მიერ დადებული ლელო ყოველთვის გამოირჩევა, ისევე, როგორც მისი თამაშის სპეციფიკა.
კახა საქართველოს რაგბის ეროვნული ნაკრების წევრია. საფრანგეთიდან რამდენიმე დღის წინ ჩამოვიდა რუსეთთან სათამაშოდ და ლელოც დადო. თამაშის ბოლო ლელო…
კახა ასეიშვილი დღეს ჩვენი სტუმარია.
_ კახა, სანამ რაგბის შესახებ დავიწყებდეთ საუბარს, შენზე მოგვიყევი… როგორც ვიცით, ჩოხატაურიდან ხარ…
_ ჩოხატაურში დავიბადე და თბილისში გავიზარდე. ჩოხატაური ძალიან მიყვარს, ზაფხულობით სამ თვეს ვატარებდი. მამაჩემი არის სოფელ ფარცხმიდან, დედაჩემი კი _ ქვაბღიდან. ამ ორ სოფელში მაქვს მთელი ბავშვობა გატარებული. ახლა, როდესაც ჩამოვედი 
საქართველოში, სამწუხაროდ, ვერ მოვახერხე ჩასვლა, რადგან ძალიან დატვირთული რეჟიმი მაქვს. რუსეთის ნაკრებთან თამაშის შემდეგ, გვიწევს რუმინეთის ნაკრებთან თამაში და ყოველდღიურად ვვარჯიშობ. მინდა გითხრათ, რომ ყოველ წელს ჩავდივარ ჩოხატაურში, სამ-ოთხი დღით მაინც.
_ რაგბის თამაში როდის დაიწყე?
_ 2003 წელს დავიწყე. მანამდე კი მოჭიდავე ვიყავი.
_ რატომ მიატოვე ჭიდაობა?
_ როდესაც საქართველოს ნაკრები გავიდა მსოფლიოს თასზე, ძალიან მომეწონა და დავიწყე ფიქრი, რომ რაგბზე დამეწყო სიარული. ამ საქმეში ჩაერია ჩემი ძმა და მომცა რჩევები. ერთ დღეს ავდექი და წავედი რაგბის სათამაშოდ.
_ ჭიდაობაში წარმატებები არ გქონდათ?
_ არა, არ მქონდა. ორი წელი ვჭიდაობდი. პროფესიულ დონეზე დავიწყე რაგბის თამაში, მაშინ 13 წლის ვიყავი და ეს გზა ავირჩიე.
_ პირველად სად თამაშობდი?
_ ეს იყო "ყოჩები", სანამ საქართველოში ვიყავი, სულ "ყოჩებში" ვთამაშობდი.
_ "ყოჩებმა", როგორ მიგიღეს?
_ პირველ თამაშზე ვიყავი სათადარიგოებში და როდესაც დამაკვირდნენ თამაშის დროს, ძალიან მალე გადამიყვანეს მთავარ გუნდში. პირველივე კვირაში დავიწყე ვარჯიში პირველ გუნდთან ერთად თამაში, იმის მერე, ვთამაშობ და ვთამაშობ.
_ საფრანგეთში, როგორ მოხვდი? როგორც ვიცი, კონკურენცია ძალიან დიდია და ვინ დაგეხმარა საფრანგეთში გეთამაშა?
_ ჩემი მეგობარი დათო გურგენაძე საფრანგეთის ნაკრებში თამაშობდა. მას ძალიან კარგად იცნობენ. დათო მართლაც რომ წარმატებული და სასახელო სპორტსმენია. დათო ოზურგეთიდან არის. მინდა გითხრათ, რომ ქართველი სპორტსმენების მიმართ ძალიან დადებითად არიან განწყობილი და დიდ პატივს სცემენ.
"ყოჩებიდან”, 2010 წელს, ფედერალ 1-ის "ორტეზში” გადავედი, მომდევნო ორი წელი Pro D2-ის "ორიაკში” გავატარე, სეზონის წინ კი, თოპ 14-ში წარმატებულ "ბრივს” შევუერთდა.
_ რუსეთის თამაში ახსენე. ამ თამაშს რაგბის ძალიან ბევრი გულშემატკივარი ელოდებოდა, თამაშმა პოლიტიკური ელფერიც მიიღო.
_ სიმართლე გითხრათ, პოლიტიკიდან შორს ვარ და როგორც სპორტსმენი, გეტყვით, რომ ძალიან მნიშვნელოვანი თამაში იყო და ძალიან დიდი სიამოვნება მივიღეთ, როდესაც გულშემატკივრების იმედები გავამართლეთ. ამას დაემატა ის სიხარული, რომ ერთი ლელო დავდე და ამით საქართველოს ნაკრების გამარჯვებაში ჩემი წვლილი შევიტანე. საქართველოს ნაკრებში ჩემი თამაში ეს არის დიდი პატივი და სულ სხვა პასუხისმგებლობა. ახლა რუმინეთის ნაკრებთან მომიწევს თამაში და ესეც დიდი პასუხისმგებლობაა ჩემთვის.
_ კახა, შენი აზრით, როგორ ვითარდება რაგბი საქართველოში?
_ რაგბი ძალიან ვითარდება საქართველოში. როდესაც დავიწყე თამაში, უმაღლეს ლიგაში თამაშობდა ექვსი გუნდი, ახლა არის ათი გუნდი და ეს რიცხვი, დარწმუნებული ვარ, რომ გაიზრდება. ქართველი რაგბისტები წარმატებას ადვილად აღწევენ. საქართველოში რაგბი ვითარდება და ყველას ვურჩევ, რაგბში დაიწყოს თამაში.
კახა ასიეშვილი საფრანგეთში მეუღლესთან და შვილთან ერთად ცხოვრობს.
_ ჩემი ოჯახის წევრები არიან მთავარი გულშემატკივარი და ყოველთვის ცდილობენ, დაესწრონ ჩემს თამაშს, ეს არის ჩემთვის დიდი სტიმული, _ გვითხრა კახა ასიეშვილმა.
ჩვენს მკითხველს კი შევახსენებთ, რომ 21 მარტი, 16:30 საქართველოს რაგბის ეროვნული ნაკრები რუმინეთს ეთამაშება.
თამაშის პირდაპირი ტრანსლაცია საზოგადოებრივი მაუწყებლის ეთერით იქნება.
არ გამოტოვოთ "ბორჯღალოსნების" თამაში.
გახსოვდეთ _ რაგბი ჩვენი თამაშია!
