უზენაესი სასამართლოს ახლადარჩეული თავმჯდომარე ნინო გვენეტაძე მოსამართლეთა მიმართ დისციპლინური პასუხისმგებლობის საკითხის გააქტიურების მომხრეა.
როგორც "გურია ნიუსთან" ექსკლუზიურ ინტერვიუში ნინო გვენეტაძემ განაცხადა, საჭიროების შემთხვევაში, მოსამართლეებს დისციპლინური სახდელები შეიძლება დაეკისროთ და მათ მიმართ სისხლის სამართლებრივი დევნაც დაიწყოს.
"ჩემი განცხადება ძალაშია და სამართლებრივად გამართულია. საკანონმდებლო დონეზე მოხდება მოსამართლეთა შეფასება, ანგარიში, რაც არ გულისხმობს კონკრეტულ საქმეებზე გადაწყვეტილებების, შედეგებისა და ფაქტობრივი გადაწყვეტილებების მოხსენებას. პირველ ეტაპზე ეს არის მოსამართლეთა თვითშეფასება და თვითკონტროლი საპროცესო ჩარევის გარეშე და არის მეორე ვარიანტი – მოსამართლეთა საქმიანობის შეფასება გარკვეული პრეტენზიების საფუძველზე დისციპლინური სამართალწარმოების წესით, რაც შეიძლება შემოიფარგლოს მოსამართლისათვის კონკრეტული სახდელების დაკისრებით, სახდელის უმაღლესი ფორმა კი, შეიძლება იყოს თანამდებობიდან გათავისუფლებაც. ყველაზე უკიდურესი ფორმა, რაც სისხლის სამართლებრივ პასუხისმგებლობას უკავშირდება, მოსამართლის მიერ განზრახ უკანონო გადაწყვეტილების მიღებაა. ამიტომ განმარტება, რომელიც მე გავაკეთე აბსოლუტურად ლეგიტიმურია და კანონის მოთხოვნებიდან გამომდინარეობს.
ვის მიმართაც იქნება გამოსაყენებელი და გვექნება ამის კანონიერი საფუძვლები, აუცილებლად გამოვიყენებთ. თუმცა, ყველაზე მისაღები მექანიზმი, კონკრეტული მოსამართლის მიერ თავისი საქმიანობის შეფასებაა. თვითკონტროლი და თვითკრიტიკა საერთაშორისო დონეზე სტანდარტია. ამის საფუძველზე კი ყველაზე გონივრული გადაწყვეტილების მიღება. ეს არ ნიშნავს ჩემს მიერ ვინმეს მიმართ რევანშისტულ განწყობას, არც სხვა პოზიციას, ეს არის ის, რაც კანონმდებლობაში არსებობს“, _ აღნიშნავს გვენეტაძე.
მისივე თქმით, თვითშეფასებისა და კონტროლს მექანიზმი იძლევა საშუალებას მოსამართლემ თვითონ მიიღოს გადაწყვეტილება მინიმუმ პოზიციიდან წასვლის შესახებ.
"არ შემიძლია ამ ეტაპზე კონკრეტული მოსამართლეები და საქმეები მიგითითოთ, მაგრამ შემიძლია გაჩვენოთ პრობლემა და მისი გადაწყვეტის გზები განვმარტო. ამ პოზიციების განმხორციელებელი, ერთპიროვნულად უზენაესი სასამართლოს თავმჯდომარე არ არის. ერთ შემთხვევაში ეს არის დისციპლინური პასუხისმგებლობის ფორმატი და თქვენ იცით, რომ უზენაესი სასამართლოს თავმჯდომარე ამავდროულად არის იუსტიციის უმაღლესი საბჭოს თავმჯდომარე სადაც ასევე არის დისციპლინური პასუხისმგებლობის დაყენების საპროცესო ფორმატი.
რაც შეეხება სისხლის სამართლებრივი პასუხისმგებლობის საკითხებს, ეს "საერთო სასამართლოების შესახებ“ ორგანული კანონით არის გათვალისწინებული, ამ შემთხვევაში, რა ფუნქციებიც აქვს თავმჯდომარეს ამასაც განვახორციელებ.
ჩვენი საზოგადოება, განწყობებიდან გამომდინარე, ბუნებრივია, ელის ცვლილებებს. მას აინტერესებს, რა პასუხი იქნება გაცემული 2012 წლამდე გამოტანილ გადაწყვეტილებებთან დაკავშირებით, რაზეც არსებობს საზოგადოების ეჭვი, რომ სამართალწარმოების პროცესში დაშვებული იყო უამრავი კანონდარღვევა. თუ ეს ჯერ დადგენილი და დადასტურებული არ არის მოსამართლის მიმართ კანონის ჩარევა, ასევე გამოკვლევაც, რაც პროცედურების გავლას გულისხმობს, ამიტომ მყისიერად ეს ჩემი მხრიდან ვერანაირიად ვერ განხორციელდება, თუმცა მექანიზმი, რომელიც თვითშეფასებას და კონტროლს გულისხმობს, ეს იძლევა საშუალებას მოსამართლემ თვითონ მიიღოს გადაწყვეტილება მინიმუმ პოზიციიდან წასვლის შესახებ“, _ აღნიშნა გვენეტაძემ.
