აჭარის ავტონომიური რესპუბლიკის უმაღლესი საბჭოს 18 მარტის ბიუროს რიგით მე-7 სხდომა, ხმაურისა და კამათის ფონზე მიმდინარეობდა და 6 საათი გაგრძელდა.
სხდომის დაწყებისას საკანონმდებლო ორგანოს თავმჯდომარე, დეპუტატ პეტრე ზამბახიძეზე 14 მარტს ბათუმის "დემოკრატიული ჩართულობის ცენტრში" განხორციელებული თავდასხმის ფაქტს გამოეხმაურა და აღნიშნა, რომ გმობს ყოველგვარ ძალადობას.
სხდომის დღის წესრიგის პროექტის დამტკიცებამდე დეპუტატებმა მასში პეტრე ზამბახიძესა და ჯემალ ფუტკარაძესთან დაკავშირებით ამ დღეებში განვითარებული მოვლენების გათვალისწინება მოითხოვეს. დაახლოებით ერთსაათიანი დაპირისპირებისა და ურთიერთსაწინააღმდეგო ბრალდებების შემდეგ ბიურომ ერთი დეპუტატის – ალექსანდრე ჩიტიშვილის ხმის გამოკლებით ( ის პროექტის ამგვარად ფორმირების წინააღმდეგი იყო), დღის წესრიგის პროექტი დაამტკიცა. მასში, დეპუტატების – პეტრე ზამბახიძის და რობერტ ჩხაიძის მოთხოვნით, ასევე შევიდა 19 მარტის პლენარული სხდომის დღის წესრიგის განსაზღვრის საკითხი.
"აჭარის ავტონომიური რესპუბლიკის საბიუჯეტო პროცესისა და უფლებამოსილებათა შესახებ" აჭარის ავტონომიური რესპუბლიკის კანონში შესატანი ცვლილების პროექტი სხდომაზე აჭარის ფინანსთა და ეკონომიკის მინისტრის მოადგილემ რამაზ ბოლქვაძემ წარმოადგინა. მისი განცხადებით, ცვლილების მიზანი ავტონომიური რესპუბლიკის ამ კანონის "საქართველოს საბიუჯეტო კოდექსთან" შესაბამისობაში მოყვანაა.
მომხსენებლის განმარტებით, ამ უკანასკნელში ბოლო დროს განხორციელებული ცვლილებები აუცილებლად უნდა აისახოს რეგიონის შესაბამის კანონში ფინანსების მართვის ეფექტურობისა და აღრიცხვიანობის გაუმჯობესებისათვის.
ბიუროს გადაწყვეტილებით, კანონის პროექტი უმაღლესი საბჭოს დარგობრივ კომისიებში ჩაეშვა, განისაზღვრა წამყვანი კომისია და განხილვის ვადები.
ამის შემდეგ ბიუროს წევრებმა დეპუტატ პეტრე ზამბახიძეზე განხოციელებული თავდასხმის ფაქტზე იმსჯელეს. ხმაურის ფონზე მიმდინარე სხდომაზე თავიანთი მოსაზრებები გამოთქვეს ბიუროს წევრებმა, სხდომაზე დამსწრე დეპუტატებმა. კამათი მოჰყვა შესაბამისი გადაწყვეტილების ფორმულირების პროცესს, შემუშავდა ორი ალტერნატიული წინადადება და საბოლოოდ, მათგან ერთ-ერთი, 5 ხმით 4-ის წინააღმდეგ დამტკიცდა – ბიუროს წევრებმა დაგმეს 14 მარტს ბათუმის "დემოკრატიული ჩართულობის ცენტრში" განხორციელებული თავდასხმა და სამართალდამცავებს კანონით გათვალისწინებული ქმედებებისაკენ მოუწოდეს.
უმაღლესი საბჭოს ბიურომ ასევე დაგმო 2015 წლის 15 მარტს დეპუტატ ჯემალ ფუტკარაძის სახლთან მომხდარი ინციდენტი, თუმცა გადაწყვეტილების საბოლოო ვარიანტის ფორმულირებას ამჯერადაც ხმაური მოჰყვა. დეპუტატ ალექსანდრე ჩიტიშვილის შეფასებით, ეს იყო არასამთავრობო ორგანიზაცია "თავისუფალი თაობის" მიერ ორგანიზებული მშვიდობიანი აქცია, ახალგაზრდებმა გამოხატეს საკუთარი აზრი და პოზიცია, სიტყვისა და გამოხატვის თავისუფლება კი საქართველოს მოქალაქეებს კონსტიტუციით აქვთ გარანტირებული.
სრულიად საპირისპირო შეფასებები ჰქონდათ დეპუტატებს – ჯემალ ფუტკარაძესა და მედეა ვასაძეს. მათი განცხადებით, პროცესი ხელისუფლების მაღალჩინოსნების მიერაა დაგეგმილი და მართული, ამასთან, უმაღლესი საბჭოს ორივე წევრმა აღნიშნა, რომ მათზე მიმდინარეობს ზეწოლა და გროვდება კომპრომატები. მედეა ვასაძემ ამის დასადასტურებლად რამდენიმე ფაქტიც დაასახელა და ხელისუფლებისაგან დეპუტატებისა და მათი ოჯახის წევრების, ახლობლების უსაფრთხოების უზრუნველყოფა მოითხოვა.
რაც შეეხება 19 მარტს პლენარული სხდომის გამართვის საკითხს, იგი დღის წესრიგიდან მოიხსნა, ვინაიდან განსახილველი საკითხები ბიუროს სხდომაზე არ იყო წარმოდგენილი.
კანონმდებლებმა ასევე იმსჯელეს სხვადასხვა, მათ შორის საკანონმდებლო ორგანოს ბიუჯეტის შემცირების საკითხზე.
