ლანჩხუთის მუნიციპალიტეტის გამგებელი 2010 წელს გამოცემულ წიგნში _ „გურიაში გურულად“, ლექსებთან ერთად ისტორიებსაც გვთავაზობს. „გურია ნიუსი“ ექსკლუზიურად გთავაზობთ ერთ-ერთ ისტორიას, სახელწოდებით „ტახამატა“.
„1983 წლის ივლისის თვეში მახარაძეში (ოზურგეთში) ვიყავით წასული სოფ. მამათიდან მე და ჩემი მეგობარი. ბაზრის შესასვლელში შემხვდა მამაჩემის მეგობარი მიშა დობორჯგინიძე, რომელიც ცნობილი მოქეიფე და ვაჟკაცი კაცი იყო. როცა დამინახა, ძალიან გაუხარდა და იქვე მახარაძის ცენტრში პატარა რესტორანში შეგვიყვანა საქეიფოდ. რაფერაა მამაშენი, დედაშენი, _ მეკითხება მიშა და იხსენებს ძველ ამბვებს, რაც მას და მამაჩემს ერთად ბავშვობაში გადახდენიათ. უცებ მიშამ ამბვის მოყოლა შეაჩერა და დაიძახა: ამ ბოზს რა უნდა რესტორანში? ვინ დააწყებია აფიციანტად მუშაობა? მერე მას დაუძახა, _ ნინოია, მოი აგერ ჩქარა, მოი! აფიციანტმა უცებ მოირბინა, მიშამ ახედა ქვემოდან და ექსპრონტად ლექსიც წაუკითხა:
ჩვენი ნინო რესტორანში
დარბის, როგორც ტახამატა,
მახარაძლებს ბოზი აკლდა
ლანჩხუთიდან რომ დეიმატა?
_ აი რესტორანი რაფერ მუაგენი შე უპატრონო? _ ყველამ მაგრათ ვიცინეთ, აფიციანტმა ნინომც.
(ტახამატა იყო ჰოლანდიელი, ძაან სწრაფი ფეხბურთელი, რომელიც ოთხმოციან წლებში ბელგიის კლუბ „სტანდარტში“ გამოდიოდა, მას თბილისის „დინამოს“ წინააღმდეგ თავი გამოიჩინა.)
ზაზა ურუშაძე, 1984 წელი
პ.ს. როგორც ამ წიგნიდან ირკვევა, ზაზა ურუშაძე, 2002 წლის 24 თებერვალს, საქართველოს პრეზიდენტის N209 ბრძანებულებით დაჯილდოებულია ღირსების ორდენით.
