ოზურგეთის მუნიციპალიტეტის დაბა ნასაკირალში მცხოვრები ამირან შავაძე ნასაკირალის საჯარო სკოლის დირექტორის გათავისუფლებას ითხოვს.
_ ნასაკირალის საჯარო სკოლაში განუკითხაობაა. მე და ჩემი ძმა ვიყავით სამეურვეო საბჭოს წევრები, მაგრამ შემდეგ მოხდა ისე, რომ ახლა არც ერთი არ ვართ. ორი წლის შემდეგ გაახსენდათ სკოლაში, რომ სამეურვეო საბჭოს წევრები ერთი ოჯახის წარმომადგენლები არ უნდა ყოფილიყვნენ. ეს მაშინ მოხდა, როდესაც სკოლის დირექტორის მიმართ, როგორც მშობლებს, პრეტენზია გაგვიჩნდა. რა არ ხდებოდა ჩვენს სკოლაში _ გაკვეთილები ცდებოდა, სხვა სკოლიდან მოდიოდნენ ბავშვები და მიდიოდა საქმის გარჩევები. გაკვეთილის დროს მოსწავლეები ფანჯრის რაფებზე იყვნენ შემომსხდარნი. როდესაც ამის შესახებ განვაცხადე პედაგოგებთან, მითხრეს, შენი საქმე არ არისო.
ყველა პრობლემის შესახებ დავწერე განცხადებაში და მივწერე ოზურგეთის რესურსცენტრის უფროსს, ლელა იმედაშვილს.
რამდენიმე დღეში ოზურგეთიდან გენინსპექციის თანამშრომლები მოვიდნენ. გადაამოწმეს ყველაფერი და გაკვეთილები ნამდვილად ცდებოდა. შემდეგ ეს მასალები გადაიგზავნა თბილისში, მაგრამ არავინ პასუხი არ მაღირსა.
ოთხი შვილის მამა ვარ და სკოლაში მინდა წესრიგი იყოს. რადგან ამის შესახებ განვაცხადე, მაგის გამო გამათავისუფლეს?
კიდევ ერთი რამ მინდა გითხრათ _ ბავშვებს ემსახურება მიკროავტობუსები, მაგრამ არავინ არ ინტერესდება, მძღოლებს აქვთ თუ არა შესაბამისი კატეგორიის მართვის მოწმობა. ადრე 8 სამარშრუტო ტაქსი მუშაობდა, ახლა მუშაობს _ 12. მე და ჩემი ძმა დაგვითხოვეს. 2015 წლის იანვარში ჩვენ მიერ ნასაკირალის სკოლაში დირექტორი სპარტაკ გოგიტიძე არსებულ დარღვევებთან დაკავშირებით შემოტანილ განცხადებაზე გაგვინაწყენდა და 2 თებერვალს არ დაგვიშვა სამუშაოზე _ ჩვენი სატრანსპორტო საშუალებით მოსწავლეების გადაყვანაზე, რასაც ვასრულებთ ორ წელიწადნახევარზე მეტია. არც სკოლაში მისვლის უფლება მაქვს. ხელწერილი დამაწერინეს პოლიციაში, რადგან სკოლის შენობის ჩამტვრეულ მინებთან ბავშვები ისხდნენ და ამის შესახებაც დავაფიქსირე ჩემი პოზიცია, _ გვითხრა ამირან შავაძემ.
შავაძის თქმით, სკოლაში ახლა ზეწოლა მის შვილებზე ხორციელდება:
"ჩემი ოთხი შვილი სწავლობს ახლა ნასაკირალის საჯარო სკოლაში. ოთხივე წარმატებული მოსწავლეა და ყველა კონკურსში მონაწილეობენ _ სერტიფიკატებით გავსებული მაქვს სახლი, მაგრამ ახლა სკოლაში ეუბნებიან, რომ მამაშენს სკოლის დირექტორობა უნდა და ამიტომ არის ცუდად განწყობილი სკოლის დირექტორის და პედაგოგების მიმართო. ჩემი ერთ-ერთი შვილი პედაგოგმა ცემა და სიტყვიერი შეურაცხყოფა მიაყენა.
