კომპანია "ჯორჯიან უოთერ ენდ ფაუერი" ბიზნესმენ თამაზ ელიზბარაშვილის მიმართვასთან ეხმაურება და აცხადებს, რომ მის მიერ მოყვანილი ფაქტები, თითქოს კომპანია მას ზედმეტ გადასახადს არიცხავს, ამასთანავე, გეგმიურ შემოწმებას იმაზე ხშირად ახორცელებენ, ვიდრე საჭიროა, სიმართლეს არ შეესაბამება.
როგორც "გურია ნიუსს"კომპანიაში განუცხადეს, "ჯორჯიან უოთერ ენდ ფაუერის"წარმომადგენლები აღნიშნულ ობიექტზე ორჯერ მივიდნენ.
"პირველად, მიმდინარე წლის 19 მარტს, კომპანიის სამი წარმომადგენელი ობიექტზე მრიცხველის მუშაობის ხარისხის შემოწმების მიზნით იყო მისული. იმ დღესვე, ბიზნესმენ თამაზ ელიზბარაშვილის კომპანიის იურისტთან – ბეჟან ბეჟუაშვილთან მოხდა შეთანხმება იმის თაობაზე, რომ 2015 წლის 24 მარტს, 14:00 საათისთვის, "ჯორჯიან უოთერ ენდ ფაუერის"თანამშრომლები თავშესაფრის ტერიტორიაზე აღრიცხვის კვანძს სემეკის 2008 წლის N32 დადგენილების მე-6 მუხლში მითითებული წესის შესაბამისად მოაწყობდნენ. მიღწეული შეთანხმება დაირღვა თამაზ ელიზბარაშვილის მხრიდან, რითაც "ჯორჯიან უოთერ ენდ ფაუერის"წარმომადგენლებს არ მიეცათ შესაძლებლობა, აღრიცხვის კვანძი კანონმდებლობის შესაბამისად დაემონტაჟებინათ“, _ აცხადებენ კომპანიაში.
რაც შეეხება წყლის გადასახადს, კომპანიის განმარტებით, ბიზნესმენ "თამაზ ელიზბარაშვილის ძაღლების გადარჩენისა და დაცვის ასოციაციას"მოხმარებული წყლის საფასური მოქმედი კანონმდებლობის შესაბამისად ერიცხება.
"გურია ნიუსი"აღნიშნულ საკითხთან დაკავშირებით საქართველოს ენერგეტიკისა და წყალმომარაგების ეროვნულ კომისიასაც დაუკავშირდა, სადაც აცხადებენ, რომ თუ ბიზნესმენი თამაზ ელიზბარაშვილი კომისიას მიმართავს, მისი საკითხი განცხადების შეტანის შემდეგ ინდივიდუალურად განიხილება.
"ზეპირი განცხადების საფუძველზე კომისიას საკითხის მოკვლევის შესაძლებლობა არა აქვს. როდესაც მოქალაქეს აქვს პრეტენზიები შესაბამის კომპანიებთან და თვლის, რომ კომპანია არღვევს მის უფლებებს, უნდა მომართოს კომისიას განცხადებით. ნებისმიერი საკითხი, რომელიც მოქალაქესა და კომპანიას შორის არსებულ დავას უკავშირდება, საჭიროებს ინდივიდუალურ განხილვას. საჭიროა საქმესთან დაკავშირებით მოკვლევის ჩატარება, შესაბამისი დოკუმენტაციის შესწავლა და ა.შ. ჩვენ მუდმივად ვაანონსებთ, რომ თუ მოქალაქე თვლის, რომ ენერგეტიკისა და წყალმომარაგების სექტორებში კომპანიების მხრიდან ირრვევა მისი უფლებები, უნდა მომართოს სემეკს ან სემეკთან არსებულ ენერგოომბუდსმენის სამსახურს“, _ აცხადებენ სემეკში.
რაც შეეხება აღნიშნულს იმასთან დაკავშირებით, რომ კომპანია "ჯორჯიან უოთერ ენდ ფაუერი"1მ3-ზე წყალზე 0.2655 ლარის ნაცვლად, ელიზბარაშვილს 4.4 ლარს ახდევინებს, სემეკში განმარტავენ, რომ კომისიის მიერ დადგენილი, არასაყოფაცხოვრებო მოხმარებისთვის, ტარიფი სწორედ 4.4 ლარია. რასაც კომპანია, ამ შემთხვევაში არ არღვევს.
ამავე თემაზე:
თამაზ ელიზბარაშვილი "ჯორჯიან უოთერ ენდ ფაუერისგან" განმარტებას მოითხოვს
