ადრე გაზაფხულზე, აპრილის შუა რიცხვებამდე, მრავალწლოვანი კულტურებისთვის აუცილებელია ფოსფორ-კალიუმიან-აზოტოვანი რთული სასუქების მიცემა, რადგან ამ დროს დაწყებულია მცენარის ვეგეტაცია და მასში დიდია აზოტის მოთხოვნა. რთული სასუქების ძირითადი კომპონენტები: ფოსფორი, აზოტი და კალიუმი, პროცენტული შემადგენლობის მიხედვით, აგროწესების დაცვით ახლა უნდა მივცეთ თხილს, მანდარინს თუ სხვა ხეხილოვან კულტურებს. მრავალწლოვანი ხემცენარის ირგვლივ ჯერ სასუქი შემოფანტვით უნდა შემოვაყაროთ და შემდეგ იმავე რადიუსში ჩათოხნა მოვახდინოთ. არ შეიძლება სასუქის შემოყრა და ჩაუბარავად დატოვება, რასაც არაერთი მეურნე აკეთებს. ასეთ შემთხვევაში აზოტი კი ახერხებს ფესვებამდე ჩაღწევას, რადგან ის სწრაფად დნება, თუმცა, ფოსფორს და კალიუმს არ აქვს იგივე თვისება, რჩება ზედაპირზე, ფესვამდე ვერ აღწევს და სარგებლიანობა მცენარისთვის ნულის ტოლფასია. ამიტომაა აუცილებელი სასუქის შემოყრისთანავე ჩაბარვა.
იმ შემთხვევაში, თუ ხეხილოვანი კულტურა ახალგაზრდაა, სასურველია 200 გრამი რთული სასუქის შემოყრა, ხოლო შედარებით ასაკოვანს უნდა შემოვუყაროთ 700 გრამამდე. პარალელურად, ორგანული სასუქის მიცემაც დასაშვებია, თუმცა, არა ნედლი სახით.
ასევე ჩვენს საკარმიდამო ნაკვეთებში გამუდმებით უნდა ვაწარმოოთ ნარჩენების კომპოსტირება, რაც საუკეთესო სასუქია. რასაც ბუნება უფასოდ გვაწვდის ნარჩენების თუ ხმელი ფოთლების სახით, სასუქად უნდა ვაქციოთ.
