ოზურგეთის ალ. წუწუნავას სახელობის სახელმწიფო დრამატული თეატრის სცენაზე, ნ. დუმბაძის ნაწარმოების “მე, ბებია, ილიკო და ილარიონის” მიხედვით რეჟისორმა ვასილ ჩიგოგიძემ განახორციელა კ. ნინიკაშვილისა და ვ. ჩიგოგიძის პიესა “გამარჯობათ, ხალხო!” სცენოგრაფია ეკუთვნის ლომგულ მურუსიძეს, მუსიკალური გამფორმებელია ეკა კუსიანი, ლოტბარი _ ამირან გოლიაძე, ქორეოგრაფი _ მარიკა ქვეითაია, რეჟისორის ასისტენტი _ მაკა მამულაიშვილი. სპექტაკლში მთავარ როლებს ასრულებენ: ზურიკელა _ გიორგი დოლიძე, ბებია _ ბელა კიკვაძე, ილიკო _ გაბრიელ მდინარაძე და ზაზა ჯინჭარაძე, ილარიონი _ ამირან ქადეიშვილი და ნუგზარ ბარამიძე.
სპექტაკლში დუმბაძის გმირები გაუხუნარი ფერებითაა გამოძერწილი. მათი ურთიერთობიდან ვრწმუნდებით, რომ ადამიანთა გამძლეობის ერთადერთი გარანტი ერთად ყოფნა, სიხარულისა და მწუხარების გაყოფა-გაზიარებაა. სპექტაკლის გმირები ყოველ ხელსაყრელ სიტუაციაში აქილიკებენ ერთმანეთს, მაგრამ უერთმანეთოდ ყოფნა ვერ წარმოუდგენიათ.
სპექტაკლში შინაური ცხოველების გაცოცხლებით, ამეტყველებითა და მათი ადამიანებთან საოცარი სიახლოვით მოხიბლა მაყურებელი ვალერიან კანთელაძემ (მურადა), შორენა გვეტაძემ (თხა), თამარ მდინარაძემ (ძროხა ფაქიზო).
ვასილ ჩიგოგიძემ, საინტერესო რეჟისორული წვდომით თანამედროვე ჟღერადობა შემატა სპექტაკლს, რამაც საბოლოოდ განსაზღვრა მისი წარმატება.
