"გაერთიანებული დეოკრატიული მოძრაობის" ლიდერის ნინო ბურჯანაძის განცხადებით, 21 მარტს კიდევ ერთხელ დადასტურდა, რომ "ქართული ოცნების" მთავარი საზრუნავი არის ხელისუფლების შენარჩუნება და არა ქვეყნის პრობლემების მოგვარება.
აღნიშნულით ბურჯანაძე 21 მარტს, თავისუფლების მოედანზე, მთავრობის გადადგომის მოთხოვნით, "ნაციონალების" მიერ გამართულ საპროტესტო აქციას გამოეხმაურა.
"გაერთიანებული დეოკრატიული მოძრაობის" ლიდერის თქმით, საქართველოს არ ჰყავს ხელისუფლება, რომელიც ქვეყნის ინტერესებზე და ხალხზე ზრუნავს.
"სამწუხაროდ, კიდევ ერთხელ მიწევს იმის აღნიშვნა, რომ ჩვენ სახელმწიფო აღარ გვაქვს და ჩვენს ქვეყანას პატრონი არ ჰყავს, არ ჰყავს ხელისუფლება, რომელიც ქვეყნის ინტერესებზე და ხალხზე ზრუნავს. ეს 21 მარტს კიდევ ერთხელ დადასტურდა, როდესაც "ნაციონალების" აქცია ჩატარდა და ყველა კომენტარით როგორც "ქართული ოცნების" ასევე, "ნაცმოძრაობის" მხრიდან კიდევ ერთხელ ნათლად გამოჩნდა, რომ "ქართული ოცნების" მთავარი საზრუნავი არის ხელისუფლების შენარჩუნება და არა ქვეყნის პრობლემების მოგვარება",-განაცხადა ბურჯანაძემ.
ნინო ბურჯანაძის განმარტებით, "ქართული ოცნება" 21 მარტს თავს ბედნიერად გრძნობდა, იმიტომ რომ "ნაციონალებმა" იმდენი ხალხის მობილიზება ვერ შეძლეს, რამდენსაც ისინი აპირებდნენ.
რაც შეეხება "ნაციონალურ მოძრაობას", ბურჯანაძე აცხადებს, რომ ეს ის ძალაა, რომელიც ტრადიციულად თვლის, რომ რაც უარესად წავა ქვეყანაში საქმე, მით უკეთესი.
"ერთადერთი, რაც მათ 21 მარტის შემდეგ აწუხებთ ისაა, რომ მათ იმდენი ხალხის მობილიზება ვერ შეძლეს, რამდენის იმედიც ჰქონდათ",-განაცხადა ბურჯანაძემ.
"გაერთიანებული დეოკრატიული მოძრაობის" ლიდერმა ასევე, აღნიშნა, რომ მდგომარეობა სავალალოა, რადგან ქვეყანაში ყოფილი პრემიერ-მინისტრის ბიძინა ივანიშვილის მეშვეობით ცდილობენ, 2 მთავარი პოლიტიკური ძალა წარმოაჩინონ.
"ერთის მთავარი ამოცანა ხელისუფლების შენარჩუნებაა ნებისმიერ ფასად, ხოლო მეორის – ხელისუფლებაში დაბრუნება ნებისმიერ ფასად. ქვეყნის ინტერესები ამ ორ ძალას არ აინტერესებს. სწორედ ამისთვის გადაარჩინა ბიძინა ივანიშვილმა "ნაციონალური მოძრაობა", ამისთვის დააშანტაჟა მოსახლეობა ადგილობრივი და საპრეზიდენტო არჩევნების წინ, რომ თუ "ქართულ ოცნებას" ხმას არ მისცემდნენ, "ნაციონალები" აუცილებლად მობრუნდებოდნენ, ეს "ნაციონალების" მთავარ ოპოზიციურ ძალად შენარჩუნების მიზეზია",-განაცხადა ბურჯანაძემ.
პარტიის ლიდერი მიიჩნევს, რომ ერთადერთი გამოსავალი ამ ყველაფრიდან ვადამდელი საპარლამენტო არჩევნებია, რათა ხელისუფლებას ორი პოლიტიკური ძალა მოშორდეს, რომლებიც ხალხის მოტყუებით დაკავებულნი არიან.
"ქვეყანას "ქართული ოცნება" უნდა მოშორდეს, რომელიც გადამგდებია. ხელისუფლებაში პოლიტიკური ძალა უნდა მოვიდეს, რომელიც არა საკუთარ კეთილდღეობაზე, არამედ უპირველეს ყოვლისა ქვეყნის პრობლემების მოგვარებაზე იზრუნებს. ასეთი პოლიტიკური ძალა სწორედ ჩვენ ვართ, რომელიც პარტიის ინტერესებს ქვეყნის ინტერესებზე მაღლა არასოდეს აყენებდა",-განაცხადა ბურჯანაძემ.
