გთავაზობთ პასკის ერთ-ერთ საუკეთესო რეცეპტს.
თუ გინდათ, პასკა ძალიან გემრიელი გამოვიდეს, ზუსტად დაიცავით მომზადების მითითებული წესი და საკუთარი ფანტაზიით ნუ შეურევთ ამა თუ იმ ინგრედიენტს.
საფუარის მომზადება: ერთ ლიტრ ანადუღებ და გაგრილებულ რძეში შევურიოთ ორი სუფრის კოვზი საფუარი, ერთი ჭიქა შაქარი, სასურველია მიქსერით ავთქვიფოთ, დავამატოთ 4- 5 ჩაის ჭიქა უმაღლესი ხარისხის პურის ფქვილი, კარგად ავურიოთ, დავხუროთ თბილად და დავდგათ ასაფუებლად.
როცა ბუშტუკები წამოვა და აფუებას დაიწყებს, ცალკე დავიწყოთ მეორე მასის მომზადება: 10 ცალი კვერცხითა და ერთი კილო და 800 გრამი შაქრით (ზუსტად დაიცავით დოზა) კარგად ამოვიყვანოთ გოგლიმოგლი. ჩავასხათ 200 გრამი არაჟანი, (და არა მაწონი), ავურიოთ, დავამატოთ 900 გრამი გამდნარი კარაქი (და არა მარგარინი) და კვლავ ავურიოთ.
შემდეგ დავამატოთ ვანილი გემოვნებით, ორი ჩაის კოვზი ილი და ამავე რაოდენობის მუსკატი, ორი ჩაის კოვზი ზეთი, 200 გრამი მუქი ფერის, კარგი ხარისხის ქიშმიში. დავამატოთ საფუარიანი მასა, რომელიც წინასწარ გვქონდა მომზადებული, ავურიოთ კარგად და თანდათან შევაზილოთ სამი კგ უმაღლესი ხარისხის პურის ფქვილი, რომელსაც წინასწარ აუცილებლად გავცრით.
ავზილოთ კარგად და მერე შეფუთული ქვაბი თუ გობი, რაზეც ცომი გვაქვს, ერთი საათით დავდგათ თბილ ადგილზე. როცა აფუვდება, ერთხელ ჩავზილოთ.
მეორედ ამოსვლის შემდეგ, ჩავდოთ ცხიმწასმულ ფორმებში, ჭურჭლის ნახევარი რაოდენობით, დავდგათ ერთი საათით და როცა ფორმებშიც დაიწყებს აფუებას, ისე, რომ მთლად ამოსვლა არ ვაცალოთ, შევდგათ აირღუმელში, 160-170 გრადუსამდე ტემპერატურაზე, დაახლოებით, ერთი საათი და 20 წუთის განმავლობაში.
დაკვირვებით ვაკონტროლოთ ცხობის პერიოდი. უკვე მზა პასკა, გაგრილების შემდეგ, მოვრთოთ საკუთარი გემოვნებით. ერთ-ერთი მთავარი ატრიბუტი მაინც შაქრის პუდრაა. სხვა მინარევები ნამცხვრისკენ ხრის პასკის გემოს და არომატის თავისებურებას უკარგავს, თუმცა ეს ჩვენი აზრია. შეგიძლიათ, საკუთარი გემოვნების კარნახით იმოქმედოთ. მთავარია, ბისკვიტი იყოს საუკეთესო.