არ ვიცი, რა ვქნა. იმის საშუალება არ მაქვს და არც მინდა, რომ სხვა სკოლაში გადავიყვანო ბავშვები, არადა, რას ვამბობ ისეთს? სკოლაში ვითხოვ წესრიგს!" _ გვითხრა რედაქციაში მოსულმა ამირან შავაძემ.
შავაძის ბრალდებებს არ ეთანხმება დაბა ნასაკირალის საჯარო სკოლის დირექტორი სპარტაკ გოგიტიძე. ის ჩვენთან სატელეფონო საუბარში ამბობს, რომ ბავშვებზე არანაირი ზეწოლა არ ხდება:
_ ეს არის ცილისწამება _ ბავშვებზე არანაირი ზეწოლა არ ხდება. ტყუილია ის ინფორმაცია, რომ თურმე პედაგოგმა ბავშვი სცემა. რაც შეეხება იმ საკითხს, თუ რატომ არ გადაჰყავთ მათ ბავშვები მიკროავტობუსით, ეს გადაწყვეტილება მიიღო იმ კომპანიამ, რომელიც ემსახურება ბავშვების გადაყვანას სკოლაში. სხვა კომენტარის გაკეთებას არ ვაპირებ, რადგან ამ ადამიანის შესახებ ყველაფერი იციან ოზურგეთის საგანმანათლებლო რესურსცენტრში, _ გვითხრა სპარტაკ გოგიტიძემ.
ოზურგეთის საგანმანათლებლო რესურსცენტრის უფროსი ლელა იმედაშვილი ამირან შავაძის საქმესთან დაკავშირებით შემდეგი სახის კომენტარს აკეთებს: "2015 წლის 16 იანვარს, ქალაქ ოზურგეთის საგანმანათლებლო რესურსცენტრში შემოვიდა სსიპ ოზურგეთის მუნიციპალიტეტის დაბა ნასაკირალის საჯარო სკოლის სამეურვეო საბჭოს წევრების _ ამირან შავაძის, გურამ შავაძისა და ზურაბ შავაძის წერილობითი განცხადება სკოლის არჩეული დირექტორის, სპარტაკ გოგიტიძის ქმედებებთან დაკავშირებით. განცხადების საფუძველზე, სსიპ დაბა ნასაკირალის საჯარო სკოლაში ჩატარდა მონიტორინგი. მოკვლეული მასალები, კანონის შესაბამისად, 2015 წლის 30 იანვარს რეაგირებისთვის გადაეგზავნა საქართველოს განათლებისა და მეცნიერების სამინისტროს შიდა აუდიტის დეპარტამენტს. შიდა აუდიტის დეპარტამენტს დამატებითი მოკვლევის მასალები, ასევე, გადაეგზავნა 2015 წლის 20 თებერვალს.
გამომდინარე იქედან, რომ სამეურვეო საბჭოს წევრები _ ამირან შავაძე, გურამ შავაძე და ზურაბ შავაძე იყვნენ ერთმანეთის ახლო ნათესავები და ამით დაირღვა "ზოგადი განათლების შესახებ" საქართველოს კანონის 36-ე მუხლი, სსიპ განათლების მართვის საინფორმაციო სისტემის უფროსის 2015 წლის 2 მარტის ბრძანებით N1.2/430 დაბა ნასაკირალის საჯარო სკოლის სამეურვეო საბჭოს წევრების რეგისტრაცია გურამ შავაძის, ამირან შავაძისა და ზურაბ შავაძის ნაწილში ბათილად იქნა ცნობილი.
ჩვენ მიერ გადაგზავნილი მოკვლევის მასალების შესაბამისად, საქართველოს განათლებისა და მეცნიერების მინისტრის 2015 წლის 5 მარტის ბრძანება N145 შესაბამისად, სსიპ ოზურგეთის მუნიციპალიტეტის დაბა ნასაკირალის საჯარო სკოლას მიეცა წერილობითი გაფრთხილება, _ გვითხრა ლელა იმედაშვილმა.
ლელა იმედაშვილი ჩვენთან საუბარში დროს ამბობს, რომ თუ ამირან შავაძეს ისევ აქვს რაიმე სახის პრეტენზია, მას შეუძლია ოზურგეთის საგანმანათლებლო რესურსცენტრს მიმართოს და ყველა საკითხზე შესაბამისი რეაგირება აუცილებლად იქნება.
