სამშაბათს, 17 მარტს, ლანჩხუთის მუნიციპალიტეტის საკრებულოს ბიუროს სხდომა გაიმართა, რომელზეც საკრებულოს თავმჯდომარემ გოგი ხელაძემ დასაწყისშივე დააანონსა საკრებულოს მორიგი სხდომის თარიღი _ 27 მარტი. წესისამებრ, ბიურომ სწორედ ამ სხდომისათვის განსაზღვრა, როგორც განსახილველი საკითხები, ასევე, ამ საკითხების მომხსენებლები.
საკრებულოს მომავალი სხდომის დღის წესრიგში დეპუტატები დაადგენენ მუნიციპალიტეტის ქონების საჯარო აუქციონის ფორმით პრივატიზების ბიჯის სიდიდის, საჯარო აუქციონში მონაწილის ბილეთის ფასის ოდენობას და დაამტკიცებენ საკუთრების მოწმობის ფორმასაც.
ადგილობრივი (ქონების) გადასახადის შემოღებისა და მისი განაკვეთების შესახებ საკრებულო მიიღებს შესაბამის დადგენილებას, ხოლო რაც შეეხება ა(ა)იპ "საგარეო-ეკონომიკური კავშირურთიერთობების, ინვესტიციების, ტრანსპორტის, ტურიზმის და მეწარმეობის განვითარების ცენტრისთვის" ქონების სარგებლობის უფლების გადაცემას, ამაზე დეპუტატებს გამგებლისთვის თანხმობის მიცემა მოუწევთ.
იმავდროულად, მოხდება ცვლილება ლანჩხუთის მუნიციპალიტეტის გამგეობის თანამდებობის პირთა და სხვა მომსახურეთა საშტატო ნუსხისა და თანამდებობრივი სარგოს ოდენობების დამტკიცების შესახებ 2014 წლის 15 აგვისტოს # 23-ე დადგენილებაში და მუნიციპალიტეტის ადმინისტრაციულ საზღვრებში ადგილობრივი სამგზავრო გადაყვანის რეგულირების წესის დადგენა.
საკრებულო, ასევე, იმსჯელებს მუნიციპალიტეტის ტერიტორიაზე გარე ვაჭრობის რეგულირების წესისა და გარე ვაჭრობის უფლების საფასურის დადგენის შესახებ, მოახდენს მიწის ნაკვეთებზე საკუთრების უფლების აღიარების კომისიის პერსონალური შემადგენლობის ცვლილებას.
საკრებულოს სხდომაზე დაიწყება ადმინისტრაციული წარმოება მუნიციპალიტეტის ტერიტორიაზე ნარჩენების შეგროვებისა და გატანის სისტემის არმქონე იმ დასახლებული ტერიტორიების განსაზღვრის შესახებ, სადაც არ იმოქმედებს "ნარჩენების მართვის კოდექსით" გათვალისწინებული სანქციები. აქ კონკრეტულად საუბარია იმ ადგილებზე, სადაც არ დგას ნაგვის ურნები და არ ხდება ნაგვის რეგულარულად გატანა.
ბიურომ მოისმინა მუნიციპალიტეტის საკრებულოს საკონკურსო-საატესტაციო კომისიის მიერ 2014 წელს ჩატარებული კონკურსის მოკლე ანგარიში, თუმცა მიზანშეწონილად არ ჩათვალა ეს საკითხი საკრებულოს სხდომაზე გასულიყო.
